38. यीशुबी च़ुमसि ले केचि

हर साल, यहूदी मीच़ि फसह ज़ु जातर मनेक्च़ा तोईरे। दि जातर दिऊ थल्ज़ि मनेक्च़ि तोई कि तेईया रामि सालो तुई परमेश्वरे दोतु पित्रतिंग मिस्रो गुलामी रिंगज़ि छुड़ाक्ते। लगभग शुमु सालो थल्ल यीशुज़ि खुलेरांग प्रचार लज़ि ए शिक्षा रन्जि शुरु लरि। यीशुज़ि एनो चेलारेतिंग कान्डि कि दोई दोतांग साथे यरुशलेमांग फसह ज़ु त्यौहार मनाच़िम ततु, आई दि ल कि दोबि दोरर साचे केओर।

यीशुज़ु चेलारेतु बिचांग इच़ा यहुदा मिन्दांग मी तोई। यहुदा प्रेरिततु ढाबो थैली तच़िमि ज़िम्मेबारी लेप्च़ाड़ तोई, पर दोई घड़ी-घड़ी दु थैलीरिंगज़ि ढबा हुन्जे केचि तोई। यीशु ए चेलारेतु यरूशलेम पिचे थल यहुदा यहुदी प्रधानो कचांग इन्जा। दोई ढबो भोन्दे यीशुबी दोतु गुड़च़ि च़ुमज़िमि थल्ज़ि गप्पा लरि। दोबि पता तोई कि धार्मिक प्रधानच़ि दि ममनेक्च़ितोई कि यीशू ए मसीह तोई। दोबि पता तोई कि दोच़ि दोबि सचे केचिम ततोर।

मोढ़े यहूदि पुजारीऊ कुबे यहूदी धार्मिक प्रधाने यीशुबि दोतु गुड़च़ि च़ुमसि लेईमि थल्ज़ि यहूदाबि मूलू ङिज़ो सा टांग्गा रेईंरे। दि ध्वांए शुचा छना दु भविष्यवक्ताज़ि कुत्ते कि शोतो। यहूदाज़ि मनके केरि दाङ ढबा लेन्ज़ा अच़ा इलि। दोई यीशुबि च़ुमज़िमि थल्ज़ि दोतु मदद लेईरिंग मोक्का पेचि लेकि तोई।

यरुशलेमांग, यीशुज़ि एनो चेलातांग साथे फसहज़ु त्यौहार मनाकतु। फसहज़ु बागतो धोपेल, यीशुज़ि रोटी लेप्चे खान्नि लरि। दोई कुड़ि, “दि लेप्तु दाङ ज़ोऊ। दि ग्यु फुक शु छेबि गै कनु थल्ज़ि रन्जताग। दिबि ग्यु हिदरिंग लांईं।” ध्यांह छो, यीशुज़ि कुड़ि कि दु दोतु थल्ज़ि सिए योतो, छोऊ मतलब शु कि दोतु थल्ज़ि दोई एनो फुको बलि चढ़ापोतो।

दाङ यीशुज़ि इच़ा दाखरसो प्याला लेप्चे कुड़ि, “दि तुङे च़रतु। दि खारकोई वायदाज़ु ग्यु शुई शु छेबि गै पोंग्बोगा ताकि परमेश्वरे केतु पापबी माफलोतो। हर फेरा दिबि तुंग्तर ग्यु हिदरिंग ध्यांह लांई छना गै एन्थेग लज़ि लेकि तोतोग।”

यीशुज़ि एनो चेलारेतांग कुड़ि, “केतु बिचांग तोचि इच़ा मीज़ि गिबि च़ुमज़ि लोतो।” चेलारे झगेक्सा इलिरे, दाङ रुक्तिरे कि दिछो काम्म अच़ि लोतो। यीशु ज़ि कुड़ि, “गिवि च़ुमज़ि लज़ाड़ मि दु शु आतिंग गै दि रोटिऊ खान्नि रन्जताग।” दाङ दोई दु रोटी यहुदाबि रन्दु।

दु रोटि लेप्चे थल्ल, यहुदा ज़ु अन्दरेग शैतान अच़ा आति। यहूदा हुच़ा यीशुबी च़ुमज़ि लेईमी थल्ज़ि रातरिंग यहुदि धार्मिक प्रधानतिङ साथि लेई अच़ा इन्जा।

