24. युहन्ना यीशुक बपतिस्मा देयदाहेय

एलिशिबा अर जकर्याह चो बेटा यूहन्ना, बडे होउन एक भविष्यद्वक्ता बनलो। हुन बादोड़ायें रहयो आय, अर बादोड़ेचा ओंडार अर फापांग खावयो आय, अर ऊठ चा रोम चा बनला कपड़ा लययो आय।

खुबेय मानेय यूहन्ना चा गोठ सुनता करता बादोड़े इला। हुन यो बलुन हूनांग प्रचार करलो, ”पश्चाताप करा, कायंकी स्वर्ग चो राज्य निकट आसेय!”

जब मानेय यूहन्ना चा संदेश के सुनला तब हूनांग लगले खुबेय झन आपला पापे ले पश्चाताप करला, अर यूहन्ना हूनांग बपतिस्मा दिलो। यूहन्नाक देखता करता खुबेय झन धार्मिक अगुवे बल इला, तबले हूनिइता आपला पापांग चो पश्चाताप अर अंगीकार इकरत।

यूहन्ना धार्मिक अगुवांग बल्लो, ”ए जहरीला सांप! पश्चाताप करा अर आपला आदत के बदला। परमेश्वर हर हुन रूख के काटिद जो अच्छा फर एफरेय अर हुन हूनांग आगी चा झोकायें फिगु देइद।“ जो भविष्यद्वक्ता बल्लु रेहेय यूहन्ना हुनाक पुरा करलो, ”देख, जल्दी मै तुचा पुरहे माचा संदेसवाहक के पठाइन जो तुचा करता वाट के तयार करीद।“

आधो धार्मिक अगुवा यूहन्नाक समजावला कि कांय हुन मसीह आय। यूहन्ना जवाब दिलो, ”मै मसीह नोहोय, तबले हुन माचा पासे एयीद। हुन इतलो महान आय कि मै हुनाचो जुता चा रसी हेड़ता चो योग नाही।”

अगले दिन, यीशु बपतिस्मा नेऊक यूहन्ना लग इलो। जब यूहन्ना हुनाक देखलो, तब हुन बल्लो, ”देखा! परमेश्वर चो भेड़ी जो संसार चा पाप के उठाऊन नेइद।”

यूहन्ना यीशु बल्लो, ”मै तुक बपतिस्मा देता चो योग नाही। बजाय याहचो जरूरी आय कि तुंय मक बपतिस्मा दे।” तबले यीशु बल्लो, ”तुंय मक बपतिस्मा देतो रेहेय, कायंकि करूक सही काम योहोय आय।” मतलब यूहन्ना हुनाक बपतिस्मा दिलो, जबकि यीशु केभेय पाप इकरू रेहेय।

बपतिस्मा दिला चा पासे जब यीशु पानीयेंले निकरून बाहीर इलो, तब परमेश्वर चो आत्मा पांरेवा चो रूपे प्रघट होलो अर खाले उतरून हूनाचा लग बसलो। हुनेय समय, परमेश्वर स्वर्ग ले गोठयावलो, “तुंय माचो बटा आस। मै तुचासंग प्रेम करीदा हेंय, अर मै तुचासंग खुबेय प्रसन्न आसेंय।”

परमेश्वर यूहन्ना बलु रेहेय, ”पवित्र आत्मा खाले उतरून काचायलग बसीद जेके तुंय बपतिस्मा देसे।“ हूनेय परमेश्वर चो बेटा आय परमेश्वर एकेकलोय आय। तबले जब यूहन्ना यीशुक बपतिस्मा दिलो, तब हूनीइतो परमेश्वर बाप के गोठयावताक सुनलो, बेटा परमेश्वर के देखलो, जो कि यीशु आय अर हुन पवित्र आत्माक देखलो।