43. कलिसिया चो सुरु होतो

यीशु स्वर्ग बाह्डून गेला चा पासे चेला यरूशलेम रुकला जिसे यीशु हूनांग करता चो आदेश देऊ रेहेय। हूता चा विश्वासी मानेय लगातार एक साथ प्रार्थना करुक एकेय लग होवया आत।

हर साल, फसह चा पर्व चा 50 दिन चा बाद, यहूदी मानेय पिन्तेकुस्त नाव चो एक महत्वपूर्ण दिन के मनावला आत। पिन्तेकुस्त हून समय रेहेय जब यहूदी मानेय गहुंक काटलेक मनावया आत। सब संसारे ले यहूदी मानेय पिन्तेकुस्त चा दिन के एक साथ मनावता करता यरूशलेम ऐऊ रहत। या साल, पिन्तेकुस्त मनावता करता समय यीशु चा स्वर्ग गेला चा लग भग एक सप्ताह चा बादे ऐऊ रेहेय।

जे समय सपा विश्वासी मानेय एकेय लग जमा रहत, तो जे घरे हूनी रहत उबुकले हून तेज हवा चो आवाजे भरलो। तब आगी चा इसा दिखया इता सब विश्वासीयांग चा मुंडा चा उपरे प्रकट होलो हूनि सब पवित्र आत्माए भरला अर हूनिईता अन्य भाषाए परमेश्वर चो स्तुति करला। यो हून भाषा आय जेके बलता करता हूनांग पवित्र आत्मा सक्षम करू रेहेय।

जब यरूशलेम रहया इता मानेयांग चा आवाज के सुनला, तो हूनि भीड़ चा रुपे यो देखता करता एक साथ इला कि का्य होयदा हेय। हूनिईता विश्वासियांग परमेश्वर चा द्वारा करला इता बड़े बड़े काम चो घोषणा करता इताक सुनला। हूनि विस्मित रहत कायेकी हूनि हून काम के आपलाय भाषाएँ सुनते रहत।

हूनांग लगले आधो मानेय बल्ला कि हूनि चेला नशाये रहत। तबले पतरस उभलो अर हूनांग बल्लो, “ माचो बात के सुना! येही मानेय नशाये नाही याहचो बजाए तुमी देखसा हून हूनेय आय जो योएल भविष्यवाकता बलु रेहेय कि होहिद: परमेश्वर बल्लो, “ अन्त चा दिने, मै माचो आत्मा उंडेलिन।”

“हे इस्राएली मानस, यीशु एक इसो मानेय आय जो यो दिखावता करता करलो कि हून कौन आय खुबेय अनोखे काम करु रेहेय। हून परमेश्वर चा सामर्थे खुबेय अध्द्भुत काम के करु रेहेय। तुमी यो जानासा, कायेकी तुमी येही कायेकी देखलसा। तबले तुमी हूनाक क्रुसे चघावलास!”

“यीशु मरलो तबले परमेश्वर हूनाक मरला लगले जीवावलो। यो हून बात के पूरा करलो जिसे एक भविष्यवक्ता लिखु रेहेय तुंय तुचा पवित्र जन के कब्रे सडुक इदेसे। हमी गवाह आँसू कि परमेश्वर यीशुक फेरेय जीवावलो।”

“परमेश्वर पिता अब यीशुक आपला उजा तेंव बसाउन हूनाक आदर दिलो हाय। अर यीशु हमचा करता पवित्र आत्मा पठावलो हाय जासे कि हुन वाट देखते रहत कि हुन पठायीद। पवित्र आत्मा ही हुन काम के होऊक देयदा हेय जेके तुमी देखासा अर सुनासा।”

“तुमी हुन मानेंय,यीशुक क्रुसे चघावलास तबले निश्चित रूपे जाना कि परमेश्वर यीशुक सब चीजे प्रभु अर मसीह दोनों ठहरलो! हाय!

पतरस चो सुनया इता मानेंय हुनाचा द्वारा बल्ला इता बात भीतरे ले हिल्लो हुनेयकरता हुनिइता पतरस अर चेलांग समझावला,”हे भाई, हमंग कांय करतो आय ?”

पतरस हुनांग जवाब दिलो,” तीमी हर एक आपला पाप के पश्चताप करा ताकि परमेश्वर तुमचा पाप के क्षमा करो,अर यीशु मसीह चा नावे बपतिस्मा नेहा तब हुन तुमंग वरदान स्वरूप पवित्र आत्मा बल देयीद!”

पतरस जो बल्लो हुनाक लगभग 3,000 मानेंय विश्वास करला अर यीशु चा चेला बनला। हुनिइता बपतिस्मा निला अर यरूशलेम चा कलीसिया चा हिस्सा बनला!

जब प्रेरित हुनांग शिक्षा दीला तो विश्वासी लगातार सुनला। हुनि अक्सर मिलया आत अर एक साथ भोजन करया आत अर हुनिइता अक्सर एक दूसरा करता प्रार्थना करला हुनिइता मिलुन परमेश्वर चो स्तुति करता अर जो कहींबल हुनागचा लग रेहेय हुनिइता एक दूसरे संग वांटला नगर चा हर एक मानेंय हुनांगचा करता अच्छा विचार रखया आत प्रतिदिन, ज्यादा से ज्यादा मानेंय विश्वासी बनते गेला!