10. दस विपत्तियाँ

परमेश्वर न मुसा अन् हरून ला चेतावणी दिस की फिरोन हठीलो होय जान. जब वय फिरोन पास गयो, तब बलीस, “इस्रायल को परमेश्वर असे बलते, मोरो लोकामान जान दे. पण फिरोन न उनकी नई आयकीस, मंग इस्रायली येनला जानदेबसाठी स्वतंत्र करबोको बजाय, ओन उनला अजून कठीण परिश्रम करबसाठी मजबूर करीस.

फिरोन वय लोकला जान देबसाठी लगातार मना करत होतो, येकोसाठी परमेश्वर न मिस्त्र बऱ्या दस भयंकर विपत्ती पठाईस. येन विपत्ती को द्वारा परमेश्वर न फिरोन ला देखाईस कि ओ फिरोन अन् मिस्त्र को देवता पेक्षा ओ जास्त शक्तिशाली होतो.

परमेश्वर न नील नदीला रक्त मा बदलाईस, पण फिरोन न आबपण इस्रायलीयो ला जान नई दिस.

परमेश्वर न संपूर्ण मिस्त्र मा मेंढक पठाईस. फिरोन न मेंढको ला दूर करबसाठी मुसा ला अनुरोध करीस, पण सर्वा मेंढको को मरबको को बाद, फिरोन न आपलो मन ला कठोर कर टाकिस. अन् इस्रायलीयो ला मिस्त्र लक नीकरबला मना करीस.

येकोसाठी परमेश्वर न कुटकीयो कि विपत्ती पठाईस. ओको बाद ओन डासो कि विपत्ती पठाईस. फिरोन न मुसा अन् हरून ला बलाईस अन् उनला बलीस कि, जर वय वा विपत्ती ला रोक सकन त इस्राएली मिस्त्रला सोडकेना जाय सकते. जब मुसा न प्रार्थना करीस त परमेश्वर न मिस्त्र बऱ्या लक डासो ला हटाय दिस. पण फिरोन न आपलो मन ला कठोर कर टाकिस अन् वय लोकला स्वतंत्र होयकेना नई जान दिस.

यको सामन्य, परमेश्वर न मिस्त्रियो का सर्वा जनावरला बिमार होयकेन मर जान दिस. पण फिरोन को मन कठोर भयो होतो. अन् ओन इस्रायलीयो ला जान नई दिस.

तब परमेश्वर न मुसा ला फिरोन सामन्या हवामा राख फेकबला बलीस, जब ओन अशो करीस, तब मिस्त्र कि लोक कि त्वचा बऱ्या पीडादायक फोडो नीकर आया, पण इस्रायलीयो ला काई नई भयो. परमेश्वर न फिरोन को मनला कठोर कर टाकिस अन् फिरोन न इस्रायलीयो ला स्वतंत्र होयकेन जान नई दिस.

यकोबाद परमेश्वर न बरफ का गोला पाडीस अन् मिस्त्र लक जास्तीत-जास्त फसल ला नष्ट करीस. जो कोणी भी भायर निकरे ओन मार टाकिस. फिरोन न मुसा अन् हारून ला बलाईस अन् उनला बलीस, “मी न पाप कऱ्याहून, तुमी जाय सकतो.” आखिर मुसा न प्रार्थना करीस अन् आकाश लक बरफ का गोला पडनो थांबे.

पण फिरोन न अजून पाप करीस अन् आपलो मनला कठोर कर लेईस. ओन इस्त्रायलीयो ला स्वतंत्र होयकेना जान नई दिस.

आखिर परमेश्वर न मिस्त्र बऱ्या टिड्डियो का दल ला आवन दिस. वय टिड्डियो न वय सारी फसल ला खाय टाकिस, जेला बरफ को गोला न नाश नई करीस होती.

मंग परमेश्वर न अंधार करीस, जो तीन दिवस पर्यंत बने रयने. यो एवढो घोर होतो कि, मिस्त्री लोकं आपलो घरलक नई निकरे पाहिजे. पण जमा इस्रायली लोकं रहत होतो, वमा उजेड होतो.

येन नऊ विपत्ती को बाद पण फिरोन न इस्रायलीयो ला स्वतंत्र होयकेना जान देबलक मनाई करीस. कारण फिरोन न नई आयकीस. यकोसाठी परमेश्वर न एक आखरी विपत्ती ला पठायबकि योजना करीस. वय फिरोन को मनला बदल टाकन.