41. परमेश्वरे यीशुबि सी दोतु धुन्ना शिंञबि ले केचि

सैनिकतु यीशुबि क्रूसौ टोखठे चढ़ाके थल्ल, यहुदि प्रधानच़ि पिलातुस राङ कुड़िरे, “दु हाप्साटु, यीशुज़ि कुत्ते कि दु शुमु ध्याड़ो थल्ल सीरिंगज़ि शिंङे आपतो। आतिंङा दि पक्का लेईमि थल्ज़ि दोऊ कब्रबि रुन्ड्रि लेपोतो कि दोऊ चेलारेच़ि दोऊ फुक कूज़ा लेन्ज़ा शोरे त मा। अगर दोच़ि ध्यांह लरिरे सेत दोच़ि कोरे कि दु सीरिंगज़ि शिंङे इन्जा।”

पितालुसे कुड़ि, “मिना सैनिकतिंग लेन्ज़ा शिलंईं, दाङ छना केच़ि लेई तरथिंई ध्वांह रुन्डुंईं।” दिऊ थल्ज़ि दोच़ि दु क्रबो पिताङु राग्गटिङ इच़ा सुन्नाह केचे केरिरे। दोच़ि दि पक्का लेईमी थल्ज़ि दोरतिग सैनिकतिंग ल केचे केरिरे ताकि अच़िला दोऊ फुक कूज़ि मारपोरे।

यीशुज़ु सिए थल्लकि ध्याड़ा सब्तो ध्याड़ा तोई। आच़िला सब्तो ध्याड़ो मोक्का काम्म लेई मारछ़ि तोई, दिऊ थल्ज़ि यीशुज़ु आरिया साथि कब्रांग माजतेर। पर सब्तो ओईराग कि ध्याड़ा, मुन्जे नम्म मज़ाङथर, मिना मेच़मीरे यीशु कब्रांग इबिम थल्ज़ि तैयार शुईरे। दोच़ि दोऊ फुकरिङ उई ल मसाला लगाच़िम तरेरे।

दु मेच़मितु पिपिम बे तुई, कब्रांग जोरे भुलिणीं शुई। स्वर्गांगज़ि इच़ा स्वर्गो दूते अन्जे दु राग्गबि एखा लरि आंउ दोई कब्रो पितांग काप्शि तरे। आई दोऊ टोख्टे बांगज़ा इलि। दि स्वर्गदूत छ़ांञिऊ छो चमकेक्पि लेकि तोई। कब्रांग आंऊ सैनिकरे तोईरे दोच़ि दोबि ताङरिरे। दोरे धोणं बेए इन्देर कि सी दोतु ठ्रो शोड़िंग दचे इलिरे।

अपेल दु मेच़मिरे कब्रांग पिचतोरे दाङ स्वर्गदुते दोतांग कुत्तो, “बेऊईं थांईं। यीशु देर म। दु सी दोतु धुन्ना शिंङे इन्जा, छना दोई कुशि तरे कि दु शिंङे योतो! कब्रांग पेचे खाईं।” दु मेच़मिच़ि कब्रो अन्दरेग आंरतिग यीशु फुक केशि तरिरे दोर पेड़िरे दाङ खणिंरे कि दोऊ फुक दोरतिग म!

दाङ दु स्वर्गदूते दु मेच़मितिंङ कुड़ि, “इन्जे दु च़ेलारेतिंग कान्ड़ुईं, ‘यीशु सीरिंगज़ि शिंङे इन्जा दाङ दु केतु तुई-तुई गलीलो हाखा योतो।’”

दु मेच़मिरे हैरान ए मास्स राजि शुईरे। दोरे चेलारेतिंग दि रुठे उजाब रन्ड्रिमि थल्ज़ि पोखतिरे।

अपेल दु मेच़मीरे च़ेलारेतिंग दि रुठे उजाब रन्ड्रिमि थल्ज़ि आम्मरिंग तोईरे, दाङ यीशु दोतु तुईच़ि प्रकट शुचा। दोच़ि दोऊ कोन्ज़ातुंग फ्याग लेईरे। धोपेल यीशुज़ि कुड़ि, “बेऊंईं थांई। इन्जे ग्यु च़ेलारेतिंग गलीलोहाखा इबिरिंग कुड़ुईं। दोच़ि गिबि दोर तांङमोरे।”