31. यीशु पानी बऱ्या चलत हा

पाँच हजार लोकमानला भोजन कराबोको बादमा, यीशु न आपलो चेला ला नाव मा जाबसाठी बलीस. ओन उनला झील को दुसरी कुद्या जाबसाठी बलीस, जबकी वय थोडो वेळसाठी वामाच रुक गया. आखिर चेला चली गया अन् यीशु न भीड ला विदा करीस, कि वय आपलो घर जाए. योको बादमा, यीशु प्रार्थना करबसाठी एक पर्वत बऱ्या चली गयो. वामा वो एकटो होतो. अन् ओन रात्री पर्यंत प्रार्थना करीस.

वो वेळ, चेला आपली नाव ला खेतकेन जात होता, पण हवा उनको विरुद्ध लगीत जोरसे चलत होती. लगीत रात होय गई तरी भी वय फक्त झील को बीचमाच पहुच्या होता.

वो वेळी यीशु न प्रार्थना करनू खतम करीस अन् आपलो चेला कुद्या वापस जाबसाठी सुरवात करीस. वो नाव कुद्या जाबसाठी पानी को बऱ्या चले.

तब चेलो न ओला देखीस, वय लगीत डर गया, कारण उन्होन सोचीस की वो कोनी भुत हा. यीशु ला माहित होतो की वय डर गया होता, योकोसाठी ओन उनला आवाज देयकेन बलीस, “डरो नको यो मी हाऊन.”

तब पतरस न यीशु ला बलीस, “हे प्रभू जर यो तू हास त मला पानी बऱ्या चलकेन तोरो पास आबसाठी आदेश दे.” यीशु न पतरस ला बलीस, “आ.”

आखिर पतरस नाव बरत्याल उतर गयो अन् यीशु को जवळ जाबसाठी पानी को सतह बऱ्या चलून सुरु करीस. पण थोडो दूर जायकेन, ओन आपला डोळा ला यीशु लक हटाय देईस अन् लहर ला देखून अन् तेज हवा ला महसुस करनू सुरु करीस.

तब पतरस डर गयो अन् पानी मा डूबत होतो. ओन चिल्लाईस, “हे प्रभू मला बचाव.” यीशु न ओच वेळी हाथ बढाईस अन् ओला पकड लेईस. तब ओन पतरस ला बलीस, “तोरो विश्वास लगीत कमी हा. तोला सुरक्षित ठेबसाठी तून मोरो बरत्या विश्वास काहा नही करेस?”

तब यीशु अन् पतरस नाव बरत्या चढ गया अन् लवकरच हवा को बहनु बंद भय गयो. पानी शांत भय गयो. चेलो न चकित होयकेन यीशु को सामने घुटना टेक देईस. उन्होन ओकी आराधना करीस अन् ओला बलीस, “खरमा तु परमेश्वर को पोऱ्या हास.”