40. यीशु ला क्रूस बऱ्या चढायो जाते

यीशु को ठठ्ठा करबोको बाद, सैनिक ओला क्रूस बऱ्या चढाबसाठी लेय गया. उन्होन वो क्रूस ला ओलाच उचालबला लगाईस, जेकोबऱ्या वो मरन.

वय सैनिक यीशु ला वो ठिकाण बऱ्या लेयकेन्या आया जेला “खोपडी” बलत होता अन् ओका हात अन् पाय ला क्रूस बऱ्या ठोक देईस. पण यीशु न बलीस, “हे पिता, इनला क्षमा कर, कारण उनला नई माहित हा की, वय काय करन्या” उन्होन एक तख्ती ला पण ओको बऱ्या लिखीस होती, “यहुदीयो का राजा.” पिलातूस न उनला योच लिखबसाठी बलीस होती.

तब सैनिक न यीशु को कपडा साठी चीठ्ठिया टाकीस. जब उन्होन अश्यो करीस त उन्होन ओन भविष्यवाणी ला पुरो करीस, जो बलत होती, “उन्होन मोरो कपडाला आपस मा बाट लेईस अन् मोरो कपडा साठी चीठ्ठिया टाकिस.”

वामा दुय डाकू पण होता, जेला सैनिक न ओनोच वेळेला क्रूस बऱ्या चढाईस होती. उन्होन उनला यीशु को दुय भी कुद्या ठेईस होती. उनको मातलक एक डाकू न यीशु की मजाक उडाईस, पण दुसरो न बोलीस, “काय तु नई डरत की परमेश्वर तोला दंड देन? आम्ही लगीतसा बुरो कामला करबोको दोषी हान. पण यो माणूस निर्दोष हा.” अजून ओन यीशु ला बलीस, “जब तू आपलो राज्य मा आवसत कृपया मला आठवन ठेवन.” यीशु न उत्तर देईस, “आजच तु मोरो संग स्वर्गलोक मा रहस.”

यहुदी अगुवो अन् भीड का अन्य लोकमान न यीशु को मजाक उडाईस. उन्होन ओला बलीस, “जर तु परमेश्वर को पुत्र होस, त क्रूस लक खाल्या उतरकेन्या आब अन् स्वर्ग ला बचाय टाक. तब आम्ही तोरो बऱ्या विश्वास करबन.”

तब वो संपूर्ण देश को आकाश पुरो तरह न काळो भय गयो, भलो हि वो दिवस को बीच को वेळ होतो. यो दुपार को वेळेस काळो भयो होतो अन् तीन घंटा लक अश्योच रयने होतो.

तब यीशु न आवाज देयकेन्या बलीस, “पुरो भयो! हे पिता, मी आपली आत्मा तोरो हात मा सौपन्याहून.” तब ओन आपलो डोका ला झुकाईस अन आपलो प्राण ला त्याग देईस. जब वो मरे त एक भूकंप आयो. वो मोठा परदा जो परमेश्वर कि उपस्थिती न लोकमानला अलग करत होतो, वऱ्यापासलक खाल्यापर्यंत फाटकेन्या दुय भाग भय गयो.

आपली मृत्यू को यकोन, यीशु न लोकमान साठी परमेश्वर को जवळ ओबोको मार्ग खोल देईस. जब यीशु की निगरानी करनारो सैनिक न जो काई भयो होतो यो सर्वो देखीस त ओन बलीस, “निश्चित रूप न यो माणूस निर्दोष होतो. यो परमेश्वर को पुत्र हा."

तब युसुफ अन् निकुदेमुस नाव का दुय यहुदी अगुवा आया, वय विश्वास करत होता की, यीशु मसीह होतो. उन्होन पिलातूस पासलक यीशु को शरीर ला मांगीस. उन्होन ओको शरीरला कपडा मा लपेटीस. तब वय ओला एक चट्टान मातलक काटकेन्या बनायो गयो, कब्र मा लेय गया अन् ओको अंदर ठेय देईस. तब उन्होन वो कब्र को दरवाजा ला बंद करबसाठी एक मोठो पत्थरला लूढकाय देईस.