37. यीशु लाजर ला मरे हुओ मातलक जिवंत करते

लाजर नाव को एक माणूस होतो. ओकी दुय बहीनमान होती, जेलो नाव मरियम अन् मार्था होतो. वय सर्वा यीशु का पक्को मित्र होता. एक दिवस कोनी न यीशु ला सांगिस की लाजर लगीत बिमार होतो. जब यीशु न यो आयकीस त ओन बलीस, “यो बिमार लाजर को मरबको संग खतम नई होनार. योको बजाय यो लोकमानला परमेश्वर को आदर करबसाठी प्रेरित करन.”

यीशु आपलो मित्र ला प्रेम करत होतो. पण जामा वो होतो वामा ओन दुय दिवस लक प्रतीक्षा करीस. ओन दुय दिवस को बाद, ओन आपलो चेलो ला बलीस, “आओ वापिस यहुदीया ला चले.” पण हे गुरु आब काई वेळ पहिले वामा का लोकमान तोला मारबसाठी देखत होतो.” यीशु न बलीस, “आमरो मित्र लाजर सुते हा अन् मला ओला जगाबोको हा.”

यीशु को चेला न उत्तर देईस, “हे प्रभू जर लाजर सुते हा, त वो ठीक होय जान.” तब यीशु न उनला स्पष्ट रूप न बल देईस, “लाजर मर गयो हा. मी ख़ुशी मा हाऊन की मी वामा नई होतो, ताकी मोरो बऱ्या तुम्ही विश्वास कर सको.”

जब यीशु लाजर को गावमा पहुचे त लाजर ला मरकेन्या पहिले पासलक चार दिवस भया होता. मार्था यीशु ला भेटबसाठी भायर आयी अन् बलीस, “हे प्रभू , जर तू यामा रयतस त मोरो भाई नई मारतो. पण मी विश्वास करतून की जो काई पण तु परमेश्वर पासलक मांगस वो तोला देन.”

यीशु न उत्तर देईस, “पुनरुत्थान अन् जीवन मी हाऊन. जो कोनी मोरो बऱ्या विश्वास करत हा, जर वो पण जान तरी जगन. जो कोनी मोरो बऱ्या करत हा वो कब नई मरन. काय तू येकोबऱ्या विश्वास करतस?” मार्था न उत्तर देईस, “हे प्रभू, मी विश्वास करतून कि तू परमेश्वर को पुत्र मसीह होस.”

तब मरियम आयी. वान यीशु को चरण मा जायकेन बलीस, “हे प्रभू, जर तु यामा रयतस त मोरो भाई नई मरतो.” यीशु न ओला विचारिस, “तुमीन लाजर ला कमा ठेईस हा?” उन्होन ओला सांगिस, “कब्र मा. आव अन् देख टाक.” तब यीशु रोबला लागे.

वा कब्र एक गुफा होती, जेको दरवाजा बऱ्या एक पत्थर ला लूढकायो गयो होतो. जब यीशु कब्र बऱ्या पहुचे त ओन उनला बलीस, “पत्थर ला हटाय दे.” प्र मार्था न बलीस, “ओला मरकेन्या चार दिवस भया हो. ओको मातलक दुर्गंध आयन्या.”

यीशु न उत्तर देईस, “काय मी न तुमला नई बले होतून की, जर तुमी मोरो बऱ्या विश्वास करस त परमेश्वर को सामर्थ ला देखोन?” येकोसाठी उन्होन पत्थर ला हटाय देईस.

तब यीशु न बऱ्या स्वर्ग कुद्या देखीस, अन् बलीस, “हे पिता, मोरी आयकबसाठी मी तोरो धन्यवाद करतून. मला माहित हा की, तू हमेशा मोरी आयकते, पण मीनं यामा सांग उभा वय सर्वा लोकमानकी सहायता करबसाठी बले. ताकी वय विश्वास करन कि तून मला पठाईस हा.” तब यीशु न आवाज देईस, “हे लाजर भायर निकर के आव.”

आखिर लाजर भायर निकर आयो, वो आब पण कफन न लिपटे होतो. यीशु न उनला बलीस, “येन कफन ला निकारबसाठी ओकी मदत करो अन् ओला स्वतंत्र्य करो.” यो चमत्कार को कारन लगीत सा यहुदीयो न यीशु बऱ्या विश्वास करीस.

पण यहुदीयो का धार्मिक अगुवा यीशु पासलक जळत होता, येकोसाठी वय योजना बनाबसाठी एक साथ इकठ्ठा भया, की कसे यीशु अन् लाजर ला मार टाकिस पाहिजे.