20. पाडाव अण छोडानु

इस्राएलनु राज्य अन यहुदानु राज्य य बहयेवये देवना विरुद्ध पाप करू। देवये हिवनेती सिनाया पहाड पर करेलो वादो तोडयो, देवये हिवन पस्तावनु अन देवकन जानु म्हणनीन भविष्य बोलनेवाला मोकल्या, पन हिवये अज्ञासमजान कोणी बोल्यु।

हिनापायती देवये यो बहयेव राज्य न शिक्षा दीदी, हिवना दुश्मन न हिवन नाश करा दीदो। अरशूर आ खराब अन ताखतवर राष्ट्र ये इस्राएलनो खतम करू, अश्शूर लोकुये इस्राएलना घना लोकुन जीवता माय्या। महाग वस्तूनी लटालूट करी अन देशनो घनो सारी भाग बालौ डाल्यो।

अश्शुरी लोकये सबन नेतान शावकार अन चागला कारागिरन एक केड करीन आपना देशम लि गया। फक्त घना गरिब इस्राएल लोक जो झगडाम मय्या कोणी। योच इस्राएलम शिल्लक रहया।

तध अश्शुरा ये इस्राएल राह्नेवाला ठीकान्म दुसरा राष्ट्र ना लोकुन वस्ती कराण लाया। दुसरा राष्ट्रना खतम हुयेला शहरनी डबलती बांधकाम करू। अन इस्राएल वाला बाई ती याहा करू इस्राएलवाला जातमायती जो लोकुये दुसरा राष्ट्रवालाती याहा कय्यो हिवन शोमरोनवाला बोलाम आयु।

यहुदा राज्य म लोकुये देख्यु क, इस्राएल राज्य म लोकुन बिना विश्वासना अन वात कोणी आयक्याना पायती दैवये किमतरेती शासण करी राख्यु। पण तरीपन हिवये मूर्तीपूजाकरी अन कनानी देवनी बी उपास करू, देवये इशारो देवाना वास्तर वातपोचावनेवाला मोकल्या। पण हिवये हिवनु आयकयू कोणी।

तरी 100 वरसनाबाद जध अश्शुराये इस्राएल राज्य नो खतम करू, तध देवये यहुदाना राज्य पर हामलो करनावास्तर नबूखद्रेस्सर आ बाबेलना राजा न मोकल्यु। बाबेल यो एक शक्तिशाली राष्ट्र थु, यहुदानो राजो नबूखद्रेस्सर नो सेवा करनेवालो तयार हुयो। अन हर एक वरस घना सारा पैसा देवानावास्तर तयार हुया।

पण काही वर्सनाबाद यहुदाना राजाये बाबेल विरुध्द बंड पुकाज्यु। म्हणीन बाबेलना लोकुये वापीस आयीन यहुदाना राज्य पर चढाई करी। हिवये यरुशलेम शहर ताबा म लिदू, मन्दिरना खतम करू अन शहरम अन मंदिरम सबन संपत्ती लीगया।

यहुदाना राजाना आ बंडखोरपना नापायती शासन म्हणीन नबूखद्रेस्सरना सैनिकये यहुदाना राजाना लडकानो हीना समोर मारी डाल्यु अन यहुदाना राजाना डोळा फोडीन दिन आधु करू। हिनाबाद हिवये हिवन मरानावास्तर बाबेल याहा तुरुगम मडायु।

नबूखद्रेस्सर अन हिना सैनिकये यहुदाना राज्य म कन्ह कन्ह सबन लोकुये बाबेल म लायु फक्त घना गरीब इस्राएल लोकुनच खेतर करानावास्तर पाछल मडायु। योच काळ म जध देवना लोकून वचन देणारा देश छोडीन जावान जबरदस्ती कराय आयी दिन पाडाव-हदपारी आम बोलच।

जरी देवये आपना लोकुना हिना पापना पायती हिना पाडाव हुवा दिदो तरिपन यों हिवन अन हिवये दि देलु वचन भुल्यु कोणी। देवनी आपना लोकुपर चागली नजर थी अन वातपोचावने वाला ती यों हिनेती बोलतो यो हिये हिवन विश्वास दिदो क, सत्तर वरसना बाद यो हिवना डबल वचन देनेवाला देश म लि जाशेन।

हिनाबाद तरी सत्तर वरसना बाद पारसाराजो कोरेश दिये बाबेलना हरायु अन बाबेलना राजाना घर पारसानु राज्य आयु इस्राएल वाला लोक हाक्या यहूदी आ नामती ओलखाम आवान लोग्या। आन हिनामायती घना लोक आपना जिन्दगी भर बाबेल मच रह्या। फक्त थोडासा जास्त वयना यहुधावन यहूदी राज्यना विश्वास थो।

पारशानु राज्य ताकतवर थु, पन आपये हरायेला लोकुन बद्दल यो द्या करनेवाला था। कोरेश पारसानो राजो हुयानाबाद तधच हिये फर्मान काढयु, कं जर केहये यहुदी यहुदाम वापस जीवान देखुकर तो दिन यीम करानी मंजुरी छ। हिये मंदिरनु डबल ती बांधकाम करानावास्तर पैशा बी पुराया, आय तरेती सत्तर वरसनो हदपारी खतम करीन यहुदानी नांन्हो गर यहुदाम यरुशलेमन आया।

यरुशलेमन आयानाबाद हिवये मंदिरनी डबल ती बांधकाम करू अन शहरना वेशी डबल यो रव्हान लाग्या अ मंदिरम देवणी उपास करान लाग्या।