30. यीशुज़ि ङां हज़ार मीतिंग बागत रन्दो

यीशुई एनो जानकारतिंङ प्रचार लज़िमिए शिक्षा रन्ड्रिमि थल्ज़ि मास्स शता-शता नगरङ च़रचतु। अपेल दोरे दोर याच़िरे आंरतिंग यीशु तोई दोच़ि दोबि कान्डिरे कि दोच़ि चि लत्तोर। दाङ यीशुई दोतिंग झीलो नुरेच़ि दोरांग साथे इच़ा शान्त ठाड़िरिंग इन्जे फोआर वक्त आराम लज़िम थल्ज़ि कुत्तो। दाङ दोरे इच़ा नावो टोख्टे लोक्सा झीलो नुरेच़ि अच़ा इलिरे।

पर दोरतिग मास्स ध्‍यांह ठ्रो मीरे तोईरे आंऊ दोच़ि यीशु ए दोऊ च़ेलारेतिंग किशतिंग इबि ताङतेर। दि मीरे दोतु बे तूखा झीलो नुरेच़ि इबिमि थल्ज़ि झीलो मुखे-मुखे पोख्तिरे। दाङ अपेल यीशुए दोऊ च़ेलारे पिचतोरे दाङ मास्स मीरे छ्रोक्कन शुचे दोतु थल्ज़ि रुमज़ा तोइरे।

दु भीड़ांग मेच़मितिंग ए काटुतिंग मिके मे 5000 बे मास्स गांग्मिरे तोईरे। यीशुज़ि दु मीतु टोखटे बड़ा दया लरि। यीशुज़ु थल्ज़ि दु मीरे पौहाल मे त्रैंईंतु छो तोईरे। दोऊ थल्ज़ि दोई दोतिंग शिक्षा रणीं आई दोतु बिचांग आंऊ मीरे टेचि तोईरे दोतिंग ठीक लरि।

ञंयोखोलच़िआर, च़ेलारेच़ि यीशुरांग कुड़िरे, “द झाड़ा शुचे इन्जा आई च़म्बे नगर ल मा। द दि मीतिंग बिदा लोऊ ताकि दोचि इन्जे ज़ेईमि थल्ज़ि छा लेप्चि तरफोरे।”

पर यीशुज़ि च़ेलारेतांग कुड़ि, “केच़ि दितिंग ज़ेईमि थल्ज़ि छा रांईं!” दोच़ि जवाब रेईंरे, “हेन्जि ध्यांह छना लेई तरछि? हेन्दु कचरिंग जेत्ते ञाँ रोटि ए जुट क्वाचि मच्छ़ तो।”

यीशुज़ि एनो चेलारेतांग कुड़ि कि दोच़ि मीतु झुण्डतिंग शांगज़ु टोख्टे ङिन्ज़ो साज़ु झुण्डरिंग बांगज़िरिंग कूईं।

दांङ यीशुज़ि ञां रोटिए जुट मच्छबि लेप्चे स्वर्गो आखा खणीं, दांङ दु बागतो थल्ज़ि परमेश्वरो शबस लरि।

दाङ यीशुज़ि रोटिए मच्छबि खान्नि-खान्नि लरि। दोई मीतिंग रन्ड्रिम थल्ज़ि एनो च़ेलारेतिंग दु खान्निरे रैं केरि। चेलारेच़ि दु बागत फावा लेइरे, आई दु अपेला मयोसु! दोरे बत्ते ज़ज़ा कशे इलिरे।

दोऊ थल्ल, च़ेलारेच़ि दु बागतबि ठ्रोक्कन लरिरे आंऊ दु ज़सि मतोई दाङ दु सनि टोकरीतिंग पिंगजिम थल्ज़ि योशि तोई! दु बत्ते बागत दु ङा रोटि ए जुट मच्छो धुन्ना आन्जि तोई।