8. परमेश्वर यूसुफ अन् उसको परिवार ला बचाईस हा

लगीत साल को बाद आब याकुब बुढा भयो होतो. त ओनो आपलो प्रिय पुत्र युसुफ ला ओको भाईमान कि छानबीन करबला पठाईस, जो जनावरो कि झुंडो कि देखभाल करत होता.

युसुफ का भाईमान ओको संग इर्ष्या करत होतो, कारण उनको पिता ओला जास्त प्रेम करत होतो अन् यकोसाठी पण की युसुफ न स्वप्न देखीस होतो की वो उनको शासक बनन. जब युसुफ आपलो भाईमान पास आलो तब उनन ओला बंधक बनालीस अन् ओला दासो को व्यापार करणाराला बिक टाकीस.

घर वापस आबोको पहिले युसुफ का भाईमान न युसुफ का कपडा फाडकेना बकरी को रक्त मा भिजाय टाकिस. मंग उनव वय कापडाला आपलो पिताला देखाईस, की वो असो विचार करन कि, कोणतो जंगली जनावर युसुफ ला मारिस हा. याकुब लगीत उदास होता.

दासो को व्यापार करणारा वय लोक युसुफ ला मिसर लेयकेना गया. नील नदी को किनारो बऱ्या बस्यो मिसर एक विशाल अन् शक्तीशाली देश होतो. वय दासो को व्यापार करणारा लोकन युसुफ ला एक धनी सरकारी अधिकारी ला दास को रुपमा बेच टाकिस. युसफ न आपलो स्वामी कि चांगलोन सेवा करीस. परमेश्वर न् युसुफ ला आशिष दिस.

ओको स्वामी कि बायकोन ओको संग सोबकी कोशिश करीस, पण युसुफ न यनो रीत न परमेश्वर को विरुद्ध पाप करबसाठी इंकार कर टाकिस. वा क्रोधीत भई अन् युसुफ बऱ्या खोटो आरोप लगाय टाकिस. यकोसाठी ओला गिरफ्तार करकेना जेलखाना भेज दियो गयो. युसुफ परमेश्वर को प्रती सच्चो होतो अन् परमेश्वर न ओला आशिष दिस.

दुय साल को बाद, युसुफ आबपण जेलखाना मा होतो. भलो हि वो निर्दोष होतो. एक रात फिरोन, जसो की मिस्री लोक आपलो राजाला आवाज देत होतो, न दुय स्वप्न देखीस, जेकोन ओला लगीत विचलित कर टाकिस. ओको कोणीच सलाहाकार ओलो ओ स्वप्नो को अर्थ नई सांग पायो.

परमेश्वर न युसुफ ला स्वप्न को अर्थ सांगबकी क्षमता प्रदान करीस होती. यकोसाठी फिरोन न युसुफ ला जेलखानालक आपलो पास बलाईस. युसुफ न ओला ओ स्वप्न को अर्थ सांगिस अन् बलीस “परमेश्वर भार्पुरी को फसलो वालो सात साल को बाद अकाल का सात साल पाठवणार हा.”

फिरोन युसुफ संग एवढो प्रभावित भयो कि, ओनो ओला मिस्त्र को दुसरो सर्वात शक्तिशाली माणूस नियुक्त कर टाकिस.

युसुफ न लोकसंग चांगलो फासलवाली सात साल पर्यंत मोठो मात्रामा भोजनला जमा करबसाठी बलीस. जाब सात साल को अकाल आयो, तब युसुफ न लोकला वो भोजन बिकीस, जेकोन उनको जवळ खाबसाठी पर्याप्त होतो.

ओ अकाल फक्त मिस्त्र माच नई पण कनान मा भी भयंकर होतो, जमा याकुब अन् ओको परिवार रहत होतो.

यकोसाठी याकुब न आपलो सर्वात मोठो पुत्राला भोजन खारीदबसाठी मिस्त्र मा पठाईस. जाब ओ भोजन खरीदबसाठी युसुफ को सामन्या उभो भयो, वय भाईमान न युसुफ ला नई ओळखीस, पण युसुफ न ओला ओळख टाकिस.

यो मालूम करबसाठी काय वय बदल भयो हा, ओको जाच करबोको बादमा युसुफ न उनला बलीस, “मी तुमरो भाई युसुफ हाऊन. डरो नको जब तुमन मला दासको रूप मा बिकीस होतीस, त तुमीन बुरो करबीस ठानी होती, पण परमेश्वर न ओ बुराईला को भलाईसाठी उपयोग करीस. आओअब मिस्त्र मा रहो, ताकी मी तुमरो अन् तुमरो परिवार साठी भोजन को प्रबंध कराब.”

जब युसुफ को भाई घर वापस आयो अन् आपलो पिता याकुब ला सांगिस कि युसुफ आबपण जिवंत हा, तब ओ लगीत प्रसन्न भयो होतो.

पण याकुब एक बुढो माणूस होतो तरी ओ आपलो पूर्ण परिवार को संग मिस्त्र को चलो गयो. अन् वय वामासांग बस गया. याकुब को मरबोको पहिले ओन आपली प्रत्येक पुत्र ला आशिषित करीस.

वाचा की वय प्रतिज्ञा जो परमेश्वर न अब्राहम संग करीस होतीस वा इसहाक बऱ्या अन् ओको बाद याकुब अन् उनको परिवार बऱ्या आयी होती. वय बारा पुत्रो को वंशज इस्त्रायल का बारा गोत्र बन गया.