۳۶- عوض بُبُدَنِ صورتِ مسیح

رویی عیسی یه نفر از شاگردونِش یَنی پترس، یعقوب و یوحنا شارگیَ و بُشتِندَ تا دیم قُلِّه کوه دعا کِرِندَ. (یوحنایی کُ عیساش تعمید شادا، ایبی نِفَر بُ.)

وَقتِ دعا کَردَن صورت عیسی خیلی نورانی مثله خورشید و پیرَنِش عین نور سفید آبُ. نَندِقَر سفید گِردا کُ دیم زِمین مثل نُ اَی پیدا نَبُ.

نُوقتی موسی و ایلیای نبی ظاهر گِردادِندَ. نِ مِردِگَل صدها سال قَبلِ نِ دیم زِمین زندگی شُ اَکَ. نُمین هادِ عیسی دربارِ مرگِش کُ دیم اورشلیم د اتفاق کیمی افتاد، صحبتشون شَکَ.

وقتی کُ موسی ک ایلیا هادِ عیسی گفتگو شُ اَکَ، پترس ب عیسی بَشوات: «چِ خیبَ کُ هَمَ اَندِهُمَ. اجازَ هادَ سه سایبون بُساجُمَ؛ ایدونِ تورا و ایدونِ موسی را و ایدونِ ایلیا را.» پترس نَشَزونا چی چی اَواجِ.

هَنی دَمِ پترس تُموم نُبُدِ بُ کُ اَوری درخشان تَ بَمَ و نُمین دَرخوش گیَت و نِدایی از درونِ نُ بَراَمَ کُ: «نِهَ پیرِ عزیزِمَ کُ خیلی از نُ خشنود و راضی هُم. ب سخن نُ گوش کِریَ.» سه شاگِرد از ترس د دیم زِمین کَتِندَ.

عیسی دَستِش دیم نُمین ناد و بَشوات: «پابیَ و نِتَرسیَ.» وقتی کُ نُمین به هر دیم اِسِّواشون کَ، غیر عیسی آدِم بی نینِ دِ نَشُن دی.

عیسی و سه شاگِرد ب تَهِ کوه واگِردادِندَ. نُوقتی عیسی به شاگِردونِش بُوات: «الان نُ چی کُ بَدُندی ب هِچکین نُواجیَ. مَ خیلی زی بَمیرُم ک دوبارَ جیدَ کیمی اَگِردُم. بَدِ نُ اَتونیَ ب بِقیَ بُواجیَ کُ چی چی بَدُندیدَ.»