26. यीशु आपलो सेवा सुरु करिदा

सैतान चा परीक्षा चो इंकार करला चा पासे, यीशु आपस गलील चा क्षेत्र इलो। योहोय डेरा आय जहाँ हुन रहयो आय। पवित्र आत्मा हुनाक खुबेय सामर्थ देवयो आय, अर यीशु एकठान डेरा ले दुसरा डेरायें गेलो अर मानेयांग शिक्षा दिलो। सब झन हुनाचा बारेयें अच्छा बात बल्ला।

यीशु नासरत नगरे इलो यो हुन गॉव आय जहां हुन अपला बालकपन ले रहयो आय। सब्त चा दिन हुन आराधना करताईता डेरायें गेलो। अगुवा हूनाक यशायाह भविष्यद्वक्ता चा संदेश चो एकठान पुस्तक दिला। हूनि चाहया आत कि हुन हूनाक पढ़हो। मतलब यीशु हुन पुस्तके खोलुन हूनाचा एक भाग के मानेयांग करता पढ़लो।

यीशु पढ़लो, “परमेश्वर मक आत्मा दिलोहाय ताकि मै कंगालांग लग सुसमाचार प्रचार करुक सकेंय। हूनइतो मक याहायकरता पठावलो हाय कि कैदियांग स्वतंत्र करेंय, आंधांग फेर दृष्टि प्रदान करेंय, अर हूनांग छुटकारा देंय जेके दुसरा मानेय कुचल्लाहात। यो हुन समय आय जब परमेश्वर हमंग कृपालु होईद अर हमचो सहायता करीद।”

फेर यीशु बसलो। सपा मानेय हुनाक एक दम ध्यान से देखते रहत। हूनी जानत कि पवित्र शास्त्र चो जो भाग हूनइतो एभे पढ़हु रेहेय हुन मसीह चा बारेयें रेहेय। यीशु बल्लो, “जो गोठ मैं एभे तुमचा करता पढ़ले हांय, हुन या समय घटित होयदाये। “सब मानेय घबराव रहत। हूनिइता बल्ला, “कांय यो युसुफ चो बेटा नोहोय ? ”

तब यीशु बल्लो, “यो सच आय कि मानेय कोंहू इसा भविष्यवक्ताक कभी स्वीकार ईकरत जो हूनांग चा नगरे पल्लो बढ्लो हाय। एलिय्याह भविष्यवक्ता चा समये, इस्राएले खुबेय झन रांडिया रहत। तबले जब साढ़े तीन साल तक पानी ईयेय तब परमेश्वर एलिय्याहक इस्राइले एकली रांडि चो सहायता करुक ईपठावेय। याहचो वजाए, हुन एलिय्याहक कोंहु दुसरा देशे पठावलो।”

यीशु बलताक जारी रखलो, “अर एलीशा भविष्यवक्ता चा समये, इस्राएले खुबेय मानेय चमड़ी चा रोगे पीड़ित रहत। तबले एलिशा हूनांग लगले कोंहूक घला चंगा ईकरेय। हूनईतो केवल इस्राएल चा शत्रुयांग चा सेनापति नामान के चंगा करलो। “तबले जो मानेय यीशुक सुनते रहत हूनी यहूदी आत याहायकरता जब हूनिईता हूनांग चा बलता ईताक सुनला तब हूनी हुनाक रीस होला।

नासरत चा मानेय यीशुक धरला अर हूनाक आराधना चा जघायेंले ठेगलतेय दुवारे निला। हूनाक मारता करता खाले पिंगुक एक चट्टाने चा ठिंगे निला। तबले यीशु भीड़ेले निकरलो अर नासरत नगर के सांडून गेलो।

फेर यीशु सपा गलीले चा क्षेत्र गेलो अर बड़े भीड़ हूनाचा लग इला। हूनी इसा खुबेय मानेयांग धरून आनला जो बीमार अर खोड़या रहत। हूनांग लगले कोंहु देखुक, हिंडूक, सुनुक, या गोठयावुक ईसकते रहत, अर यीशु हूनांग चंगा करलो।

याहया अलावा, खुबेय मानेय यीशु लग गेला जेचालक दुष्ट आत्मा रेहेय। यीशु दुष्ट आत्मांग निकरावता करता आदेश दिलो, हूनी दुष्ट आत्मा अक्शर चिचयावला, “तुंय परमेश्वर चो बेटा आस। “भिड़े चा मानेय घबराव रहत, अर हूनिईता परमेश्वर चो स्तुति करला।

फेर यीशु बारह मानसांग चुनलो जेके हुन आपला प्रेरीत बल्लो। हूनी प्रेरीत हूनाचा संग यात्रा करला कि अर हूनाचा लगले शिक्षा हासिल करला।