38. यीशु ला पकडवायो जाते

हर साल, यहुदी लोकमान फसव को पर्व मनावत होता. यो योको बारामा एक उत्सव होतो की लगीत शताब्दी पहले परमेश्वर न उनको पूर्वज ला मिस्त्र को दासत्व लक छुडाईस होतीस. लगभग तीन साल को बाद यीशु न सार्वजनिक रूप न प्रचार करनू अन् शिक्षा देनु आरंभ करीस. यीशु न आपलो चेला ला सांगिस की वो उनको संग येरुशलेम मा फसव को पर्व ला मनावनु चाहत हा अन् यो पण की वो वामा मार टाके जान.

यीशु को चेला मा एक यहुदी नाव को व्यक्ती होतो. यहुदी प्रेरित की धन की थैली ठेबसाठी प्रभारी होतो, पण हमेशा वो वा थैली मातलक पैसा काढ लेत होतो. यीशु अन् चेला ला येरुशलेम मा पहुचबोको बाद यहूदा यहुदी अगुवो को जवळ गयो. ओन धन को बदला मा यीशु ला उनको हाथमा पकडाबोको प्रस्ताव ठेईस. ओला माहित होतो की यहुदी अगुवे स्वीकार नही करत होता की यीशुच मसीह हा. ओला माहित होतो की वय ओला मार टाकून चाहत होता.

महायाजक को बलून बऱ्या यहुदी अगुवा न यीशु ला उनको हाथ मा पकडाबोको साठी यहूदा ला तीस चांदीका सिक्का देईस. यो ओन प्रकारे भयो जसे की भविष्यवक्ता न बलीस होतीस, की होन. यहूदा मान गयो अन् धन लेयकेन चली गयो. वा यीशु ला गिरफ्तार करनू मा सहायता करबसाठी अवसर की खोज करत होतो.

येरुशलेम मा यीशु न आपलो चेला को संग फसवं को पर्व मनाईस. फसव को भोजन को वेळेस, यीशु न रोटी लेयकेन तोडीस, अन् बलीस, “एला लेओ अन् खाओ. यो मोरो शरीर हा, जो मी तूम्हरो साठी देतुन. एला मोरी याद मा करो.” योन प्रकारे यीशु न बलीस, की वो उनको साठी मर जान अर्थात उनको साठी वो आपलो शरीर की बली चढाय देन.

मंग यीशु न दाखरस को प्याला लेईस अन् बलीस, “येला पीय लेओ. यो नवीन वाचा को मोरी लहू हा, जोकी मी उंडेलून ताकी परमेश्वर तुम्हरो पापला क्षमा करन. हर वेळा येला पिता वेळेस मोरी याद मा येला करो जो मी आब करन्युऊन.”

तब यीशु न आपलो चेला ला बलीस, “तुम्हरो मातलक एक जन मला पकडावन.” चेला चौंक गया, अन् विचारबला लाग्या की कोन तो काम करन. यीशु न बलीस, “मोरो पकडावने वाला व्यक्ती वो हा, जेला मी या रोटी को टुकडा देतुन.” तब ओन वा रोटी यहूदा ला देईस.

वा रोटी ला लेबोको बाद, यहूदा मा शैतान समाया गयो. यहूदा निकरकेन यीशु ला गिरफ्तार करबसाठी यहुदी अगुवा की मदत करबला चली गयो. यो रात को वेळ होतो.

भोजन को बादमा यीशु अन् उनका चेला जैतुन पर्वत को चली गया. यीशु न बलीस, “तुम्ही सर्वा अज रात मला सोड देओ. यो लिखे हुवो हा, “मी चरवाहा ला मारून अन् सर्वो भेड तितर-बीतर होय जान.”

पतरसन उत्तर देईस, “भले ही बाकी का सर्वा तोला सोड देन, मी नही सोडनार.” तब यीशु न परमेश्वर ला बलीस, “शैतान तुम्ही सर्वाला लेयलेनु चाहत हा, पण हे पतरस, मीनं तोरो साठी प्रार्थना कऱ्यावून की तु विश्वास लक चूक न जाये. तरी भी, अज की रात्र, मुर्गा को बान देबोको पहले तु तीन वेळा इंकार करस, की तु मला ओळखत पण नही.

पतरस न यीशु ला बलीस, “भले ही मी मर पण जाऊन, मी कबक तोरो इंकार नही करून.” बाकी का चेला न बी योच बलीस.

तब यीशु आपलो चेलो को संग गतसमनी नाव को स्थान बऱ्या गयो. यीशु न आपलो चेला ला प्रार्थना करबला बलीस, ताकी शैतान उनकी परीक्षा नई करन. तब यीशु स्वता प्रार्थना करबला चली गयो.

यीशु न तीन वेळा प्रार्थना करीस, “हे मोरो पिता, जर संभव हा त कृपा करके यो दुख को प्याला पिबसाठी मला नको देऊ. पण जर लोकमान का पाप क्षमा करबसाठी कोणतो अजून मार्ग नई हा, त तोरीच इच्छा पुरी हो.” यीशु लगीत व्याकूल होतो अन् ओको पसीना लहू को बुंद सारखो होतो. ओला सामर्थ देबसाठी परमेश्वर न एक स्वर्गदूत ला पठाईस.

हर वेळा प्रार्थना को बाद, यीशु आपलो चेला को जवळ वापस आयो, पण वय सोय गया होता. जब यीशु तीसरी वेळा आयो, त यीशु न बलीस, “जाग जाओ. मोरो पकडावने वालो यामा हा.”

यहुदी अगुवा, सैनिक, अन् एक मोठी भीड संग यहूदा आयो. उन्होन तलवार अन् लाठी लेईस होतीस. यहूदा न यीशु को जवळ आयकेन ओला बलीस, “हे गुरु नमस्कार,” अन् ओला चुं लेईस. ओन गिरफ्तार करे जाणे वाला व्यक्ती ला यहुदी अगुवा बऱ्या प्रकट करबसाठी असे करीस होतीस. तब यीशु न बलीस, “हे यहूदा, काय तू एक चुंबन लक मला पकडवायन्यास?

जब वय सैनिक यीशु ला पकडत होता, तब पतरस न आपली तलवार काळीस अन् महायाजक को एक सेवक को कान काट देईस. यीशु न बलीस, तलवार ला दूर कर. मी आपलो पिता ला मोरो बचाव करबसाठी स्वर्गदूत कि एक सेना साठी विनंती कर सकतून. पण मला मोरो पिता की गोष्ट मानबनकी हा.” तब यीशु न वो व्यक्ती को कानला ठीक कर देईस. तब सर्वा चेला भाग गया.