43. कलीसियाज़ु च़ुक्सि

यीशुज़ु स्वर्गांग अच़ा इन्जे थल्ल, च़ेलारे यरुशेलमांग ए नच़िरे छना यीशुज़ि आदेश रन्दे। दोरतिगकि विश्वासि मीरे लगातार प्रार्थना लेईमि थल्ज़ि ठ्रोक्कन शुच़ा तोईरे।

हर साल, फसहउ त्योहारो ङिन्ज़ो सा ध्याड़ो थल्ल, यहूदि मीच़ि पिन्तेकुस्त मिन्दाङ इच़ा ज़रूरी ध्याड़ाबि मनाच़ि तोई। पिन्तेकुस दु मोक्का तोई अपेल यहुदि मीच़ि छ्वा वाल्ज़िरिंग मनेक्च़ि तोई। बत्ते ससांरांगज़ि यहुदि मीरे पिन्तेकुसो त्योहार मनाच़ि यरुशेलमांग अन्ज़ा तोईरे। दि साल, पिन्तेकुस मनाच़िम ध्याड़ा यीशु स्वर्गांग इबिमि इच़ा हफ्ताज़ु थल्ल आन्दे।

आंऊ घड़ि बत्ते विश्वासि मीरे इच़नम ठ्रोक्कन शुत्तेर, धोपेल आंऊ घरबारांग दोरे तोईरे खन्दा-मखन्दा दु तेज़ लन्दु चालाज़ि बिंङे इलि। दाङ मेलबतु ठ्रो तांग्छ़ा छा: बत्ते विश्वासीतु पुन्ज़तु टोख्टे प्रकट शुचा। दोरे बत्ते पवित्र आत्मारांग बिङे इलिरे दाङ दोच़ि उई मास्स भाषारिंग परमेश्वरो अराधना लेईरे। दि दु भाषारे तोईरे आंऊ दोतिंग कुचिम थल्ज़ि पवित्र आत्माज़ि तरछि लत्ते।

अपेल येरुशेलमांग बांगज़ाड़ मीचि दु हल्ला थज़िरे, धोपेल दोरे झुण्ड बनाट्रा दि खन्ड्रि इलिरे कि चि शुबि लेकि तो। दोच़ि विश्वासीतिंग परमेश्‍वरो लसि मोढ़े-मोढ़े कमो घोषणा लज़ि थज़िरे। दोरे हक्का बक्का तोईरे छेईकुचे दोच़ि दु कमतिंग एनतु ए भाषारिंग रेड्रिलेकि तोईरे।

दीतु बिचांगज़ि मिना मीच़ि कुईरे कि दु च़ेलारे क्योशि तोईरे। पर पतरसे खड़े शुचे कुड़ि, “ग्यु गप्पा रेजुईं! दिरे क्योशि मशुरे! दिऊ भोन्दे, केच़ि चि खन्जतईं दि दुए शु आंऊ योएल भविष्यवक्ताज़ि कुत्ते: परमेश्वरे कुड़ि, ‘अन्तो ध्याड़ारिंग, गै घ्यांञो आत्मा पोंङबोगा।’”

“हे इस्राइलो गांग्मिरे, यीशु इच़ा ध्यांह ठ्रो मी तोई आच़ि दि कान्जिम थल्ज़ि कि दु आरि तोई मास्स नोखे कम्म लत्ते। दोई परमेश्वरो बले मास्स अदभुत कम्मरे लत्ते। केच़ि दि ङेई, छेईकुचे दि कम्मतिंग तांग्सी ततईं। पर केच़ि दोबि क्रूसांग लोके केतईं!”

“यीशु सिए इन्जा तां ला परमेश्वरे दोबि सीऊ दोतु धुन्ना शिंग्बि लरि। दी दु गप्पा ल पूरा लरि छेबि इच़ा भविष्यवक्ताज़ि च़ेसि तरे: ‘केई केनो पवित्र मीबि कब्रांग ख्वाएक्च़ि मरपोन।’ ङेंरे गवाह शुंईं कि परमेश्वरे यीशुबी ओल्ला शिंगबि ले केत्तु।”

“परमेश्वर बा ज़ि द यीशुबि एनो सुचांऊहासि बिठाके आदर रन्दो। द यीशुज़ि हेन्दु थल्ज़ि पवित्र आत्मा च़रसि ततु छना कि दोई प्रतिज्ञा लत्ते कि गे च़रपोग। पवित्र आत्माज़िए दु काम्म शुबि रन्जा आंऊ दोतिंग केच़ि खन्जि ए थच़ि लेकि तोतोईं।”

“केच़ि दु मि, यीशुबि क्रूसरिंग लोके केतईं। पर दि रुठ्ठे ङेओईं कि परमेश्वरे यीशुबि बत्ते चीज़तु प्रभु ए मसीह जुल्ला बनाशि ततु!”

पतरसबि रेड्राड़ मीच़ि दोऊ कुशि गप्पारांग तोंङ तचे तुरचे इन्देर। दिऊ थल्ज़ि दोच़ि पतरस ए च़ेलातांग रुक्तिरे, “हे काकारे, हेन्‍दिंग चि लज़ि लेपोतो?”

पतरसे दोतिंग जवाब रैईं, “केतु बिचांगज़ि बत्तेच़ि केन्दु पापो पश्चाताप लाईं ताकि परमेश्वरे केतु पापबि माफ लोतो, आई यीशु मसीहज़ु मिन्ज़ि बपतिस्मा लेप्तुईं। दाङ दोई केतिंग वरदानो रूपरिंग पवित्र आत्मा ल रमोतो।”

पतरसे चि कुत्ते दोऊ टोख्टे लगभग 3,000 मीच़ि विश्वास लरिरे दाङ यीशुज़ु च़ेला बनेके इलिरे। दोच़ि बपतिस्मा लेप्तिरे दाङ येरुशेलमो कलीसिया ज़ु हिस्सा बनेके इलिरे।

अपेल प्रेरितच़ि दोतिंग शिक्षा रेईंरे बिश्वासिरेच़ि दाङ लगातार रेड्रिरे। दोरे च़म्बे दौआ लज़ि तोई दाङ साथे बगत ल ज़ेई तोई, दोच़ि एनतु थल्ज़ि प्रार्थना ल लज़ि तोई। दोच़ि ठ्रौक्कन शुचे परमेश्वरबि हिद लेईरे आई चिधिर ल दोतु कचरिंग तोई एनतु बिचांग फारिरे। नगरो इच़िच़ मीच़ि दोतु थल्ज़ि रुठे सेम तच़ि तोई। रोजे, मास्स मीरे विश्वासी बनेक्पा लेईरे।