14. जंगल मा भटकनो

परमेश्वर न इस्राएलियों ला वय नियम सांगबला खतम करीस ज्योको उनला बांधी गई वाचा को कारण पालन करबोको होतो. मंग ओन सीने पर्वत को सामने उनकी अगुवाई करीस. वो उनला प्रतिज्ञा को देशा लेयकेन जानु चाहत होतो. वो देशला कनान भी बोलत होता. परमेश्वर बादल को खंबा मा उनको सामने-सामने चलेअन् वय ओको मंग-मंग चल्या.

परमेश्वर न अब्राहम, इसहाक अन् याकूब संग प्रतिज्ञा करीस होतीस की वो प्रतिज्ञा को देश उनको वंशज ला देन, पण यो वेळी वामासंग लगीत सी जाती रहत होती. उनला कनानी बलत होता. वय कनानी लोक\ परमेश्वर की आराधना नई करत होता अन् उनकी आज्ञा ला नई मानत होता. वय झूठा देवताओकि उपासना करत होता अन् लगीत बुरा काम करत होता.

परमेश्वर न इस्राएलियों ला बलीस, “जब तुम्ही ओन वाचा को देश मा जावो, त वतजा का सर्वा कनानीयो लक छुटकारा को पावस. ओको संग संधी नको करस अन् उनको संग विवाह नको करस. तुमला उनकी सर्वो मूर्तीला पूर्ण तरहन नष्ट करबोको हा, जर तुम्ही मोरी आज्ञाला नई मानस, त तुम्ही मोरो बजाय उनको देवताओ की उपासना करबला लागस.”

जब इस्राएली कनान की सीमा बऱ्या पहुचा, मुसा न इस्राएल का प्रत्येक गोत्र मा लक एक-एक करकेना बारा पुरुषला चुनीस. ओन उनला जायकेना वो देश को भेद लेबोको निर्देश दिस की देखबोको कि वो देश हा, उनला ओन कनानीयो को भेद पण लेबोको होतो, कि देखबोको कि वय बलशाली होता, की निर्बल होता.

ओन बारा पुरुषो न कनान लक होयकेन्या चालीस दिवस की यात्रा करीस अन् मंग वय वापिस लौटकेन्या आया. उन्होन लोकला सांगिस, “वो देश लगीत उपजाऊ हा अन् फसल बहुतायत की हा!” पण दस भेदियो न बलीस, “उनको नगर लगीत दृढ हा अन् वय लोक लंबा-चौडा हा. जर आम्ही उनको बऱ्या हमला करतन त निशित रूप न वय आमला पराजित कर देन अन् आमला मार टाकन.”

तुरन्त कालेब अन् यहोशू अन् अन्य दुय भेदियो न बलीस, “यो खर हा की कनान का लोक लंबाअन् बलशाली हा, पण निश्चित रूप न आम्ही उनला पराजित करब शकतन. परमेश्वर आमरो साठी लढन.”

पण लोक न कालेब अन् यहोशु कि नई आयकीस. वय मुसा अन् हारून बऱ्या क्रोधीत भय गयो. अन् बलीस, “तुम्ही आम्हाला योन भयंकर ठिकण बऱ्या कायकोसाठी लेयकेन्या आयो हा? आम्हाला मिस्त्र माच रयबला पाहिजे होतो. जर आम्ही ओन देशमा जाबन त आम्ही युद्ध मा माऱ्या जाबन अन् कानान का लोक आमरी बायको अन् पोऱ्या ला दास बनायलेन.” वय लोक उनला वापस मिस्त्र मा लेयकेन्या जाबसाठी एक अन्य अगुवोला चूनबोको चाहत होतो.

जब वय लोक न असो बलीस त परमेश्वर लगीत क्रोधीत भय गयो. वय मिलाप वालो तंबू मा आयो अन् बलीस, “तुमी न मोरो विरुद्ध बलवा करीस हा, यकोसाठी तुम्ही सर्वाला यनो जंगलमा भटकनो पडन. हर एक जो बीस साल या ओको पेक्षा अधिक आयु का हा, ओमा मर जान अन् कब पण ओनो देश मा प्रवेश नई करन. जो मी तुमला देतून कि फक्त कालेब अन् यहोशु ओकोमा प्रवेश करन.”