बागत ज़ेए थल्ल, यीशु ए दोऊ चेलारे जैतून गो आखा अच़ा इलिरे। यीशुज़ि कुड़ि, “केच़ि बत्तेच़ि तोग रातरिंग गिबि केचे केओईं। दि च़ैसि तो, ‘गै पोहालबि साचे केयोग दाङ बत्ते त्रैंईरे त्राठेक्शा योरे।’”

पतरसे जवाब रणीं, “चीए शु उईच़ि बत्तेच़ि कनिंग केचे ल केओर, सेत गै मकेओग!” दाङ यीशुज़ि पतरस रांग कुड़ि, शैताने केतिंग बत्तेतिंग लेन्ज़ा शिन्ज़िम ततु, पर हे पतरसा, गै कनु थल्ज़ि प्रार्थना लत्ताग कि कनिंग ततपा योसि मेस। तां ल, तोग रात, मुर्गाऊ कुचिम बे तुई केई शुमु फेरा न लोन कि केई गै सेन्ने माह।”

पतरसे धोपेल यीशुरांग कुड़ि, “गै सिए ल इलिगा सेत, अपेल ल कनु इन्कार मलोग!” उई ल बत्ते च़ेलाच़ि ल ध्वांए कुत्तोर।

दाङ यीशु एनो च़ेलातांग साथे गतसमनी मिन्दांग ठाढ़िरिंग इन्जा। यीशुज़ि एनौ चेलातिंग प्रार्थना लेईरिंग कुड़ि ताकि शैताने दोतु परिक्षा मलेप्तो। दाङ धोपेल यीशु एना प्रार्थना लज़ि अचा इन्जा।

यीशुज़ि शुमु फेरा प्रार्थना लरि, “हे ग्यु बा, अगर शुई सेत ज़ि शबस दि दुखो प्याला गिबि तुंग्बिरिंग थरउँ। पर मीतु पाप माफ लेईमि जोगे उई छा आम्म म सेत, दाङ कनु इच्छा पूरी शुबि जुस।” यीशु मास्स बैचेन तोई दोऊ त्रुग शुईओ जोगे तोई। दोबि हिम्मत रन्ड्रिम थल्ज़ि परमेश्वरे इच़ा स्वर्गदूतबी च़रचतु।

हरफेरा प्रार्थना ले थल्ल, यीशु एनो च़ेलातु कचरिंग याच़िरि, पर दोरे इमरिंग अच़ा इन्देर। अपैल यीशु शुमु फेरा याच़िरि, दाङ कुड़ि, “आच़ुईं! गिबि च़ुमज़ाड़ देर तो।”

यहूदि धार्मिक प्रधान, सेनारे, आई इच़ा मोढ़े झुण्डतांग साथे यहुदा आति। दोच़ि तलवाररे लोऊड़िरे कुरसि तरेरे। यहुदाज़ि यीशु कचरिंग अन्जे कुड़ि, “हे गुरु, नमस्ते,” दाङ दोबि दा लरि। दोई च़ुमसी लज़िमि मीबि यहूदी प्रधानो तांग्शि ध्यांह लत्ते। यीशु ज़ि कुड़ि, “हे यहुदा, केई चि इच़ा दा ज़ि गिबि च़ुमज़ि लज़तना?”

अपेल दु सैनिकच़ि यीशुबी च़ुमज़ि लेकि तोईरे, धोपेल पतरसे एनो तलवार हुति दाङ मोढ़े यहुदि पुजारी इच़ा नोकरो रैट्रा ट्रिके केरि। यीशुज़ि कुड़ि, “तलवारबी ओई लोऊ! गै घ्यांञों बा रांञ गिबि बचाच़िम थल्ज़ि स्वर्गो दूततु इच़ा सेनाऊ थल्ज़ि ज़ी लेई तरछ़ि। पर गै घ्यांञों बा ज़ु गप्पा मनेक्च़िम तताग।” दाङ यीशुज़ि दु मीऊ रेट्रा ठीक ले केरि। दाङ बत्ते चेलारे पोख्शे इलिरे।