39. यीशु बऱ्या मुकद्दमा चलत हा

आब यो अर्धो रात्र को वेळ होतो. वय सैनिक यीशु ला महायाजकको घर लेयकेन्या आया, कारण वय यीशु संग सवाल करबला चाहत होतो. पतरस दूर लक उनको पिछा करत होतो. जब सैनिक यीशु ला घर मा लेयकेन्या गया, त पतरस भायर थांबकेन्या खुद ला आग न गरम करब लागे.

घर को अंदर यहुदी अगुवो न यीशु बऱ्या मुकदमा चलाईस. वय ओको विरुद्ध खोटो गोष्ट ला बोलबसाठी लगीत सा खोट्या गवाहो ला लेयकेन्या आया, जबकी उनकी गोष्ट एक दुसरो संग सहमत नई होती. यकोसाठी यहुदी अगुवा यो साबित नई कर सक्या कि वो कोनत गोष्ट को दोषी होतो, यीशु न काई नई करीस.

आखिर मा, महायाजक न सिधो यीशु कुद्या देखकेन्या बलीस, “आमला सांग की काय तूच जीवित परमेश्वर को पुत्र मसीह होस?”

यीशु न बलीस, “मी हाऊन अन् तुमी मला परमेश्वर को संग बसे हुये अन् स्वर्ग लक आवतानी पण देखस.” महायाजक न आपला कपडा फाड टाकिस, कारण जो यीशु न बलीस वो ओन गोष्ट बऱ्या क्रोधीत होतो. वो अन्य अगुवो बऱ्या चिल्लायो, “आमला यो सांगबसाठी कोनतो अजून गवाह की आवश्यकता नई हा, की यो माणूस न काय करीस हा, तुमी न खुद हि ओला यो बालतानी आयक लेईस की, वो परमेश्वर को पुत्र हा, ओको बाऱ्या मा तुम्हरो काय निर्णय हा?”

सर्वो यहुदी अगुवोन महायाजक ला उत्तर देईस, “वो मरबोको योग्य हा.” तब उन्होन यीशु को डोळ्या बऱ्या पट्टी बांधिस, ओको बऱ्या थुकीस, ओला मारिस अन् ओको मजाक उडाईस.

अन् पतरस जब घर को भायर प्रतीक्षा करत होतो, तब एक दासी पोरगी न ओला देखीस. ओन ओला बलीस, “तु पण यीशु को संग होतो.” पतरस न मना कर देईस. बाद मा कोनी अन्य पोरगी न याच गोष्ट ला बलीस अन् पतरस न अजून मना कर देईस. आखिर मा काई लोकमान न बलीस, “आमला माहित हा, कीतु यीशु संग होतो, कारण तुमी दुय पण गलील लक हाओ.”

तब पतरस न बलीस, “जर मी यो माणूस ला ओळखतून त परमेश्वर मला श्राप देन.” तुरंतच पतरस को येन तरह न शपथ खाबो को बाद, एक मुर्गा न बाग दिस. यीशु न मंग मूडकेन्या पतरस ला देखीस.

पतरस वतजालक चली गयो अन् फुट-फुट केन्या रोईस. ओन वेळे यीशु ला पकडावने वालो यहूदा न देखीस, की यहुदी अगुवो न यीशु ला मूत्यूदंड देईस हा. यहूदा लगीत दुखी भय गयो अन् जायकेन्या खुद ला मार टाकिस.

आब ओनो देश को राज्यपाल पिलातूस होतो. वो रोम को साठी काम करत होतो. यहुदी अगुवो यीशु ला ओको जवळ लेयकेन्या आयो. वय चाहत होतो की, पिलातूस ओला मृत्युदंड देन अन् ओला मार टाके तब पिलातूस न यीशु ला विचारिस, “काय तु यहुदीयो को राजा होस?”

यीशु न उत्तर देईस, “तुन खरो बल्यास, पण मोरो राज्य येन पृथ्वी को नई हा, जर होतो त मोरो दास, मोरो साठी युद्ध करता. मी पृथ्वी बऱ्या परमेश्वर को बाऱ्या मा खरो सांगबसाठी आयो हाऊन. हर एक जन जो खरं संग प्रेम करते वोच मोरी आयकते.” पिलातूस न बलीस, “त खरो काय हा?”

यीशु को संग गोष्ट क्र्बोको बाद, पिलातूस न भायर को भीड जवळ जायकेन्या बलीस, “मला अश्यो कोणतो कारण नई माहित की यो माणूस मार टाकबो जाबोको योग्य हा.” पण यहुदी अगुवो अन् भीड न चिल्लायकेन्या बलीस, “ओला क्रूस बऱ्या चढायु देओ.” पिलातूस न उत्तर देईस, “वो काई पण गलत करबोको दोषी नई हा.” पण वय अजून जास्त उंची आवाज न चिल्लाय लाग्या. तब पिलातूस न तिसरो वेळा बलीस, “वो दोषी नई हा.”

पिलातूस डर गयो की, वा भीड दंगा करबला सुरवात कर देन, येकोसाठी वो आपलो सैनिक को यकोन यीशु ला क्रूस बऱ्या चढाबसाठी मान गयो. रोमी सैनिको न यीशु ला कोडे लगाईस अन् ओला राजसी कपडा पहनाईस अन् ओको डोका बऱ्या काटो लक बने मुकुट ठेईस. तब वय यो बलकेन्या ओको मजाक उडाब लाग्या, “देखो यहुदीयो को राजा.”