37. यीशुजि लाज़रबी सी दोतु धुन्ना शिंगबि ले हाति

लाज़र मिन्दांग इच़ा मी तोई। दोऊ जुट रिंगकु तोइकु दोकु मिन मरियमे मार्था तोई। दोरे बत्ते यीशुज़ु च़म्बे साथि तोईरे। इच़ा ध्याड़ा, अच़िया यीशुबी कन्जतु कि लाज़र मास्स टेचि तोई। अपेल यीशुई दि थश्तो दांग दोई कुत्तो, “दि बिमारी लाज़रो सीरांग साथे योसा मेओतो। दिऊ भोन्दे, दि मीतिंग परमेश्वरो आदर लेईमि थल्ज़ि सिखाई शोतो।”

यीशुज़ि एनो साथीतांग दा लज़ते, पर आंर दु तोई दोर दु जुट ध्याड़ा तचे रुमज़री। दु जुट ध्याड़ो थल्ल, दोई एनो चेलातांग कुड़ि, “आतईं, यच़्च़ा यहूदिऊ आखा योईं।” चेलाच़ि जवाब रेईंरे, “पर हे गुरु, एन्थेग मिना ध्याड़ा तुई तचे दोरकि मीच़ि कनिंग सचे केचिम तरेर!” यीशुज़ि कुड़ि, “हेन्दु साथी लाज़र इमरिंग अच़ा इन्जा, आई गे दोबि चेपि लज़िम तताग।”

यीशु च़ेलारेच़ी जवाब रेईंरे, “हे प्रभु, अगर लाज़र इमरिंग तो सेत, दु ठीक शुचे योतो।” दाङ यीशुज़ि दोतांग सीधा कुचे केरि, “लाज़र सिए इन्जि तो। गै राजी तोतोग कि गै दोरतिग मतोइग, ताकि केच़ि ग्यु टोख्टे बिश्वास लेई तरफोईं।”

अपेल यीशु लाज़रो नगरांग पिचा धोपेल लाज़रबि सिए तुईए पी ध्याड़ा शुचे इन्दे। मार्था यीशु रांग दोईमि थल्ज़ि धाक्तिका आति दाङ कुड़ि, “हे प्रभु, अगर क देर शुचांग दाङ ग्यु काका सी मतोई। पर गिवि बिशवास तो कि चिधिर ल केई परमेश्वरांग पेपोन दोई कनिंग रमोतो।”

यीशुज़ि जवाब रेंईं, “सी ए शिंगवि गै ए शुगा। आच़ि ग्यु टोखटे बिश्वास लज़ा दु सी ल इलि सेत ताँ ल शिंङमोतो। आच़ि ग्यु टोखटे बिश्वास लोतो दु अपेल ल म सियोतो। चि केई ग्यु टोखटे विश्वास लज़िया?” मार्था ज़ी जवाब रैईं, “हे प्रभु, गै बिश्वास लज़ताग कि क परमेश्वरो यो मसीह शुना।”

दाङ मरियम अन्जा। दोई यीशु कोन्ज़ातुंग दचे कुड़ि, “हे प्रभु, अगर क देर शुचांग सेत ग्यु काका सी मतोई।” यीशुज़ि दोरांग रुकतो, “केच़ि लाज़रबी आंर केशि ततईं?” दोच़ि दोबि कन्जतोर, “कब्रांग। अता दाङ खांए च़रतु।” दोपेल यीशु क्राप्चा ।

दु कब्र इच़ा फुग्ग तोई छोऊ आरिंग इच़ा राग्ग केशि तोई। अपेल यीशु कब्रो दोर पिचा दाङ दोई दोतांग कुड़ि, “राग्ग घेरेक्तुईं।” पर मार्था ज़ि कुड़ि, “दोबि सिए पी ध्याड़ा शुचे इन्जा। दोऊ धुन्ना बास अपि लेकि शोतो।”

यीशुज़ि जवाब रणिं, “चि गै केतांग मकुत्तेगा अगर केच़ि ग्यु टोख्टे विश्वास तरेईं सेत परमेश्वरे चि लेई तरछ़ि केच़ि तांग्मोईं?” दिऊ थल्ज़ि दोच़ि राग्ग घेरेके केरिरे।

दाङ यीशुज़ि तोरिंखा स्वर्गो आखा खाँए कुड़ि, “हे बा, ग्यु रेड्रिम थल्ज़ि गै कनु शबस लज़ताग। गै ङैगा कि केई हर फेरा ग्यु रेड्रतन, पर गै देर खड़े बत्ते मी तु मदद लेईमि थल्ज़ि कुत्ताग छेई कुचे दीच़ि बिश्वास लेई तरफोरे कि केई गिबि च़रसि शुना।” यीशु ज़ी हाग्ग रेंईं, “हे लाज़र, धाक्तिका हुच़ा आता!”

दाङ लाज़र धाक्तिखा हुच़ा आति! दु अत्तला कफनांग जिल्सा तोई। यीशुज़ि दोरांग कुड़ि, “दि कफनबि हुपिरिंग दोबि मदद लाईं ए दोबि आज़ाद लाईं।” दि चमत्कारो थल्ल मास्स यहुदिरेच़ि यीशु टोख्टे बिश्वास लरिरे।

पर यहुदिरेतु धार्मिक प्रधाने यीशुरांग जेग्दांग लज़ि लेकि तोईरे, दोऊ थल्ज़ि दोरे बत्ते ठ्रोक्कन शुईरे कि छना यीशुए लाज़रबि सापोईं।