34. यीशुज़ि उई कथातु शिक्षा रंड्रि

यीशुज़ि परमेश्वरो नगरो पाटि उई ला मस्स कथारे शदि। कंड्रिमि थलज़ि, दोई कुडि, “परमेश्वरो नगर इच़ा यूंङगर ज़ु बेजो धोन तो छेबि आच़िया ऐनो लिङरिंग ऐई केते। केच़ि ञेई कि यूंङगरो बेजा भत्ते बेजतु बिच्चंग भब्बे क्बाचि शुबि।”

“पर अपेल राईऊ बेजा मोडे शुचि इबि दंग दु बागो भत्ते बुटतु बिचंग भब्बे मोडे शुचि इबि, धों मोडे कि प्यारे दोऊ ब्रन्ज़ातु टोक्ठे बङज़ा आराम लज़ि।”

यीशुज़ि इच़ा उई कथा कंडि, “परमेश्वरो नगर ट्रेहऊ ट्रो शुबि छेबि इच़ा मेच़मी बगज़नरंग साथे ट्रुकि केते दंग दु भत्ते बगज़नरिंग सुम अच़ा इबि।”

“स्वर्गो नगर दु प्यागतु ठ्रो तो छेबि अच़िआ रीरिंग प्याकि केतो। दंग अतिंग आ उईतिंग दु प्याकसी खज़ाना खोक्सा इन्जा दंग दोई दोबि लेपच़िमि मस्स सेम लरि। दोथलज़ि दोई दोबि ओल्ला पथेकी केरि। दु धोंन राजी शुचि तोई कि दोई इन्जे ऐनो भत्तेधिर लांञि केरि छेईकुचे दोई दुसंङ री च़ुमज़ि तरफोतो आऊंरतिग दु खज़ाना तोई।”

“स्वर्गो नगर इच़ा मस्स कीमती ए शुच्चा मुतिगतु ठ्रो ला शु। अपेल अरिआ मुतिग लङज़ाडे दु खोकि केबे दंग दोबि च़ुमज़िमि थलज़ि एनो भत्तेधिर लङि च़रच़ा।”

दोर मिन्ना मीरे तोइरे अच़ि ध्यां चेच़ितेरे कि परमेश्वरे दोतिंग दियुथलज़ि ला लेपोतो छेईकुच़े दोच़ि रुथे कम लज़ि लेकि तोतोरे। दि मिच़ि ध्यांठ्रो मितिंग छल्ले मे ठ्रो चेच़ि तोइरे अच़ि दु रुठे कम मलेई तोइ। दिऊ थलज़ि यीशुज़ी दोतिंग दु कथा कंडि: “जुट गङमिकु तोइकु दंग झुल्ला ए पूजा लेईरिंग थलज़ि मंदिरंग इलिकु। दोकुतु बिचंग इसंग कर लेपच़ाड तोई, अईसंग इच़ा यहूदि धार्मिक प्रधान तोई।”

“दु यहुदि धार्मिक प्रधान ध्यांह ठ्रो आर पूजा लरि, ‘हे परमेश्वरा, केनाबी शबस कि गे उई मीतु ट्रो – झमा डाकू, माजी मनुक, झक विचार लज़ाड, देरत्तचि कि देर खडे दि कर लेपच़ाडो ठ्रो इच़ा पापी मशुग।’”

“उदाहरणौ थलज़ि, गे हर हफतारिंग झुट फेरा उपवास तच़ि, अई गे गिबि खोक्सि ढब्बा ए समानो सामि हिस्सा कनिगं रमताग।”

“पर दु कर लेपच़ाड दुसांग यहुदि धारमिक प्रधान बेच़ि मस्स ओय खडे शुचि इन्जा। दोइ तोरिंखा सर्गो हाखा खणि ला मा। दीऊ भोन्दे, दोई एनो मुक्श़ु कुचे एनो काहरिंग घाह केरि दंग परमेश्वरंग कुडि, ‘हे परमेश्वरा, ज़ी शबस ग्यू टोक्ठे दया लोऊ छेईकुचे गे इच़ा पापी शुगा।’”

दोऊ थल यीशुज़ि कुडि, ”गे केतंग हेल्ले कुच़तग, परमेश्वरे दु कर लेपच़ाडो प्रार्थनाबि रेड्रिरी दंग दोबि धर्मी कुडि। पर दोई दु यहुदि धार्मिक प्रधाने प्रार्थनाबि रुठे मचेति। परमेश्वरे दोतु भत्तेतु पुन्ज़ा योंखा लोतो अतिंग घमंड तो, पर दोई दोतिंग भत्तेतिंग आदर रमोतो अच़ि एनबि फोसो मे लोतो।”