34. यीशु दूसरी कहानियों की शिक्षा देत हा

यीशु न परमेश्वर को राज्य को बारा मा अजून लगीत कहानी सांगिस. उदाहरण को साठी, ओन बलीस, “परमेश्वर को राज्य एक राई को बीज सारखो हा, जेला कोणी न आपलो खेत मा बोय देईस. तोला माहीत हा की राई को बीज पूर्ण बीज लक सर्वात लायनो रयते.”

"पण जब राई को बीज बाढ जाते त वो बगीचा को सर्व झाड पेक्षा सर्वात मोठो होय जाते, यवळो मोठो की पक्षी आयकेन ओकी शाखा बरत्या आराम करते.”

यीशु न एक अजून कहानी सांगिस, “परमेश्वर को राज्य खमीर सारखो हा, जेला लेयकेन एक स्त्री आय को पिंड मा मिलाय देते, तब वय सर्व पिंड मा फैल जाते.”

"स्वर्ग को राज्य वो खजाना सारखो हा, जेला कोणीन खेत मा लपाय देईस. कोणतो दुसरो व्यक्ती ला वो खजाना भेट गयो अन् ओन ओला पाबसाठी लगीत चाहत होतो. योकोसाठी ओन ओला अजून गाड देईस. वो आनंद ली येवळो भर गयो होतो कि ओन जायकेन आपलो सर्व काही बिक टाकिस. ताकी वो ओन खेत ला खरीद सके जामा वो खजाना होतो.”

"स्वर्ग को राज्य एक लगीत किमती शुद्ध मोती को सारखो पण हा. जब कोणी मोती को व्यापारी ओला पाय लेते, त ओला खरीदबला आपलो सर्व काही बिक टाकते.”

वामा काही लोकमान होतो जो सोचत होता की परमेश्वर उनला स्वीकार करन, कारण वय चांगलो काम करत होता. वय लोकमान असे लोकमानला तुच्छ मानत होता जो चांगलो काम ला नही करत होता. योकोसाठी यीशु न उनला या या कहानी सांगिस, “दुय माणूस होता अन् दुयबी प्रार्थना करबला मंदिरमा गया. उनको मातलक एक चुंगी लेनेवालो होतो अन् दुसरो एक धार्मिक अगुवा होतो.”

"वो धार्मिक अगुवा न योन प्रकारमा प्रार्थना करीस, हे परमेश्वर तोरो धन्यवाद हो की मी दुसरो लोकमान सारखो जसे की डाकू, अन्यायी माणूस, व्यभिचारी या यामा पर्यंत की यामा सांग उपस्थित वो चुंगी लेने वालो को सारखो एक पापी नही हाऊन.”

"उदाहरण साठी, मी हर हप्ता मा दुय वेळा उपवास ठेवतुन अन् मला भेटने वालो धन अन् सामान को दसवो हिस्सा तोला देतुन.”

"पण वो चुंगी लेनेवालो वो धार्मिक अगुवो पासलक लगीत दूर उभो भय गयो. ओन बरत्या स्वर्ग कुद्या डोळा पण नही उठाईस. योको बजाय, ओन आपली मुठ्ठी न आपली छाती ला पीटीस अन् प्रार्थना करीस की, “हे परमेश्वर कृपा करकेन मोरो बरत्या दया कर कारण मी एक पापी हाऊन. “

मंग यीशु न बलीस, “मी तुमरो संग खर बोलतुन, परमेश्वर न वो चुन्गी लेनेवाला की प्रार्थना आयकीस अन् ओला धर्मी घोषित करीस. पण ओन वो धार्मिक अगुवो की प्रार्थना पसंद नही करीस. परमेश्वर हर एक घमंडी को सिर ला खाल्या करन, पण वो हर वो जन ला आदर देन जो स्वताला नम्र करते.”