42. यीशुज़ु स्वर्गोहाखा यच़ा इबि

आंऊ ध्याड़ा परमेश्वरे यीशुबि सी दोतु धुन्ना शिंगबि लत्ते, दोऊ जुट चेलाकु च़म्बे नगरांग इबि लेकि तोईकु। जोतर दोकुई यीशुरांग चि-चि शुत्ते दोऊ पाटि गप्पा लज़ि लेकि तोईकु, दोकुतिंग उम्मीद तोई कि दु मसीह तोई, पर तां ल दोबि सचे केतेर। द दु मेच़मिच़ि कुट्रतोर कि द दु यच़्च़ा शिंङे इन्जा। दोच़ि मनेऊरे कि आंऊ गप्पारिंग विश्वास लज़िम शु।

यीशुज़ि दोतु कचरिंग अन्जे दोतांग साथे जोई च़ुक्ति, पर दोच़ि दोबि सेच़ि मारतिरे। दोई रुक्ति कि दोच़ि छोऊ पाटि गप्पा लज़ि लेकि तोईरे। दोकुई दोबि मिना ध्याड़ा तुई यीशुरांग चि-चि शुत्ते दु बत्ते गप्पारे शदिकु। दोकुई चेतिकु कि दोकुई अरिया परदेसीरांग गप्पा लज़ि लेकि तोतोकु अतिंग पता म कि यरुशेलमांग चि शुत्ते।

धोपेल यीशुज़ि दोकुतिंग समझाकतु कि परमेश्वरो कुशि गप्पाज़ि मसीहउ पाटि चि कुट्रा। मास्स तुई, भविष्यवक्ताच़ि कुत्तेरे कि माजि मीच़ि मसीहबी कष्ट रमोरे ए साचे च़रपोरे। पर भविष्य वक्ताच़ि दि ल कुत्तेर कि शुमु मेतिंग दु ओल्ला शिंङे योतो।

अपेल दोरे दु नगरांग पिचतेर आंर दोकु नच़िमि तरेकु, धोपेल तचे क्योमे शिनमशे इन्जि तोई। दोकुई यीशुबि एनतांग साथे रुमज़रिंग कुड़िकु, दाङ दु दोकुतांग साथे इच़ा घरबारांग इन्जा। एनतु याग ज़ेईमि थलज़ि दोरे नच़ा इलिरे। यीशुज़ि इच़ा रोटि लेप्चे परमेश्वरबि दोऊ थल्ज़ि शबस लरि, दाङ दोबि थ्वाक्ति। धोत्तरे, दोच़ि ङेए केरिरे कि दु यीशु तोई। पर धोपेले दु रिप्सा इलि।

दोकु झुट्टे एनकुतांग साथे कुड़िकु, “दु यीशु तोई! दिऊ थल्ज़ि अपेल दोई हेंगुतिंग परमेश्वरो वचनो पाटि समझाकते दाङ हेन्दरे मास्स राजि शुत्तैईं!” युरने, दोरे यच़ा येरुशेलमो हाखा इलिरे। अपेल दोरे दोर पिचतोरे धोपेल दोच़ि च़ेलारेतिंग कान्डिरे, “यीशु शिंङि तो! ङेच़ि दोबि तांग्तेईं!”

अपेल चेलारेच़ि गप्पा लज़ि लेकि तोईरे, यीशु रिप्पकुचे दु पूरिरिंग दोतु तुईच़ि अच़ा अति। दोई कुड़ि, “केतिंग शान्ति खोक्सि जुस!” च़ेलारेच़ि चेतिरे कि दु अरिया बेड़ा तोई, पर यीशुई कुड़ि, “केरे छेरिंग बेवतईं? केच़ि दि छेरिंग मचेच़तईं कि दि हेल्ले गै, यीशु शुगा? ग्यु गुड़ ए कोन्ज़ा खांईं। बेड़ातु कचरिंग ध्यांह छो फुक मशुबि छना ग्यु कचरिंग तो।” दि कान्ड्ररिंग कि दु अरिया बेड़ा मशु, दोई ज़ेईरिंग थल्ज़ि छा: पेचतु। दोच़ि दोबि मच्छो इच़ा खान्नि रेईंरे, दाङ दोई दोबि ज़ै केरि।

