9. परमेशवर मुसाक कोकिदा हेयं

यूसुफ चा मरला चा पासे हूनाचा सब रिश्तेदार मिस्रयें बसला। हुन अर हूनाचा वंशज कई साल तक मिस्रीयें रहत अर हूनीईता खुबेय कड़हा जनम करला। हूनी इस्राएली कहलावला।

कई सौ साल चा बाद, इस्राएलियांग चो संख्या खुबेय बड़लो। अर मिस्री मानेय एभे या बात करता आभारी ईरहत कि हूनाग चो सहायता करूक यूसुफ खुबेय कुछ करू रेहेय। हूनी इस्राएलियांग भय होला कांयकी हुन संख्याये हूनी खुबेय ज्यादा रहत। याहायकरता हुन समय मिस्र शासन करयो फिरौन इस्राएलियांग मिस्रीयांग चा दास बनाव दिलो।

मिस्रीया इस्राएलियांग खुबेय इमारत अर एथा तक कि कई नगरांग बनावता करता मजबूर करलो। हुन कठिन परिश्रम हूनांग चा जीवन के खुबेय दुःख दायी बनाव दिलो, तबले परमेश्वर हूनांग आशीष दिलो अर हूनांग चा तेव ज्यादा कड़हा जनम होला।

फिरौन देखलो कि इस्राएलियांग खुबेय कड़हा होते रेहेय, याहायकरता हुन आपला मानेयांग इस्राएलियांग चा सपा लेकरु कड़हाग नील नदीये फिगुन मारता चो आदेश दिलो।

एक विशेष इस्राएली बायली एक लेका कड़हाक जनम दिली। हुन हूनाचो मानस जितलो हूनाचो से होलो हुन कड़हाक लुकाऊ ठोवला।

जब हुन लेका चा याया बाबा हूनाक अऊर ज्यादा लुकाक ईसकला, तब हूनी ईता हूनाक मारता लगले वांचता करता एक तवरती इति टुकलीये नील नदी चा धडीयें सरंडकूडो चा मंझते साडू दिला। हूनाचो बड़े बहीन यो देखता करता हूनाचा निगरानी करेय कि हूनाचा संग कांय होईद।

फिरौन ची बेटी हुन टुकलीक देखुन हूनाचा भीतरे झोलुन देखली। जब हुन एकला कड़हाक देखली तब हुन आपला कड़हाचा रुपे धरली। हुन एकली इस्राएलि बायलिक हूनाक दूध पियावता करता कामे रखली, बिना यो जानलो कि हुन कड़हा चो वास्तविक माता रेहेय। जब हुन कड़हो ईतलो बड़े होलो कि अब हूनाक आपली माईती चो दूध चो आवश्कता नाहि, तब हुन फिरौन ची बेटी लग हूनाक वापस करू दिली हूना चो नाव मूसा आय।

एक दिन, जब मूसा बड़े होलो, तब हुन देखलो कि एक मिस्र एक इस्राएलिक पेटते रेहेय। मूसा आपला संगवारिक इस्राएली के वांचावता चो कोशिश करलो।

जब मूसा सोचलो की हूनाक कोंहु ईदेखत तबहुन मिस्रीक मारू दिलो अर हूनाक लास के गाढ़ुदिलो। तबले मूसा जो करू रेहेय हूनाक कोनतो देखू रेहेय।

फिरौन के मालूम होलो कि मूसा कांय करलो हाय। हुन हूनाक मारताचो कोशिश करलो, तबले मूसा मिस्र ले बादोडायें परावलो। फिरौन चा सैनिक हूनाक हूता खोजुक ईसकला।

मिस्र ले दूर बादोडायें मूसा एक चरवाहो बनू रेहेय। हुन हूता एकली बायलीक बिहाव करलो अर दूय झन कड़हा जनम करलो।

मूसा आपला सतरा चा भेडांगचा झुण्ड के देख रेख करीयो आय। एक दिन, हुन एक डसता रुख के देखलो जो भस्म ईहोलोय डसते रेहेय। हुन देखता करता हुन रुख चा लघेय गेलो। जब हुन हुन खुबेय लघेय रेहेय। तब परमेश्वर हूनाक गोठयावलो। हुन बल्लो, “हे मूसा, तुचा बूट हेडूदेस। तुय एक पवित्र जघायें उभलीसा।”

परमेश्वर बल्लो, “मैं आपला मनेयांग चा दूख: देखलेहायं। मैं तुक फिरौन लग पठाईन ताकि तुय इस्राएलिया मिस्र चा दासत्वे ले निकराउन आनसे। मैं हूनांग कनान देश देईन, हुन देश चो मैं अब्राहम, इसहाक अर याकूब के प्रतिज्ञा करले हांय।”

मूसा समजावलो, “अगर मानेय जानुक चाह्धात कि मक कोन पठावलो हाय तो मै कायं बलिन ? “परमेश्वर बल्लो, “जो मै यो मै आयं। हुन बल्लो, मैं आयं मक तुमचालंग पठावलो हेय। ’हूनांग यो घला बल, ‘मैं तुमचा पूर्वज अब्राहम, इसहाक अर याकूब चो परमेश्वर यहोवा आयं। ’माचो नाव सदा चो आयं।”

मूसा भय होवयो आयं अर फिरौन लग जाऊक ईचाहेय कायंकी हुन सोचलो कि हुन अच्छा बलुक इसकिद, याहायकरता परमेश्वर मूसा चा भाई, हारून, के हूनाचो सहायता करुक पठावलो।