9. परमेश्वर मुसाला बलावत होतो

युसुफ को मरबको बादमा ओको सब रीश्तेदार मिस्र मा बस गया. वो अन् ओको वंशज कई साल पर्यत मिस्र माच रयन्या अन् उन्होन् लगीत पोऱ्यामान उत्पन्न करीस. उनला इस्त्रायली बलीस.

लगीत सव सालको बादमा इस्त्रायली कि संख्या लगी बढ गई. अन् मिस्री लोकमान या गोष्ट सी आभारी नई होता की उनकी मदत करबसाठी युसुफ न लगीत काई करीस हा वय इस्त्रायलीयो पासल डर गया कारण वय संख्या मा उनको पेक्षा जास्त होतो. योकोसाठी ओ वेळमा मिस्री बऱ्या शासन करने वालो फिरोन न इस्त्रायलीयो ला मिस्रियोको दास बनाईस.

मिस्त्रीयोने इस्राएलीयो ला लगीत सारी इमारत अन् उनला कई नगर ला बनाबसाठी मजबूर करीस. वो कठीण मेहनत न उनकी जीवनला लगीत दुखदायी बनाईस, पण परमेश्वर उनला आशिष देईस अन् उनको पासल अजून जास्त पोऱ्यामान उत्पन्न भया.

फिरोन न देखीस की, इस्रायली ला लगीत पोऱ्यामान उत्पन्न होत होता, योकोसाठी उन्होन आपला लोकमानला इस्राएली का पूर्ण नर पोऱ्यामान नील नदी मा फेक्केन मारबोको आदेश देईस.

एक विशेष इस्राएली बाई न एक नर पोऱ्या ला जन्म देईस. वान अन् ओको नवरान जेवळो उनकोन होय सके, ओ पोऱ्या ला लपायकेना ठेईस.

जब ओ पोऱ्या का माता-पिता ओला अजून नई लपाय सके, तब उन्होन ओला मरनु पासलक बाचाबसाठी एक तैरणी वाली टोपली मा नील नदी को किनारबरत्या सरकीडो को बिचमा ठेय देईस. ओको मोठी बईन न यो देखबसाठी ओकी निगराणी करीस को ओको संग काय होन.

फिरोन कि पोरगी न वा टोपली ला देखकेन ओको अंदर झाकिस. जब वान एक बच्चा ला देखीस त वान ओला आपलो बच्चा को रुपमा लैय लेईस. वान एक इस्राएली बाईला ओला दुध पिवाबसाठी काम बरत्या ठेईस होतीस, बिना यो जाणे कि वा ओ बच्चा कि वास्तविक माता होती. जब ओ बच्चा येवळो मोठो भय गयो कि आब ओला ओकी माय को दुध कि जरुरत नई होती. तब वान फिरोन की पोरगी पास ओला देय देईस, ओको नाव मुसा होतो.

एक दिवस जब मुसा मोठो भयो, तब ओन देखीस कि एक मिस्री एक इस्राएली ला मारत होतो. मुसा नं आपलो साथी इस्राएली ला बाचाबसाठी प्रयत्न करीस.

जब मुसा न विचार करीस की ओला कोणीच नई देखन, तब ओन ओ मिस्त्री ला मार टाकिस अन् ओको शव ला दफनाय देईस. पण मुसा न जो करीस होतीस ओला कोणी तरी देख लेयतीस.

फिरोन ला माईत भयतो की मुसा न काय करीस हा. ओन ओला मार टाकबकि प्रयत्न करीस, पण मुसा मिस्री लक जंगल मा पाराय गयो. फिरोन का सैनिक ओला ढूंड नई सक्या.

मिस्र लक दूर जंगलमा मुसा एक चरवाहा बन गयो होतो. ओन वामा एक बाई संग लगन करीस अन् दुय पोऱ्यामान उत्पन्न करीस.

मुसा आपलो सुसरो को भेड को झुंड की देखरेख करत होतो. एक दिवस ओन एक जळती हुई झाडी ला देखीस जो भस्म भयो बिना जळत होती. ओलो देखबसाठी वो वा झाडी पास गयो. जब वो ओको लगीत जवळ होतो तब परमेश्वर न ओको संग गोष्ट करीस ओन् बलीस, “ऐ मुसा आपली जुती ला उतार. तु एका पवित्रा जागा बऱ्या उभो हास.”

परमेश्वर न बलीस, “मीन् आपलो लोकमानको दुखला देख्यातुन. मी तोला फिरोन पास पठाऊन ताकी तु इस्रायेलियो ला मिस्र को दासत्व लक काढके आनस. मी उनला कनान देश देवून, ओ देश मीन् अब्राहम, इसहाक, अन् याकुब पासल प्रतिज्ञा कऱ्याऊन.”

मुसा न विचारिस, “जर लोकमान न जानुन चाहीस की मला कोन पठाइस हा तर मि काय बलून?” परमेश्वर न बलीस, “मी हाऊन न मला तुमरो पास पठाईस हा.उनला यो पण सांग, “मी तुमरो पूर्वज अब्राहम, इसहाक अन् याकुब को परमेश्वर यहोवा हाऊन. मोरो यो नाव हमेशा साठी हा.”

मुसा डरत होतो अन् फिरोन पास जानु नई चाहत होतो, कारण ओन विचार करीस की वो चांगलो नई बोल सकत. योकोसाठी परमेश्वर न मुसा को भाई, हारून ला ओकी मदत करबला पठाईस.