यीशुज़ि कुड़ि, “ग्यु पाटि परमेश्वरो वचने चिधिर ल कुट्रा दु बत्ते शोतो, गै केतिंग कन्जे केतेग कि दि ज़रूर शोतो।” दाङ यीशुज़ि दोतिंग परमेश्वरो वचन रुठेरांग समझाति। दोई कुड़ि, “मास्स तुई ए भविष्यवक्ताच़ि च़ेसि तरेर कि गै, मसीहबि बारदो उठाच़ि लेपोतो, सी लेपोतो आई ओल्ला शुम्मु ध्याड़ामेतिंग सीरिंगज़ि शिंग्मि लेपोतो।”

“दु भविष्यवक्ताच़ि दि ल च़ेसि तरेरे कि ग्यु च़ेलारेच़ि परमेश्वरो वचनो घोषणा लोरे। दोच़ि बत्तेतिंग पश्चाताप लेईमि थल्ज़ि कोरे। दोच़ि ध्यांह लरिरे सेत परमेश्वरे दोतु पापतिंग माफ लोतो। ग्यु च़ेलारेच़ि दि उजाबो प्रचार लज़ि यरुशेलमांगज़ि च़ुक्पोर। दाङ दोरे बत्ते जगहरिंग बत्ते जातो कचरिंग योरे। केरे बत्ते ग्यु इच़िच़ कामो ए गप्पो गवाह शुईं, चि गै कुत्तेग ए लत्तेग, आई दोऊ ल चि-चि गैरांग साथे शुचा।” " तूखा ङिन्ज़ामि ध्याड़ो धोपेल, यीशु एनो चेलारेतिंग मास्स फेरा प्रकट शुचा। इच़ा फेरा दु इच्च़े वक्तरिंङ ङराह बै चढ़े मीतिंग प्रकट शुचा! दोई एनो चेलारेतिंग तैईया पाटि कन्डि कि दु शिङि तोई, दाङ दोई दोतिंग परमेश्वरो राज्यज़ु पाटि शिक्षा रणिं।"

यीशुज़ि एनो च़ेला ताङ कुड़ि, “परमेश्वरे गिवि स्वर्ग ए धरतिऊ इच़ा-इच़ा मीऊ टोख्टे शासन लेइमि अधिकार रांशि ततु। दिऊ थल्ज़ि गै केतांग कुट्रताग इन्जे बत्ते जातियु मीतिंग च़ेला बनातुईं। ध्याहं लेईमि थल्ज़ि, केतिंग दोतु बा, यो ए पवित्र आत्माऊ मिन्ज़ि बप्तिस्मा रन्जि लेपोतो। चिधिर ल गै केतिंग आढेकिताग दु बत्ते गप्पा मनेक्च़ि दोतिंग सिखाच़ि लेपोतो। हिद ताईं, गै हमेशा केतांग साथे तोतोग।”

यीशु सीरिंगज़ि शिंगबिमि ङिन्ज़ामि ध्याड़ो थल्ल, दोई एनो च़ेलारेतिंग कुड़ि, “अपेल तचि ग्यु बा ज़ि केतिंग शक्ति मरमोतो धोपेल तचे यरुशेलमांग ए बांग्ज़ुईं। दोई केतु टोख्टे पवित्र आत्मा च़रचे ध्यांह लोतो।” दाङ यीशु स्वर्गांग अच़ा इलि, दाङ इच़ा डु ज़ि दोबि दोतु नज़रांगज़ि प्याके केरि। स्वर्गांग यीशु बत्ते चीज़तु टोखटे शासन लज़िम थल्ज़ि परमेशवरो सुचाङ आच़ि बांग्ज़ा च़रति।