33. इच़ा किसानो कथा

इच़ा ध्याड़ा, यीशु झीलो मुको च़ाम्बे तोई। दोई मीतु इच़ा मोट्टे झुण्डबि शिक्षा रन्ड्रते। दोबि रेड्रमि थल्ज़ि धोणबत्ते मीरे अतिरे कि यीशु कचरिंग दोतांग गप्पा लेईमि थल्ज़ि ठाढ़िए मकेशरि। दोऊ थल्ज़ि दु तीरिंग तोचि किशतिंग लोक्सा इलि। दाङ दोरतिग नच़ा मीतिंग शिक्षा रणीं।

यीशुज़ि दोतिंग दि कथा शदि, “इच़ा किसान बैजा एच़िम थल्ज़ि धाक्तिखा हुन्ज़िरि। अपेल दोई गुड़च़ि बैजा पुरच़ि लेकि तोई दाङ मिना बैजा आम्मरिंग दचे इलि। पर प्याहरेच़ि अन्जे दु बत्ते बैजा ज़ेए केरिरे।”

“उई बैजा राग्गच़टे धरतिरिंग ददि आंरतिग शो थोड़े तोई। राग्गच़टे धरतिरिंग दचि बैजा युरने हुन्ज़ा अति, पर दोतु जड़ धरतिरिंग डुगे इबि मारतिरे। अपेल एके हुच़िरि दाङ च़ाच़े शुई दु पौधारे कारचे सिए इलिरे।”

“आऊंसांग बैजरे छ़वागटेतु बिचांग दचतेर। दु बैजाच़ि मोड़े शुबि च़ुक्तिरे, पर छ़वागटेच़ि दोतिंग तेप्चे केरिरे। दोऊ थल्ज़ि छ़वागच़टे धरतिरिंग दचि बैजारिंगज़ि हुन्ज़ि पौधारेच़ि अन्न रन्ड्रि मारतिरे।”

“आंऊ बैजारे रुठे धरतिरिंग दचते दु बैजरे फलेक्तिरे दाङ आंयो बैजा एच़तेर दोरच़ि 30,60, देरतचे कि 100 गुणा अन्न पैदा शुई। अच़ि परमेश्वरो थले जोईमि ततु, दोच़ि दु गप्पाऊ टोखटे ध्यान रांई आंऊ गे कुचि लेकि तोतोग!”

दि कथाज़ि चेलारेतिंग सोच विचाररिंग च़रचे केतु। दोऊ थल्ज़ि यीशुज़ि रुठेरांग कान्डि, “दु बैजा परमेश्वरो वचन शु। दु आम्म इच़ा ध्यांह ठ्रो मी शु आंऊ दि परमेश्वरो गप्पा रेड्रि, पर शुंगज़ि म। दांग शैताने दोऊ कचरिंगज़ि परमेश्वरो वचनबि कूज़ा लेन्ज़ा शिन्ज़ि। दिऊ मतलब शु कि शैताने दोबि वचनबि शुंगज़िरिंगज़ि ओईतारे केट्रि।”

“दु राग्गच़टे धरती जाँ ठ्रो मी शु आच़ि परमेश्वरो वचनबी रेड्रि आई खुशीरांग साथे मनेक्च़ि। पर अपेल माजि ध्याड़ा अपि, या उई मीच़ि दोबि तंग लज़ि दाङ दु परमेश्वररांग ओई शुचे इबि। दोऊ मतलब कि दोई परमेश्वरो टोख्टे विश्वास लज़ि बन्द ले केचि।”

“छ़वागच़टे धरती दु मी शु अच़ि परमेश्वरो वचनबी रेड्रा। पर दोई मास्स गप्पो पाटि चिन्द लेई च़ुके केचा, दाङ दोई मास्स ढबा कमाच़िम कोशिश लज़ा, आई दोई मास्स चीज़तिंग खोक्च़िमि कोशिश लज़ा। मिना वक्तो थल, द दु परमेश्वरबि दा लज़िमि जोगे म। दोऊ थल्ज़ि दोई चि परमेश्वरो वचनांगज़ि सिखेक्सते दोई दोबि परमेश्वरबि राजि लेई मारपोतो। दु छ्वाऊ टांडो छ्रो तो आच़ि अन्ने मरन्जि।”

“पर रुठे धरति दु मी शु आच़ि परमेश्वरो वचनबि रेड्रा, दोऊ टोख्टे बिश्वास लज़ा, आई फल पैदा लज़ा।”