12. निर्गमन

इस्राएली लोकमान मिस्त्र लक निकरकेन लगीत प्रसन्न होता. वय अब दास नई होता. वय अब प्रतिज्ञा को देश मा जात होता. जो काईपण इस्रायेलीयो न मांगीस, मिस्त्रीयो न उनलावो सर्वकाई देईस, यात पर्यंत कि सोना अन् चांदी अन् अजून किमती वस्तू. दुसरा देशका काही लोकमान परमेश्वर बऱ्या विश्वास करीस अन् जब इस्राएली लोक मिस्त्र लक नीकऱ्या, मंग वय पण उनको संग चली गया.

दिवस मा बादल को एक विशाल खंबा उनको सामने-सामने चलत होतो अन् रात को वेळेस वो आग को खंबा बन गयो. परमेश्वर जो कि वो बादल को खंबा मा अन्आग को खंबा मा होतो, हमेशा ओको संग होतो अन् ओन यात्रा करबोको वेळेस ओकि अगुवाई करीस. उनला फक्त येवळो करबोको होतो कि ओको मांग चलबोको होतो.

थोडो वेळको बाद फिरोन अन् ओको लोकमान आपलो मनला बदल देईस. वय इस्राएलीयो ला अजून आपलो दास बनावून चाहत होतो. येकोसाठी उन्हो न इस्रायेलीयो को पिछा करीस. वो परमेश्वर होतो ज्याने ओको मनला बदल देईस होतीस. ओन असे योकोसाठी करीस कारण ओ चाहत होतो कि हर कोणी यो जान ले की फिरोन अन् मिस्त्रियो का सर्व देवताओ लक यहोवा, जास्त शक्तिशाली हा.

जब इस्राएलीयो न मिस्त्र कि सेना ला आवतो देखीस त उनला मालूम भयो की वय फिरोन कि सेना अन् लाल समुद्र को बीच मा फस गया. वय लगीत डर गया अन् रोयबला लाग्या, “आपण मिस्त्र ला केल्ला सोडेन? आपण मारणार हान.”

मूसा न इस्राएलियों ला बलीस, “डरनु बंद करो. परमेश्वर आज तुम्हरो साठी लडन अन् तुमला बचावन.”तब परमेश्वर न मुसा ला बलीस, “यो लोकमान ला लाल समुद्र कुद्या सामने जाबला सांग.

तब परमेश्वर न ओ बादल को खंबा ला लेयकेन इस्रायेलीयो अन् मिस्त्रियो को बीच मा ठेय देईस. ताकी मिस्त्र लोक इस्रायेलीयो ला देख ना सके.

परमेश्वर न मुसा ला समुद्र बऱ्या आपलो हाथ बढाबला सांगिस, मंग परमेश्वर न हवा लक समुद्र को पाणी ला उजवो अन् डावो कुद्या कर देईस, जसे कि समुद्र लक एक रस्ता बन गयो.

इस्राएली लोक आपलो दुई कुद्या पाणी कि दिवार को साथ भूमी बरत्या समुद्र लक होयकेन सामने चली गया.

तब परमेश्वर न ओ रस्ता लक बादलला उचाल टाकिस, कारण मिस्त्री लोक इस्राएलीयो ला बाचकेन जातो देख सके. मिस्त्रीयोने उनला पकडबसाठी उसकी पिछा करबको निर्णय लेईस.

आखिर उन्होने समुद्र को माध्यम लक ओ रस्ता लक इस्रायलीयो को पिछा करीस, पण परमेश्वर न मिस्त्रियो ला घबराय टाकिस अन् उनको रथला अटकाय देईस. वय चिल्ला-बल्ला लाग्या “भागो! इस्रायलीयो को कुद्याल परमेश्वर लडन्या.”

सर्वा इस्रायली समुद्र को दुसऱ्या कुद्या चली गया. तब परमेश्वर मुसाला बलीस कि, तू अजून पाणी बऱ्या हाथ बढाव. जब मुसा न असे करीस, तब पाणी मिस्त्री सेना बऱ्या आय पडे अन् आपली सामान्य स्तिथी मा भय गयो. सर्वो मिस्त्री सेना डूब गई.

जब इस्राएलियो न देखीस कि मिस्त्री मर गया हा, तब उन्होन परमेश्वर बऱ्या विश्वास करीस. उन्होन विश्वास करीस कि मुसा परमेश्वर कुद्याल भविष्यवक्ता हा.

इस्राएली लोक योकोसाठी पण लगीत खुश होता कि परमेश्वर न उनला मरबला अन् उनको दास होबसाठी बचाईस. आब वय परमेश्वर कि आराधना करबला अन् ओकि आज्ञा को पालन करबला स्वतंत्र होता. इस्रायेलीयो न आपली स्वतंत्रता को उत्सव मनाबसाठी अन् परमेश्वर की प्रशंसा करबसाठी लगीत गाना बलीस कारण ओन उनला मिस्त्रियो की सेना लक बचाईस होतीस.

परमेश्वर न इस्राएलियो ला हर साल एक त्योहार मनाबोको आदेश देईस, यो याद दिलाबसाठी की परमेश्वर न मिस्त्रीयोला हराईस अन् उनला दास होबलक स्वतंत्र करीस. यो फसह को त्योहार कहलाईस. यमा उनला योको त्योहारमनाबसाठी एक स्वस्थ मेमना कि बली करबोको होतो. ओला भूजबोको होतो अन् ओला बिना खमीर वाली रोटी संग खाबोको होतो.