3. वादुण पाणी

मोक्ताच समया बाद, केलीम जुलुम माणहे रेणे लागा। ता जुलुम पापी एय जायील एता। ता ओला पापी एय जायील एता का बोगवान वादुण पाणी केरिन पुरी केलीह नाश केरणेन ठेराव लेदु।

पुण बोगवान नूह से खुश एतो। तो पापी माणहाम रेणार एक धर्मी माणुह एतो। बोगवान नूहाह केयो का तो एक मोठलो वादुण पाणी पाडण्या हि।केरिन, बोगवान नूहाह एक नाव बोणावने केयो।

बोगवान नूहाह कोमी ते कोमी 140 मीटर लांबी, 23 मीटर चौवडी एने 13.5 मीटर उची नाव बोणावणे केयो। नूहाह नाव लकडा केरिन बोनावणू एतो एने ति नावी तीन ताली, जुलुम खोली, एक शत एने खिडकी बोणावणो एतो। ती नाव नूह, तान परिवार, एने बुईन आखी जातीन जेनवाराह वादुण पाणी से वोचाडीन मेली।

नूह बोगवानान वात मान्यो। नूह एने तान सोरा जोहली बोगवान कियील तोहली नाव बोण्याव्या। ति नाव जुलुम मोठी एती केरीन तीह बोणावणेन जुलुम साल लागा। नूह माणहाह आवणे वाला वादून पाणीन बारामाय केया एने ताह बोगवानान उखेर फिरणे केया, पुण ता विश्वास नाह केऱ्या।

बोगवान नूह एने तान परिवाराह तान एने जेनवारान केरता खाणो टूलु करणेन आज्ञा आप्यो। जेवी आखो एय गियो, ते बोगवान नूहाह केयो ज्यो टायीम तान लाडी,तान तीन सोरा ताना तीन लाड्यो-आखा मिलिन आठ जाणाह नाविम जाणेन।

बोगवान आखा जातीन जेनवार, चिडान दुय दुय जोडपाह नुहा फाय मोकल्यो कि ता नावीम जाती एने वादुण पाणी से वोची। बोगवान आखा जातीन जेनवारे जाह बली चेडावताला तान सात सात जोडपा ताफाय मोकल्यो। जेवी ता आखा नाव पोच गिया ते स्वातहा बोगवान ति नावीन बायणो बोंद केर देनो।

तेवी पाणी पोडने चालू एनो, एने पाणी पोडतीन,पोडतीच गियो। चालीह दिह एने चालीह रात पाणी पोडतीच रीनो। केलीन आखी वोस्तु, उचा से उचा बोयडा भी पाणीम बुड गीया।

बुईपोर रेणारे आखा जीव मोर गीया,ता जेनवारे एने माणहाह सोडीन जा नावीम एता। ति नावी पाण्यापोर तेरंगती रेनी एने नाविम वाली आखी वोस्तु बुडने से वोच गियी।

पाणी रोकाय जाणे बाद, पाच मोयना वोर नाव पाणी पोर तेरंगती रेनी, एने तीटायमे वोर पाणी कोम एणे लागो| तेवी एक दिह ति नाव एक बोडान चुटी जायीन टिकी, पुण आखी केलीम उंजू भी पाणी एतो। तीन मोयना बाद, बोयडान चुटी देखाणे लागी।

ओवतो चालीह दिह्या बाद, नूह एक कागलाह बाहेर मोकल्यो ज्यो देखणे का पाणी आटनो कि नाह। तो कागलो हुकाली बुय होदणे न्या एने ता उडती रेनो, पुण ताह जागो नाह जुडनो।

ओवतो पोशो नूह एक कबूतरी बाहेर मोकल्यो। पुण तीह भी हुकाली बुय नाह सापडनी, केरीन ती नुहा फाय वापस आव गीयी। एक हफ्ता बाद तो ती कबूतरीह पोशो मोक्ल्यो, एने ति जैतून झाडान एक डाली लीन पोशी आवी। पाणी आट तालो, एने खेड पोशो उगणे लागील एतो।

नूह एक हफ्ता वोर वाट जोव्यो एने तिसरी वार ति कबूतरी बाहेर मोकल्यो। जी वार, तिह रोकाणे जागो जुड गियो एने ति वापस नाह आवी। पाणी आटतालो।

दुय मोयना बाद बोगवान नूहाह केयो, "एवि तु तार परिवार एने आखा जेनवार नावीम रिन निकली जावो। जुलुम होवटा सोरो पाऱ्या पोयदा केरो एने केलीह बोर देवू।" ओवतो नूह तान परिवार नावीम रिन बाहेर निकली आवा।

नूह नावीम रिन बाहेर आवणे बाद, तो एक वेदी बोणाव्यो एने बली केरणारा आखा जातीन जेनवाराम रीन ठोळाकान बली चेळाव्यो। बोगवान ति बली से खुश एनो एने नूहान परिवाराह आशीश आप्यो।

बोगवान केयो, " मी अवि वायदो केरथु का माणहान खराब कामान कारण मी पोशो केदीच पुरी केलीह श्राप नेय आपु एने वादुण पाणी से केलीह नाश नेय केरू, माणुह आत्योच रिन पापी ही तीभी।

ओवतो बोगवान तान वायदान रूपमा पेहलो बाण बोनाव्यो। जेवी केदी वादलाम बाण देखाय बोगवान एर केरी का काय तो वायदो केरील एतो एने तिहीच तान माणहा भी एर केरती।