20. बंदीम एने वापस आवणो

इस्राएल राज्य एने यहूदा राज्य दुय भी बोगवानान विरुद्ध पाप केऱ्या। ता ता वायदाह तोड देना जो ता बोगवानान हेरी सीनाय बोयडा पोर केरील एता। बोगवान ताहा पश्चाताप केरावने एने पोशो तान तान आराधना केरणेन चेतावणी आपणेन भविष्यवक्ताह मोकल्यो, पुण ता तान वातुह नाकार देना।

ओवतो बोगवान ताहा तान दुश्मना ताहा नाश केरणेन मोदत करणे द्वारा ता दुय भी राज्या दण्ड आप्यो। अश्शूर एक दिहरो देश एतो तो जुलुम ताकेतपोर एय जायील एतो।ता दिहरी देशा पोर किव नाह केरताला। ता आवीन इस्राएल ने राज्याह नाश केर देना। अश्शूरि आवीन इस्राएल ने जुलुम जाणाह मार देना, जो पोटी ताः लुट लेदा, एने देश मोक्ताच भागाह हेल्गाड देना।

अश्शूरि सोब मुखीह, मालदार माणहाह,एने ओहला माणहे जा किमती वोस्तु बोणावताला एकठा केरीन अश्शूर देश लीजात रेना। इस्राएल माय फक्त काहिक गरीब इस्राएली वोचना।

ओवता अश्शूरी माणहे ता देशांम रेणे केरता दिहरा देशान माणहाह लीन आवा। ता दिहरा देशान माणहे ता हेयराह पोशा बोनाव्या। जा इस्राएली ताहरी वोचील एता ता वाराड केऱ्या। ता माणहान वोच सामरी केवाना।

यहूदान राज्य ने माणहे देख्या का किहिक बोगवान ता पोर विश्वास नाह करणे से एने तान वात नाह मानणे से इस्राएल ने राज्यह दण्ड आप्यो। पुण ति भी ता कनान ने बोगवानान मूर्तिन बोक्ती केरणे सोडया नाह की उपासना की। बोगवान ताह चेतावणी आपणेन भविष्यवक्ता मोकल्यो तीभी ता नाह मान्या,पुण ता होमल्या नाह।

कोमी ते कोमी 100 वोर्ह्या बाद अश्शूरि इस्राएल ने राज्यहा नाश केर देना। बोगवान बेबीलोन ने राजा, नबूकदनेस्सराह यहूदान राज्यपोर लेडायी केणेन मोकल्यो। बेबीलोन एक ताकेतवोर देश एतो। यहूदान राजा नबूकदनेस्सरान दास बोणनेण एने जुलुम धेन देर वोरही आपणेन तियार एय गियो।

काही वोर्ह्या बाद, यहूदानब राजा न बेबीलोनान विरोध केऱ्यो। ओवतो बेबीलोनि पोशो आवीन यहूदान राज्य पोर लेडायी केर दिनो। ता यरूशलेम ने हेयराह ताबाम केर लेदा, मंदिराह नाश केर देना, एने हेयराह एने मंदिरान खजाननाह लूट ली गिया।

विरोध केरणेन कारण यहूदान राजाह दण्ड आपणेन केरता, नबूकदनेस्सरान सैनिक राजान सोराह तान सामने मार टाक्या एने ताहा आंधलो केर देना। ता बाद, ता राजाह लीन गिया का तो बेबीलोन ने जेलीम मोर जाय।

नबूकदनेस्सर एने तान सेना यहूदान राज्य आखा माणहाह बेबीलोन लीन गिया, फक्त आखाम रीन गरीब माणहाह मेल गिया का ता खेताम कामायी केरती।ज्या टायमाह बोनदवायी कियील हि जामाय बोगवानान माणहे वायदान देश माय रीन निकलेण पोडील एतो।

भोले ही बोगवान आपणा माणहाह तान पापान केरता बोनदिवायीम ली जाणे द्वारा दण्ड आप्यो, तेभी ताहा एने आपणा वायदाह नाह विहऱ्यो। बोगवान आपणा माणहा पोर नेजर मेलतालो एने तान भविष्यवक्ता ने द्वारा ता हेरी वात केरती रेनो। तो ताहा वायदो केऱ्यो का सत्तर वोर्ह्या बाद, ता पोशा वायदान देशाम जाती।

कोमी ते कोमी सत्तर वोर्ह्या बाद, फारस ने राजा कुस्रू बेबीलोनाह आरवी देणो, केरीन बेबीलोन ने राज्यह रीन फारस ने राज्य मोक्ताच देशा पोर राज्य केऱ्यो। इस्राएली माणहे एवी यहुदी केवाताला।तामाय रीन मोकताच जाणान पुरो जीवन बेबीलोन मायच जात रेणो। फक्त थोडाच डावाला यहूदिह यहूदा देश एर एतो।

फारसी माणहे जुलुम ताकेतवोर एता, पुण ता तान जीकील माणहा पोर दया केरताला। फारसी माणहान राजा बोणणेन थोडाच टायमा बाद, कुस्रू एक आदेश आप्यो का जो भी यहूदी यहूदा पोशो जाण्यो एय, तो फारस रीन पोशो यहूदा जाय सकीह,। तो ताह मंदिराह बोणावणे धेन भी आप्यो। ओवता बोनदवायीन सत्तर वोर्ह्या बाद यहूदिन एक आत्योच टूलो यहूदा माय यरूशलेमाम आवा।

जेवी ता माणहे यरूशलेम माय पोचना ता मंदिराह एने हेयरान चार उखर वाला भितडाह पोशा बोणाव्या। फारसी माणहे एवी भी ता पोर राज्य केरताला पुण ता एक वार पोशा वायदान देशाम रेताला एने मंदिर माय आराधना केरताला।