3. डढ़ो अपि
मस्स ध्याड़ो थल, संसारंग मास्स मीरे बगज़तरै। दोरे मस्स ग्यशी ए बिगड़ेकि तोइरे। दि धोंण माज़ी तोइ कि परमेश्वरै दि फैसला लरि कि इच़ा मोट्टे डाढ़ हन्जे पूरे संसारो नाश लेई क्योग।
पर परमेश्वर नूहरंग खुश तोई। दु इचा धर्मी मी तोई, अरि दुष्ट मीतु बिचांग बांगज़ि तोई। परमेश्वरै नूहबि कन्जतु कि दौई इच़ा मस्स मोट्टे डढ़ हापिमी ततु। दियु वजह ज़ी, दोई नूहबि इच़ा मोट्टे किश्ती बणाचीरिंग कुड़ी।
परमेश्वरै नूहबि इच़ा समुन्द्रो जहाज़ बनाट्रिरिंग कुत्तो अऊं लगभग 140 मीटर लमै, 23मीटर चौड़ा ए 13.5 मीटर ऊँचा शोतो। नूहबि दु सिंगज़ू बणाचीमी तोइ दांङ दोरिंग शुमु तल,मस्स कमरारे, इच़ा लंङ ए इच़ा कल्ल बणाट्रिमी तौइ। दु समुन्द्रो जहाज़े नूह ए दौउ टवर ए धरतीउ बत्ते पाटी जानवरतिंग दू डाढ़रिंगज़ी सोठेकि तोओतो।
नूहज़ी परमेश्वरो गप्पा मनेकति। दु ए दोउ शुमु योरेची ध्वाहंए ठ्रो जहाज़ बनातीरे छना परमेश्वरै कुत्ते। छेई कुच्चे दु जहाज़ मस्स मोड़े तोई दाङ दोबि बणाचीरिंग मस्स वर्ष लेति। नूहज़ी मीतिंग अन्ज़ाड़ डाढ़ो पाटि कन्जे केते, दोई दोतिंग परमेश्वरोहाखा किरज़ीरिंग कुड़ी, पर दौच़ि दौऊ टोखठे विश्वास मलरिरे।
परमेश्वरे नूह ए दौउ टवरबि एनतिंग ए जानवरतु थलज़ी ला बागत ठ्रोक्कन लेइमी आदेश रणी। अपेल बत्तेधिर तैयार शुत्ते, दांङ परमेश्वरे नूहबि कुड़ी कि द दोऊ, दोउ मेचो, दोउ शुमू यो रेतु ए दोतू मेच़ातु–बत्ते मिलाके रै मीतु किश्तीतिंग इबिमि मोक्का शु।
परमेश्वरै बत्ते जानवर ए प्यारैतू गांग्मी ए मेच़मिबि नूहज़ु कचंग चरच़तो ताकि दौरे दु जहाज़ांग इबि तरफोरे दांङ डाढ़े बचेके बंगज़ोरे। परमेश्वरै ध्याएँ ठ्रो बत्ते पाटीउ जानवरतू ङिज गंगमी ए ङिज मेच़मितिंग च़रचतु ताकि दोरे बलिऊ थल्ज़ि इस्तेमाल शुबि तरफोरे। अपेल दौरे बत्ते जहाज़ांग पिड़िरे दांङ परमेश्वरै एने दू जहाजो पितांग बंद ले केरि।
दांङ सन्दाड़ शुबि च़ुक्सिरि आई सन्दाड़ शुआ लरि, शुआ लरि। लगातार निन्ज़ा ध्याड़ा ए निन्ज़ा दिन ए रात सनदाड लेकिए तोइ। धरतीरिंगज़ि ल ती ब्रोग-ब्रोग हुच़ि लेकि तोई। संसारो बत्ते चीज़रै, देर तची कि रंगी रंगी गो रे ल तीरिंग डूमजी इलिरे ।
