28. सौवकार जवान अधिकारी

एक दिन, एक धनी जवान शासक यीशु लग ऐऊन हूनाक समजावलो, “ऐ उत्तम गुरु, अनन्त जीवन पाँवता करता मैं कांय करीन?“ यीशु हूनाक बल्लो, “तुंय मक ‘उत्तम’ कांयेक बलसा? केवल एकलोय उत्तम आय अर हुन परमेश्वर आय, तबले अगर तुंय अनन्त जीवन पाँऊक चाह्स तो परमेश्वर चा आज्ञाक पालन कर।”

“मक कोन कोन आज्ञाक पालन करता चो जरुरी आसेय?“ हुन समजावलो। यीशु जवाब दिलो, “हत्या ईकरसे। व्यभिचार ईकरसे। चोरी ईकरसे। झूठ ईबलसे। तुचा बाबा अर याया चो आदर करसे, अर आपला पड़ोसीक आपलो ईसा मया करसे।”

तबले हुन जवान मानस बल्लो, “मैं आपला बालक पन ले इही सब आज्ञाक पालन करतेय इलेहांय। मक सदा करता जीवत रहूक एभे कांय करता चो जरुरी आसेय?“ यीशु हूनाक देखलो अर हूनाक मया करलो।

यीशु जवाब दिलो, “अगर तुंय सिद्ध होऊक चाह्सा तो जाऊन तुचा लग चा सब कुछ के विकुंदेश अर हुन धन गरिबांग वांटुदेश, अर तुक स्वर्ग धन मिरिद। तब ऐऊन माचा पाटतेव होव।”

जो यीशु बल्लो जब हुन जवान मानस सुनलो तब हुन खुबेय उदास होलो, कांयकि हुन खुबेय धनी रहेय अर आपला सपा सम्पतिक देऊक इचाहु रेहेय। हुन बाहडून यीशु लगले गेलो।

तब यीशु आपला चेलाग बल्लो, परमेश्वर चा राज्ये धनी मानेयांग चो प्रवेश करतो खुबेय कठिन आसेय। हाँ, एक धनी मानस परमेश्वर चा राज्ये प्रवेश करता चो तुलनाये कोंहू ऊट चा सुई चा नाके ले होऊन निकरून जातो आसान आसेय।”

जो यीशु बल्लो जब चेला सुनला तो हूनी घबरावला। हुनिईता बल्ला, “अगर यो इसे आय तो परमेश्वर कोनाक वांचाइद?”

यीशु चेलाग देखलो अर बल्लो, “मानेयांग करता खुद चो उध्दार करतो असम्भव आय। तबले परमेश्वर करता कंही बल करुक असम्भव नाही।”

पतरस यीशुक बल्लो, “हमी चेला आपला सब कुछ के साडून तुचा पाटतेव होलू हांव। तो हमचो ईनाम कांय होयीद ?”

यीशु जवाब दिलो, “हर एक जन जो माचा कारन घर, भाई, बहीन, बाबा, याया, कड़हा, अर सम्पतिक सांडलाहात, हुन हूनाचो ले 100 गुना ज्यादा पावंदे अर अनन्त जीवन के बल पाँविद। तबले खुबेय झन जो पुरहे आसत हूनी पाटतेव होदे, अर खुबेय झन जो पाटतेव आसत हूनी पुरहे होदे।”