13. इस्राएल को संग परमेश्वर की वाचा

इस्राएलियों ला लाल समुद्र को पार लेय जाबोको बाद, परमेश्वर उनला जंगल लक होयकेना सीने बलनोवालो पर्वत कुद्या लेयकेन गयो. यो वोच पर्वत होतो जमा मुसा न जळती हुई झाड ला देखीस होती. वय लोक न पर्वत को खाल्या आपलो तंबूला स्थापित करीस.

परमेश्वर न मूसा संग अन् इस्रायल का सर्वा लोकला बलीस, “तुमला हमेशा मोरी गोष्ट ला मानबोको हा अन् जा वाचा मी तुमरो संग बांधतून ओला बनायकेना ठेबोको हा. जर तुमी अश्यो करतो, त तुमी मोरा पुरस्कार बहुमुल्य धन, याजको को राज्य अन् पवित्र जाती ठयरेन.”

परमेश्वर पासल ओको पास आब साठी लोक न तीन दिवस पर्यंत खुदला तयार करीस. तब परमेश्वर सिने पर्वत को चोटी बऱ्यालक खाल्या उतरे. जब वो आयो त भूकंप भयो, बिजलीया चमकी, धुआ उठे अन् तुरहियो को जोरदार शब्द भयो. तब मुसा खुद पर्वत बऱ्या चढ गयो.

तब परमेश्वर न लोक संग एक वाचा बांधिस. ओन बलीस, “मी तुमरो परमेश्वर य्होवा हून. मीच हून जेन तुमला मिस्त्र को चंगूल लक सोडाईस. कोणतो अन्य देवता कि उपासना नको करस.”

"मूर्तियाँ नको बनावस अन् ओकी उपासना नको करस, कारण मी यहोवा तुमरो एकमात्र परमेश्वर हून. अनुचित रित संग मोरो नाव को उपयोग नको करस. सहत को दिवस ला पवित्र मानबसाठी स्मरण ठेवस. दुसरो शब्द मा सय दिवस मा आपला सर्वा काम करस, सतवो दिवस तुमरो साठी आराम करबसाठी अन् मला स्मरण करबोको दिवस हय.

"आपलो माता अन् पिता को आदर करस. हत्या नको करस. व्यभिचार नको करस. आपलो पडोसी कि बायको ओको घर अन् उनको कोणते पण सामान ला लेबकी इच्छा नको करस.

तब परमेश्वर न या दस आज्ञा ला पत्थर कि दुय पटीया बऱ्या लिखकेना मुसा ला देय दिस. परमेश्वर पालन करबसाठी लोकला यो व्यवस्थाओ को पालन करीस त परमेश्वर न वो लोकला आशिष देबकी अन् सुरक्षा करबकी प्रतिज्ञा करीस. पण ओन बलीस कि जर उन्होन यको पालन नई करीस त ओ उनला दंडीत करण.

परमेश्वर न इस्राएलियों ला एक विशाल तंबू बनबसाठी बलीस,–मिलाप वालो तंबू। ओन ओला ठीक-ठीक सांगिस की येन तंबूला कसे बनाबको हा अन् ओको अंदर कोणते चीजला ठेबोको हा. ओन ओला ओ तंबू ला दुय खोली मा विभाजित करबसाठी एक विशाल पडदा ला बनाबसाठी बलीस. परमेश्वर ओ पडदा को मंग वालो खोली मा आवन अन् वमाच रहन. जमा परमेश्वर होतो ओ खोली मा जाबकी अनुमती फक्त महायाजक ला होती.

वय लोकला ओ मिलाप वालो तंबू को सामन्या एक वेदीला बनाबको होतो. कोणी पण जो परमेश्वर को व्यवस्था को अवज्ञा करन ओ ओन वेदी बऱ्या एक जानवर को लेयकेना आवन. तब याजक ओला बली करन अन् वेदी बऱ्या परमेश्वर साठी बली को रूप मा जळावन. परमेश्वर न बलीस कि ओन जनावर को रक्त ओन व्यक्ती को पाप ला झाक टाकन. यनो रित न आब परमेश्वर वय पाप ला नई देखन, वय व्यक्ती परमेश्वर को नजरमा शुद्ध ठयरन. परमेश्वर न मुसा को भाई हारून ला अन् हरून को वंशज ला आपलो याजक होबोसाठी निवडीस.

परमेश्वर न वय लोकला जो नियम दिस होती, वय उनको पालन करबसाठी सहमत भयो. वय फक्त परमेश्वर का लोकं होबसाठी अन् फक्त ओकी आराधना करबसाठी सहमत भयो.

लगीत दिवस पर्यंत मुसा सीने पर्वत बऱ्या कि चोटी बऱ्या रयने, वो परमेश्वर सन गोष्ट सांगत होतो. पण लोक ओको पास वापस जाबसाठी प्रतीक्षा कर करकेना थक गया. यकोसाठी वय हारून पास सोना लेयकेना आयो अन् ओलाएक मूर्ती बनाबला लगाईस, ताकी वय परमेश्वर का अलावा ओकी उपासना करन. यनो रित न उन्होन भयंकर रुप न परमेश्वर के विरुद्ध पाप करीस.

हारून न बछडा को आकार मा सोनो की एक मूर्ती बनाईस. वय लोक न वा मूर्ती कि उपासना करबला सुरवात करीस अन् ओला बली चढाईस. उनको पाप को यकोन परमेश्वर उनको संग लगीत क्रोधीत भयो होतो, वो उनला नष्ट करबला देखत होतो, पण मुसा न उनला नई मारबोको परमेश्वर संग अनुरोध करीस. परमेश्वर न ओको अनुरोधला आयकीस अन् उनला नष्ट नई करीस.

आखिरकार मूसा सीनै पर्वत बऱ्यालक खाल्या उतर आयो. वो वय दुय पत्थर कि पटीया ओला लेकेन होता. जेको बऱ्या परमेश्वर न दस आज्ञाला लेखीस होती. ओ एवढा क्रोधीत भयो कि ओन वय पटीयाओ ला चकनाचूर करीस.

मंग मुसा न वो मूर्ती ला पीस केना ओको बुरादा बनाया टाकिस, अन् ओ बुरादाला पाणी मा मिलायकना वय लोक ला वो पाणी पिलाय दिस. परमेश्वर न वय लोकबऱ्या एक विपत्ती पठाईस अन् उनको मातल लगीत लोक मर गया.

जो पटीयाओ ला मुसा न तोडीस होतीस होतीस, ओको स्थान लेबसाठी मुसा न वय दस आज्ञा का पत्थर का नवीन पटीया ला बनाईस. तब वो अजून पर्वत बऱ्या चढ गयो अन् प्रार्थना करीस कि परमेश्वर वय लोकला क्षमा कर परमेश्वर न मुसा की आयकीस अन् उनला क्षमा करीस. नवीन पटीया बऱ्या दस आज्ञाला लेयकेना मुसा पर्वत बऱ्या लक खाल्या उतर आयो. तब परमेश्वर न सीने पर्वत पासलक प्रतिज्ञा को देश पर्यंत इस्रायेलीयो की अगुवाई करीस.