44. पतरस ए यूहन्नाज़ि इच़ा भिखारीबि ठीक लज़ि

इच़ा ध्याड़ा, पतरसे यूहन्ना मन्दिर इलिकु। इच़ा अपंग मी भीख पेचिमि थल्ज़ि पितांगरिंग बांग्सि तोई।

पतरसे दु लाटे मीऊहाखा खणिं दाङ कुड़ि, “ग्यु कचरिंग कनिंग रन्ड्रिम थल्ज़ि ढबा त मा। पर चि ग्यु कचरिंग तो दु गै कनिंग रमोगा। यीशु मिन लेप्चे, आच़ु दाङ जोऊ!”

युरने, परमेश्वरे दु लाटे मीबि ठीक ले केरि। दोई देखा-नोखा जोई ए छ्वाड़ रन्ड्रि ए, परमेश्वरबी शबस लेई च़ुक्ति। मन्दिरो ल्वाड़िंग तोचि मीरे हैरान शुईरे।

युरने मीतु इच़ा भीड़ दु मीबि खान्ड्रि आतिरे आऊं दु ठीक शुत्ते। पतरसे दोतांग कुड़ि, “दि मी ठीक तो, पर दि गप्पाउ टोख्टे हैरान थशूईं। ङेच़ि दिबि हेन्दु शक्तिज़ि कुचे ठीक मलईं, या दिऊ थल्ज़ि मलईं कि ङेच़ि परमेश्वरो आदर लज़तईं। ब्लकि, दु यीशु शु आच़ि दि मीबि एनो शक्तिज़ि ठीक लत्तु, छेई कुचे ङेच़ि यीशु टोख्टे विश्वास लज़तईं।”

“दु का ए शुना आच़ि रोमो राज्यपालबि यीशुबि साचे केचिम थल्ज़ि कुत्ते। केई दोबि साचे केरिन आच़ि बत्तेतिंग जीवन रन्ड्रि तोई। पर परमेश्वरे दोबि सी दोतु धुन्ना शिंगमि लत्तु। केई दि मसमझेक्सिरिन कि केई चि लज़तन, पर अपेल केई दु कम्मरे लज़ि लेकि तोईन, दाङ धोपेल चि भविष्य कुचाड़रेच़ि कुत्तेर दु पूरा शुई। दोच़ि कुत्तेर कि मसीहबि मास्स बारदो शोतो दाङ दु सिए योतो। परमेश्वरे दोबि दि तरीकाज़ि शुबि रणिं। दिऊ थल्ज़ि द, पश्चाताप लोऊ दाङ परमेश्वरो हाखा किरज़ु, ताकि दोई कनु पापतिंग शुल्जे केओतो।”

अपेल मन्दिरो धार्मिक प्रधानच़ि पतरसे युहन्नाबि रेड्रिरे, धोपेल दोरे बैइ इलिरे। दोऊ थल्ज़ि दोच़ि दोबि च़ुम्मे जेलांग केचि केरिरे। पर पतरसे चि-चि कुते दोऊ टोखटे मास्स मीच़ि विश्वास लरिरे। यीशु टोख्टे विश्वास लजाड़रे बेसा ङां हजार शुचे इलिरे।

ओईराग, दु यहुदि प्रधानच़ि पतरसे युहन्नाबि मोढ़े यहुदि पुजारी ए उई धार्मिक नेतातु तुईच़ि लेन्ज़ा हातिरे। दोरे दु मीबि ल लेन्ज़ा अतिरे आंउ दु लटे तोई। दोचि पतरसे युहन्नाराङ रुक्तिरे, “चि अधिकारे केच़ि दि मीबि ठीक लत्तई?”

पतरसे जवाब रणिं, “दि मी आंऊ केतु तुईच़ि खड़े तो दोबि यीशु मसीहज़ु शक्तिज़ि ठीकलत्तु। केच़ि यीशुबि क्रूसो टोख्टे चढाके केतईं, पर परमेश्वरे दोबि ओल्ला शिंगबि ले केरि! केच़ि दोबि म अपनातिईं, पर यीशुऊ शक्तिऊ अम्म क चढ़े उई उधारो छल्ले अम्म म!”

दु अगुवारे हैरान तोईरे कि पतरसे युहन्नाज़ि मास्स हिम्मत राङ गप्पा लत्‍तेर। दोच़ि ख्यंतोर कि दोरे आम ए अनपढ़ गांग्मिरे तोइरे। दाङ दोतिंग हिद आति कि दोरे यीशुरांग बांगसि तोईरे। दिऊ थल्ज़ि दोच़ि दोतिंग कुड़िरे, “ङेच़ि केतिंग सज़ा रमोई अगर केच़ि यीशु उई छा उजाब उई मीतिंग रमोई।” ध्याहं ठ्रो मास्स गप्पा ले थल्ल, दोच़ि पतरसे युहन्नाबि इबि रन्दोर।