8. परमेशवर युसूफ अर हूनाचा परिवार के वाचायदा हेयं

कई साल चा पासे, जब याकूब डोकरो होऊ रेहेय, तो हुन आपला प्रिय बेटाक युसुफ के हूनाचा भाईयांग जांच करुक पटावलो जो जानवरांग चा झुंडांग चो देक भाल करते रहत।

युसुफ चा भाईया हूनाक रीस कराय आत कायंकि हूनाचो बाप इतो हूनाक ज्यादा प्रेम करयो आय अर याहायकरता कि युसुफ सपना देखू रेहेय कि हुन हूनाचा शासक होदे। जब युसुफ आपला भाईयांग लग इलो तब हूनितो हूनाक बंधक बनावलो अर हूनाक दासांग चा व्यापार करिया इतांग विकु दिलो।

घरे बाहडला चा पुरहे युसुफ चा भाईया युसुफ चा कपड़ाक फाटाऊन सेरी चा रकते फिजांव दिला। फेर हूनिइता कपड़ाक आपला बाप ईताक देखावला ताकि हुन यो सोचो कि कोंहु जंगली जानवर युसुफ के मारलो हाय। याकूब खुबेय ऊदास रेहेय।

दासांग चा व्यापार करया ईतांग हूनी मानेय युसुफ के मिस्र नीला। निल नदी धड़ी बसलो इतो मिस्र एक विशाल अर शक्तिशाली देश रेहेय। हूनी दासांग चो व्यापार करया इता युसुफ के एक धनी सरकारी अधिकारी क दास चो रुपे विकु दिला। युसुफ आपला स्वामिक अच्छा सेवा करलो, अर परमेश्वर युसुफ के आशीष दिलो।

हूनाचा स्वामी ची बायली इति युसुफ संग सोवता चो कोशिश करली, तबले युसुफ यारितीले परमेश्वर चा विरुद्ध पाप करुक इनकार करलो। हुन रिश होली अर युसुफ के झूठा आरोप लगावली, याहायकरता हूनाक गिरप्तार करून जेल खानाये पठाव दिला। एथा तक जेल खानाये बल, युसुफ परमेश्वर चा प्रति सच्चा रेहेय, अर परमेश्वर हूनाक आशीष दिलो।

दूय साल चा बाद, युसुफ एभे बल जेल खानाए आसेय, भले ई हुन निर्दोष रेहेय। एक रात, फिरौन, जिसे कि मिस्र मानेय आपला राजांग चिचयावया आंत, दुय ठान सपना देखलो जो हूनी ईता हूनाक अतयंत विचलित करला। हूनाचा कोंहू बल सलाह कार हूनाक हुन सपना चो अर्थ सांगुक इपावलो।

परमेश्वर युसुफ चा सापना चा अर्थ सांगता चो छमता प्रदान करू रेहेय, याहायकरता फिरोन युसुफ के जेल खानाएले आपला लग कोकलो। युसुफ हूनाक हुन सपना चो अर्थ संगलो अर बल्लो, “परमेश्वर भरपूरी चो फसल वाले सात साल पासे अकाल के सात साल पटावयो ईतोआय।”

फिरोन युसुफ के इतलो प्रभावित होलो कि हुन हूनाक मिस्र चो दूसरा सबले शक्तिशाली मानेय नियुक्त करलो।

युसुफ मानेयांग अच्छा फसल ईता सात साल चो दोरान बड़ी मात्रा ये भोजन के जाम करू बल्लो। जब सात साल अकाल होलो तब युसुफ मानेयांग हुन भोजन के विकलो ताकि हूनाचा लग खाता करता पर्याप्त होलो।

हुन अकाल केवल मिस्र ये नोहोय, तबले कानाने बल भयंकर रेहेय जाहा याकूब अर हूनाचा परिवार रहया आत।

याहायकरता याकूब आपला सेबल बड़े बेटाक भोजन झोकुक पठावलो। जब हुन भोजन झोकुक युसुफ चा पुरहे ऊभलो तब हूनी भाईया युसुफ के ईचीन। इत तबले युसुफ हूनांग चिनलो।

यो मालूम करुक कि कांय हुन बदला हात हूनांग चा जाँच करला चा पासे, यूसुफ हूनाग बल्लो, “मैं तुमचो भाई युसुफ आय भय ई होवा! जब तुमी मक दास चा रूपे विकुराहस तब तुमी बुरा करता चो ठानू राहास, तबले परमेश्वर हुन बुराईक भलाई चो रूपे उपयोग करलो! एहा अर मिस्रये राहा ताकि तुमचा करता अर तुमचा परिवार करता भोजन चो प्रबंध करूक सकेंय।”

जब युसुफ चा भाई घरे वापस इला अर आपला बाप याकूब के सांगला कि युसुफ एभे बल जिवतेय आसेय तो हुन खुबेय हरीक होऊ रेहेय।

हालाँकि याकूब एक डोकरो मानेय रेहेय तब भी हुन आपला पूरा परिवार संग मिस्रीयें गेला,। अर हुता बसला। याकूब चा मरता चा पुरहे, हुन आपला अर कड़हांग आशीषित करलो।

वाचा चो हुन प्रतिज्ञा जो परमेश्वर अब्राहम के करु रेहेय हुन इसहाक लग अर हूनाचो पासे याकूब, अर हूनाचा पासे हूनाच बारह कड़हांग चा वंशज इस्राएल चा बारह गोत्र बनला।