43. कलीसियान सुरुवात इथी

यीशुन स्वर्गाम जाणेन बाद, चेला यरूशलेमायच रेना का जीही ताह यीशु आदेश आपील एतो। ताहरी वाला विश्वासी माणहा ताहरी प्रार्थना एकठा एताला।

दर वोरही, फसह ने तीवारान 50 दिह्यान बाद, यहूदी माणहा पिन्तेकुस्त नावान एक महत्वान दिह मानताला। पिन्तेकुस्त ने दिह तो टायम एतो जेवी यहूदी माणहा गोवान कटायीह मानताला। आखा केलीम रीन यहूदी माणहे पिन्तेकुस्त ने दिहाह केरणेन केरता यरूशलेम आवताला। जी वोरही, पिन्तेकुस्त ने दिह यीशुन स्वर्गाम जाणेन कोमी ते कोमी एक हफ्तान बाद आयील एतो।

जी टायमे आखा विश्वासी एकठा एता, ते ता घेराम जाहरी ता एता उचकाहुच जोरेच वारो आवो।एने आकठान गेट देखाणार काय तीभी आखा विश्वासीन मुंडापोर देखानो। ता आखा पवित्र आत्मा से भोराय गिया एने ता अन्य भाषाम बोगवानान स्तुति केऱ्या। ज्यू भाषा त्यु एत्यु जीह पवित्र आत्मा ताह बोलाडताली।

जेवी यरूशलेम माय रेणारा माणहा ता आवाजाह होमल्या, तेवी ता गेर्दीम टुलू एयीन देखने आवा का काय एणे बाज रेनोह। ता विश्वावासीह बोगवानान द्वारा किरील मोठा-मोठा कामान पोरचार केरताला होमल्या। ता बोंगलाय रीयील एता का ता कामाह ताचने भाषाम होमेलताल।

न्या मायरीन काहिक माणहा केया का ता चेला नशाम हेते। पुण पतरस उभ रेनो एने केयो, "मारी वात होमलो! ज्या नशाम नाह सोथा! पुण, जो तुमु देखतेह ज्यो तोच हि जो योएल भविष्यवक्ता कियील एतो का एय: बोगवान केयो, 'आखरी दिह्याम,मी मारो आत्मा मोकलुह।'"

हे इस्राएली माणहा, यीशु एक ओहलो माणुह एतो जो ज्यो देखाडणेन केरता का तो कुण एतो जुलुम चमत्कार किरील एतो। तो बोगवानान सामर्थ से जुलुम मोठा कामे किरील एतो। तुमु ज्यो जाणतेह, काहाकाय तुमु भी ज्या कामे देखील एता।पुण तुमु ताह क्रूस पोर चढ़ाव देना!

यीशु मोर गियो पुण बोगवाना ताह मोरील मायरीन जीवतालु केर देनो। ज्यो ति वातुह पुरो केऱ्या जिह एक भविष्यवक्ता लिखील एतो: 'तू आपणा पवित्र जाणाह माहणाह किडाणे नेय दीही।' आमु गवाह हेते का बोगवान यीशुह पोशो जीवतालु केर दियील हि।

बोगवाना आबुक एवी यीशुह तान डाखरी उगे बोहाडीन ताह आदर आपील हि। एने यीशु आपणे केरता पवित्र आत्माह मोलील हि जीही का तो वायदो किरील एतो का तो मोकली। पवित्र आत्माच ज्या कामाह किरीह जाह तुमु देखतेह एने होमेलतेह।

तुमु ता माणहा, यीशुह क्रूस पोर चढ़ाव देना। पुण खेरीच जाण लिवो का बोगवान यीशुह आखी वोस्तु पोर प्रभु एने मसीह दुय भी ठहरायील हि!

पतरसाह होमेलणार माणहे तान द्वारा कियील वात से मायरीन आल जायील एता। केरीन ता पतरस एने चेलाह फुस्या, "हे बायहो,आमु एवी काय करणे जुवी?"

पतरस ताह उत्तर आप्यो, "तुमु मायरीन हर एक जाण आपणा पापान केरता पश्चाताप किरो का बोगवान तुमरा पापान क्षमा केरी,एने यीशु मसीह ने नावे बपतिस्मा लेय। तेवी तो तुमूह वरदानान रूपमाय पवित्र आत्मा भी आपी।"

पतरस जो केयो ता पोर कोमी ते कोमी 3,000 माणहा विश्वास केऱ्या एने यीशुन चेला बोण गिया। ता ने बाप्तीस्मा लेदा एने यरूशलेम ने कलीसियान हिस्सा बोण गिया।

जेती चेला ताह हिकाडताला ते विश्वासी कायम होमेलताला। ता मिलाया केरताला एने एकठा खाताला, एने ता एक दिहरान केरता प्रार्थना केरताला।ता मिलिन बोगवानान स्तुति केरताला एने जो काय भी ताफाय एतो ता एक दिहरा हेरी वाट ताला। हेरान आखा माणहा तान केरता हाजो विचार केरतालो। दाडीन दिह, जादा से जादा माणहा विश्वासी बोणती गिया।