40. यीशुबी क्रूसो टोख्ठे चढ़ाच़ि

यीशुबी झोकेकेथल्ल, सैनिकच़ि दोबि क्रूसो टोख्ठे चढ़ाच़िम थल्ज़ि लेन्ज़ा शिलिरे। दोच़ि दु क्रूसबि दोबि कुरच़ि लत्तेरे छोऊ टोख्ठे दु सिओतो।

दु सैनिकच़ि दोबि दु ठाढ़िरिंग लेन्ज़ा हातिरे आंऊ ‘खोपड़ी’ कहलाच़ा तो दाङ दोऊ गुड़ ए कोन्ज़ाबि क्रूसांग टाके केरिरे। पर यीशुज़ि कुड़ि, “हे बा, दीतिंग माफ लोऊ, छेई कुचे दीच़ि मङेऊरे कि दीच़ि चि लेई लेकि तोतोर।” दोच़ि इच़ा तख्ती दोऊ पुन्ज़ो कचांग टाके केरिरे। दोरिंग च़ेसि तोई, “यहूदीतु राजा।” पिलातुसे दोतिंग दि च़ेच़िरिंग कुत्ते।

दाङ सैनिकच़ि यीशू खमज़ेतु थल्ज़ि पोगड़ा केरिरे। अपेल दोच़ि ध्यांह लरिरे दाङ दोच़ि दु भविष्यवाणी बी पूरा लरिरे छेई कुट्रते, “दोच़ि ग्यु खामज़े एनतु बिचांग फाए केरिरे, दाङ ग्यु खामज़ेतु थल्ज़ि पोगड़ा केओरे।”

दोरतिग जुट डाकूकु ल तोइकु, अतिंग सैनिकच़ि धोपेल ए क्रूसरिङ लोकतेर। दोच़ि दोकुतिंग यीशु देच़ि नोच़ि केतेर। दोकुतु बिचांग इच़ा डाकुई यीशूबी झोकेक्ति, पर आईच़े कुड़ि, “चि क परमेश्वरो सज़ा राङ मबेओतना? हेंगु मास्स माजि काम्मो दोषि तोतोशि, पर दि मी निर्दोष शु।” दाङ दोई यीशुरांग कुड़ि, “अपेल क केनो राज्यरिंग अपोन ज़ी शबस धोपेल गिबि हिद तोउ।” यीशुज़ि जवाब रणीं, “तोग्गे क गैरांग साथे स्वर्गांग शोन।”

यहूदी प्रधान ए दोरतिग तोचि उई मीरेच़ि ल यीशु वस्स लरिरे। दोच़ि दोबि कुड़िरे, “क परमेश्वरो यो शुना सेत, क क्रूसांगज़ि योंखा ताख्सा अता दाङ केनाबि योंखा ताख्सा बचातु! दाङ ङेच़ि कनु टोख्ठे बिश्वास लोईं।”

दोऊ थल दु देशो बत्ते सर्ग ङिरो धोपेल रोकि शुचे इलि, दाङ शुमु घन्टा तचे ध्यांह ए तोई।

दाङ यीशुज़ि हाग्ग रैं कुड़ि, “पूरा शुई! हे ग्यु बा, गै घ्यांञो आत्माबि कनु गूड़िंग रन्ड्रताग।” दाङ दोई एनो पुन्ज़ा योंखा ले केरि दाङ एनो प्राण ङयचे केरि। अपेल दु सिया धोपेल भुलिणिं इलि। दु मोढ़े पर्दा आंऊ परमेश्वरो शुबिरिंगज़ि मीतिंग शाता लज़ि तोई दु तोरिंगज़ि योंखा ड्रवाल्जे जुट हिस्सा शुचे इन्जा।

एनो सिए थल्ल, यीशुज़ि मीतु थल्ज़ि परमेश्वरो कचरिंग अपिम थल्ज़ि अम्म कन्जे केरि। अपेल यीशुबी रुन्जाड़ इच़ा सैनिके चि चि शुत्ते दु बत्ते तांञे थल्ल दोई कुड़ि, “पक्का दि मी निर्दोष तोई। दि परमेश्वरो यो शु।”

धोपेल युसुफे नीकदेमुस मिन दाङ जुट यहुदि धार्मिक प्रधानकु आतिकु। दोकुतिंग विश्वास तोई कि यीशु ए मसीह तोई। दोकुई पिलातुसो दोरच़ि यीशु फुक पेड़िकु। दोकुइ दोऊ फुक बी खामज़ेतु बिचांग जिल्जे केरिकु। दोऊ थल्ल दोबि इच़ा गोरिंगज़ि ट्रिके पान्ज़ो बनाशि कब्राङ शिन्जे दोऊ अन्दरेग केचे केरिरे। दोऊ थल्ल दोच़ि दु कब्रो पितांग बन्द लेइमि थल्ज़ि इच़ा मोड़े राग्ग केल्ड्रि ले केरिरे।