जब लोकमान परमेश्वर ला असो बलते आयकीत, त वय दुखी भयो कारण उनन पाप करीस होती. यकोसाठी उन्होन कनान का लोक बऱ्या हमला करबोको निर्णय करीस. मुसा न उनला नई जाबकि चेतावणी दिस. कारण पामेश्वर उनको संग नई जान. पण उन्होन ओकी नई आयकीस.

परमेश्वर यनो युद्ध मा उनको संग नई गयो होतो. यकोसाठी कनानीयो न उनला पराजित कर देईस अन् उनको लक लगीत ला मार टाकिस. तब इस्राएली लोक कानान मा वापस मूड गया. अगलो चालीस साल तक वय जंगल मा अतजा-वतजा भटकन.

इस्राएली लोक को यकोन जंगल मा भटबोको चालीस साल को वेळेमा परमेश्वर न उनकी आवश्यकताला पुरो करीस. ओन उनला स्वर्ग लक “मन्ना”बलनो वाली रोटी दिस. ओन बटेरो को झुंड पण (जोकी मध्यम आकार को पक्षी होतो) उनको छावणी मा पठाईस, ताकी उनको जवळ खाब साठी मांस रहन. ओन पुरा वेळ परमेश्वर न उनका कपडा अन् जुता ला पाठबपासल बचायके ठेईस.

यको पर्यंत कि परमेश्वर न उनको पिबसाठी चमत्कारी रूप न चात्तन मात लक पानी काढिस. पण यनो सर्वो को बावजुद इस्राएली लोक न पारमेश्वर को विरुद्ध अन् मुसा को विरुद्ध शिकायत करीस अन् कुडकुडाईस. तरी परमेश्वर विश्वासयोग्य होतो. ओन ज्यो प्रतिज्ञा करीस होती कि वय अब्राहम, इसहाक अन् याकुब को वंशजो साठी करन. ओन वोच करीस.

जब एक वेळला उनको पास पाणी नई होतो, परमेश्वर न मुसा ला बलीस, “चट्टान संग गोष्ट कर अन् वानकुतल पाणी निकरन.”पण मुसा न चट्टान संग गोष्ट नई करीस. बजाय यको ओन छडी न चट्टान बऱ्या दुय वेळ मारिस. यनो रित न ओन परमेश्वर को निरादर करीस. सर्वो को पिबसाठी चट्टान लक पानी त निकर आयो, पण परमेश्वर मुसा संग क्रोधीत भयो. ओन बलीस, “कारण तून असो करीस हा, यकोसाठी तू प्रतिज्ञा को देश मा प्रवेश नई करब सकत.”

जब इस्राएली लोक चालीस साल जंगल मा भटक्या होत्या, तब जिन्होन परमेश्वर को विरुद्ध बलवा करीस होती वय सर्वा मर गया. तब परमेश्वर वय लोकला अजून वो प्रतिज्ञा को देश को सिवोन पर्वत लेय गयो. आब मुसा लगीत बुढो भयो होतो, यकोसाठी परमेश्वर न लोक की अगुवाई करबसाठी उनकी सहायता करबसाठी यहोशु ला चुनीस. परमेश्वर न मुसा संग या प्रतिज्ञा पण करीस होती कि एक दिवस वय ओन लोक को पास मुसा को सरीखो एक भविष्यवक्ता पठावन.

तब परमेश्वर न मूसा ला एक पर्वत की चोटी बऱ्या जाबसाठी बलीस. ताकी वो प्रतिज्ञा को देश ला देख सकन. मुसा न ओन प्रतिज्ञा को देशला देखीस, पण परमेश्वर न ओला ओकोमा प्रवेश करबकि अनुमती नई दिस. तब मुसा मर गयो अन् इस्रायेलीयो न तीस दिवस पर्यंत शोक मनाईस. यहोशु उनको नवीन अगवो बन गयो. यहोशु एक चांगलो अगुवो होत, कारण ओन परमेश्वर बऱ्या भरोसा करीस अन् ओकी गोष्ट ला आयकीस.