39. यीशु टोख्टे मुकदमा चलेक्पि

द दि अद्धा रातो मोक्का तोई। दु सैनिकच़ि यीशुबि मोड़े पुजारिऊ चुङ लेन्ज़ा अतिरे, छेई कुचे दोई यीशुरांग प्रशन रुक्च़िम तरे। पतरस ओईतारेज़ि दोतु थल्ल थल्ल इबि लेकि तोई। अपेल सैनिकच़ि यीशुबि चुंखा लेन्ज़ा शिलिरे, धोपेल पतरस धाक्ते बांग्ज़ा मै ट्रोड्रि लेकि तोई।

घरबारो तोंङ, यहूदी धार्मिक प्रधानच़ि मुकदमा चलातिरे। दोच़ि दोऊ खिलाफ हाफसि गप्पा लज़िम थल्ज़ि हाफसि गवाह लेन्ज़ा हातिरे। हलांकि, दोतु गप्पारे तुक में तोईरे, दोऊ थल्ज़ि यहुदी प्रधान दि साबित लेई मरतिरे कि यीशु चि गप्पो दोषी शु। यीशुज़ि छल्ले मकुई।

थल्ल मुकरिंग, मोढ़े पुजारी सिधा यीशु आखा खंए कुड़ि कि, “ङेतिंग कन्डु चि क ए शिंङि परमेश्वरो यो मसीह शुना?”

यीशुज़ि कुड़ि, “गे शुगा, केच़ि गिबि परमेश्वर रांग साथे नच़ा ए स्वर्गांगज़ि अपि ल ताञंबोई।” मोढ़े पुजारी एनो खाम्ज़े ट्रवाल्जे केरि दोबि दु गप्पो टोख्टे मास्स रोष अन्दे। दोई उई यहुदि धार्मिक प्रधानो टोखठे हाउशेके कुड़ि, “ङेतिंग दि कान्ड्रिम थल्ज़ि उई गवाह जुंशी मा कि दि मीज़ि चि लसि ततु! केच़ि केन्ज़िए दोबि दि कुट्रि थशे केतइं कि दु परमेश्वरो यो शु। दिऊ पाटि केतु चि फैसला शु?”

बत्ते यहुदि धार्मिक प्रधानचि मोड़े पुजारीबि जवाब रेईंरे, “दि सीमि जोगे शु!” दाङ दोच़ि यीशु टीरांग यद छ़ुचे केरिरे, दोऊ टोख्टे थू लरिरे, दोबि तेंञरिरे आई दोबि झोकिक्तिरे।

आई पतरस, अपेल घरबारो धाक्ते रुमज़ा तोई। धोपेल इच़ा दासी मेच़मी काटुई दोबि ताञंरि। दोई दोरांग कुड़ि, “क ला यीशुरांग साथे तोइना!” पतरसे न ले केरि। दिऊ थले इच़ा उई मेच़मि कटुई दी ए गप्पा कुड़ि, दाङ पतरसे ओल्ला न ले केरि। थल्ल मुकरिंग, रेई मीच़ि कुड़िरे, “ङेच़ि ङेई कि क ला यीशुरांग साथे तोईन केकु जुल्ला गलीलो शुशी।”

धोपेल पतरसे कुड़ि, “अगर गै दि मी सेखा सेत परमेश्वरे गिबि हत्या केओतो!” युरने पतरसो ध्याहंठ्रो कसम ज़ैए थल्ल, इच़ा मुर्गे बांग रेंईं। यीशुज़ि थल्का किरज़ा पतरसबी खणीं।

पतरस दोरच़ि अच़ा इलि दाङ हिके-हिके क्राप्ति। धोपेले, यीशुबी च़ुमज़ि लज़ाड़ यहुदाज़ि खंणि कि यहुदि प्रधाने यीशुबि साच़िम सज़ा रन्देरे। यहुदा मास्से दुखी शुचे इन्जा दाङ इन्जे एनबि साचे केरि।

द दु देशो राज्यपाल पिलातुस तोई। दोई रोमो थल्ज़ि कम्म लोअते। यहुदी प्रधानच़ि यीशुबि दोऊ कचरिंग लेन्ज़ा हातिरे। दोच़ि जुन्ज़तेर कि पिलातुसे दोबि साच़िम सज़ा रमोतो दाङ दोबि साचे केओतो। दाङ पिलातुसे यीशुबि रुक्ति, “क चि यहुदितु राजा शुना?”

यीशुज़ि जवाब रेंईं, “केई हेल्ले कुत्तन। पर ग्यु राज्य देरर धरतिऊ मशु। अगर शुचांग सेत ग्यु दासच़ि ग्यु थल्ज़ि लड़ाई लेईरे का। गै धरतिरिंग परमेश्‍वरो पाटि हेल्ले कान्ड्रिम थल्ज़ि आन्जि शुगा। बत्ते मीच़ी आच़ि हेल्ले राङ दा ततु दोई ग्यु गप्पा रेड्रि।” पिलातुसे कुड़ि, “दाङ हेल्ले चि शु?”

यीशुरांग गप्पा ले थल्ल, पिलातुसे धाक्ते झुण्डो कचरिंग इन्जे कुड़ि, “दि मीबि साच़िम जोगे छल्ले वजह गै म खोक्तिगा।” पर यहूदि प्रधाने भीड़ांगज़ि हाऊशेके कुड़िरे कि, “दोबि क्रूसांग चढ़ाके केऊईं!” पिलातुसे जवाब रणीं, “दु छल्ले गलत लज़िमि दोषी मशु।” पर दोरे उई ल जोरे जोरे हाऊशेक्तिरे। पिलातुसे शुमु फेरा कुड़ि, “दु दोषी मशु!”

पिलातुस बेए इलि कि दोरे तेंङज़ि च़ुक्सोरे, दोऊ थल्ज़ि दोई एनो सैनिकतिंग यीशुबि क्रूसो टोख्ठे चढ़ाच़िरिंग मनेके केरि। रोमी सैनिकच़ि यीशुबी कोड़े रांग तेङरिरे, दाङ दोबि राजातु खामज़े लेतिरे, दोऊ पुन्ज़ांग छ़ुवाग टु बनेकि ताज खातिरे। दाङ दोच़ि दि कुचे दोबि झोकिक्तेरे, “खांई यहूदी तु राजा!”