29. निर्दयी दासो कथा

इच़ा ध्याड़ा, पतरसे यीशुरांग रुकतु, “हे स्वामी, गिबि घ्यांञो काकाबि अयों फेरा माफ लज़ि लेपोतो अपेल दोई ग्यु खिलाफ पाप लोतो? चि ञिंज फेरा तचिया?” यीशुज़ि कुड़ि,” ञिंज फेरा मशु, पर ञिंजो भोन्दे शुम्मञिंज़ो सा फेरा!” दिऊ धुन्ना, यिशु मतलब शु कि हेन्दिंग हमेशा माफ लेई जुस। दोऊ थल यीशुज़ि दि कथा कान्डि।

यीशुज़ि कुड़ि, “परमेश्वरो राज्य इच़ा राजाऊ छो शुबि आच़ि एनो गुलामो दोरच़ि हिसाब लेपच़िमि तरे। दोऊ इच़ा गुलाम 200000 वर्षो मज़दूरिऊ थल्ज़ि इच़ा मोट्टे कर्ज़ो कर्ज़दार तोई।”

पर दु दासे एनो कर्ज़ चुकाच़ि मारति, दोऊ थल्ज़ि राजाज़ि कुड़ि, “दिऊ ऋण चुकाच़िम थल्ज़ि दि गांग्मिबि ए दिऊ टाबरतिंङ दास बनाके लांङे च़रतुईं।”

“दु गुलामे राजाऊ तुईच़ि एनो पुशतु टोख्टे बांग्ज़ा कुड़ि, ‘ज़ी शबस गिबि फोआर ध्याड़ा रोऊं, दांङ गे घ्यांञो कर्ज़ो भुगतान ले च़रपोग।” राज़ाज़ि दासो टोख्ठे दया लरि, दिऊ थल्ज़ि दोई दोऊ बत्ते कर्ज़ बि माफ लेकेरि दांङ दोबि इबि रेईं।”

“पर अपेल दु गुलाम राजाउ कचरिंगज़ि धाक्तिखा इन्जा, दांङ दोबि दोऊ इच़ा साथी गुलाम दोया आऊं दु दोऊ पी ला ज़ु मज़दूरिऊ कर्ज़दार तोई। दु दासे एनो साथि गुलामबि च़ुमे केरि, ‘दांङ कुड़ि, ‘आंऊ कनु टोखठे ग्यु कर्ज़ तो गिबि दोऊ भुगतान लोऊ!”

“दु साथि गुलामे पुशटु भारे दचे कुड़ि, ‘ज़ि शबसे गैरांग साथे धीरज धरेक्तु, दांङ गे घ्यांङो कर्ज़ो बत्ते रकमो भुगतान ले च़रपोग।’ पर दिऊ भुन्दे, दु गुलामे एनो साथि गुलाम बी जेलखानो अन्दरेग केचे केरि अपेल तचे कि दोई दु कर्ज़ो भुगतान ले मकेतु।”

“चि-चि शुत्ते दोबि मिना गुलामच़ि तांङतेर दांग दोरे मास्स परेशान शुईरे। दोरे राजाउ कचरिंग इलिरे दांङ दोबि बत्तेधिर कान्डिरे।”

“राजाज़ि दु गुलामबि बुलाके कुड़ि, ‘हे दुष्ट गुलामा! गे कनु कर्ज़बि दोऊ थल्ज़ि माफ लत्तेग छेई कुचे केई गेरांग ज़िशबस लत्तेन। कनिंग ल ध्वांए लज़ि जुंशि तोई।’ राजाबि धोंण रोष अन्जि तोई कि दोई दोबि जेलखानांङ केचे केरि अपेल तचे कि दोई एनो बत्ते कर्ज़ो भुगतान ले मकेओतो।”

दांङ यीशुज़ि कुड़ि, “ग्यु स्वर्गांग तोचि बाज़ि केतु बिचांग ज़ि इच़ा-इच़ा राङ साथे ध्यांए लोतो अगर केच़ि केन्दु काकाबि सेमज़ि माफ मलरीं।”