36. रूपान्तरण

एक दिवस यीशु न आपलो तीन चेला, पतरस, याकुब अन् यूहन्ना ला आपलो संग लेईस. (यो यूहन्ना नाव को चेला वो माणूस नई हा, जेन यीशु ला बाप्तिस्मा देईस होती.) वय प्रार्थना करबसाठी एक उंचो पहाड बऱ्या गया.

जब यीशु प्रार्थना करत होतो, त ओको चेहरा सूर्य को समान उज्वल भय गयो. ओका कपडा उजेड को समान सफेद भया होता, जश्यो बऱ्या कोणी कर सकन ओको पेक्षा पण जास्त सफेद.

तब मुसा अन् एलिय्याह भविष्यवक्ता प्रकट भया. यो पुरुष येन पृथ्वी बऱ्या येन वेळ लक सैकडो साल पहिले रहत होता. उन्होन यीशु संग ओकी मृत्यू को विषय मा गोष्ट करीस. कारण वो लवकरच येरुशलेम शहर मा मर जान.

जब मूसा अन् एलिय्याह यीशु संग गोष्ट करत होतो तब पतरस न यीशु ला बलीस, “आम्हरो साठी यामा होनू भलो हा. आम्ही तीन मंडप ला बनावन, एक तोरो साठी, एक मुसा को साठी अन् एक एलिय्याह साठी.” पण पतरस नई जानत होतो की वो काय करत हा.

जब पतरस गोष्ट करत होतो, त एक चमकदार बादल खाल्या आयकेन्या उनको बऱ्या छायगयो. मंग उन्होन बादल लक एक आवाज ला आवतांणी आयकीस. उनला बलीस, “यो मोरो पुत्र हा जेला मी प्रेम करत हाऊन. मी ओका पासलक प्रसन्न हाऊन. ओकी आयको.” वय तीनो चेला डर गया अन् जमीन बऱ्या लेट गया.

तब यीशु न उनला हात लगाईस अन् बलीस, “डरो नको. उठ जाओ.”जब उन्होन चारो कुद्या देखीस, त जो पण वामा होतो वो फक्त यीशु होतो.

यीशु अन् वय तीनो चेला वो पहाड लक वापस खाल्या उतर आया. तब यीशु न उनला बलीस, “आब जो यामा भयो ओकी चर्चा कोनीको संग नको करस. मी लवकरच मर जाऊन अन् मंग अजून जीवित होय जाऊन. ओको बाद तुम्ही लोकमानला सांगु शकतो.”