कारची धरतिरिंग तोचि बत्तेधिर सीए इलिरे, जहाज़ो अन्दरेग तोची मी ए जानवररै बत्ते बचेकि तोइरे। दु जहाज़ तीरिंग तैरेक्पा लरि आई जहाज़ो तोंगकि बत्ते चीज़तिंग डुबेक्पिरिंगज़ि बचाके तरि।
सन्दाड़ चसा थल ङा ला तचे दु जहाज़ तीरिंग तैरेक्पि लेकी तोइ, दांङ धोपेल ती ल घटेक्पी लेकि तोइ। दांङ इचा झा दु जहाज़ गोज़ु मुकरिंग चसा इलि, पर संसार अतला तीउ अन्दरेगे तोइ। शुमु लाउ थल, गोज़ु मुक ताङफि लेकि तोई ।
दांङ उइ निन्ज़ा ध्याड़ो थल, नूहज़ी इचा कगबि धाक्कते दि खन्ड्रि च़रचतो कि ती कारती या मकारती। दु कग कारची ठाढ़ि पैट्रिरिंग दैखा नौखा फन्ज़ी लेकी तोइ, पर दौवि आँरला कारची ठाढ़ि मखोग्सरि।
दांङ दोऊ थल नूहजि इचा कबूतरबि खन्ड्रि धाक्तिका च़रती। पर दौबि कारची धरति मखोग्सवे, दु यच़ा नूहज़ु कचांग अच़ा अति। इच़ा हफ्तौ थल दौइ दु कबूतरबि ओल्ला च़रति दांङ दु ऐनो चोंचांग जैतूनो डाढी कुरच़ा याच़ा अति। ती थोडे शुबि लेकी तोई, पौधारे ओला पूंङमि लेकी तोइ।
नूहजी इच़ा हफ्ता रुमज़ा शुमु फेरा दु कबूतरिबि ओला धाक्तिका च़रचतु, दि फेरा दोबि बंगज़ीरिंग ठाढ़ि खोग्सते दाङ दु याच़ा मादू। ती कारपि लेकी तोइ।
जुट लाज़ु थल परमेश्वरे नूहराङ कुड़ि, “द क ए काँ टवर आई दु बत्ते जानवररै जहाज़ांगज़ि हुन्ज़ा अतईं। मस्स कटुरै ए पोत्रा ए पडपोत्ररै हुतूशी दांङ पृथ्वीरिंग बिङे इलईं।” दांङ नूह ए दौउ टवर जहाज़गंजि धाक्कते अच़ा अतिरै।
नूहज़ु किश्तिरिंगज़ि धाक्तिका आन्जे थल्ल, दोई इच़ा बेदी बनाकतो ए बलिऊ जोगे हर किस्मो जानवरतु बिचांग मिनातिंग शिन्जे बलि चढ़ाति। परमेश्वर दु बलिज़ि खुश शुचा दांङ नुह ए दोऊ टावरबि आशीष रणीं।
परमेश्वरै कुडी, “गे कसम लोग्ग कि मीतू धुन्ना लसि माज़ी कामतु थलज़ी गे अपेला धरतिबि शाप मरमोगा न डाढ़रंग संसारबि नष्ट लोगा, हालांकि मीरे एनतु बाडेरिंगज़िए पापी तोतोर।
दांङ परमेश्वरै एनो वाचाओ सुनाहउ रूपरिंग इच़ा मेघधनुष बनाकते। अप्पेला सरगरिंग मेघधनुष तांगबोईं दांङ परमेश्वरबि हिद अपतो कि दोई चि वचन लत्ते ऊइ ध्वाँए दोऊ मीच़ि ला हिद लोरे।
बाइबल किताबंज़ी लेपसी कहानी उत्पत्ति अध्याय – 6-8
खुले लाइसेंस (CC BY-SA 4.0) के अंतर्गत उपयोग करने, बदलने और साझा करने के लिए निःशुल्क।