41. परमेश्वर यीशु ला मरे हुओ मातलक जिवंत करते

सैनिको पासलक यीशु ला बऱ्या चढाबोको बाद, यहुदी अगुवो न पिलातूस ला बलीस, “वो खोटो यीशु न बलीस होती की, वो तीन दिवस को बादमा मर हुओ मातलक जिवंत होय उठन. कोनीला यो निश्चित करबसाठी कब्र की निगरानी करनो पडन, की ओको चेला ओको शरीरला चोरी करकेन्या नई लेय जान. जर वय अश्यो करते त वय बोलन की वो मरे हुओ मातलक जी उठन.”

पिलातूस न बलीस, “काई सैनिक ला लेय जाओ अन् जश्यो तुमी कर सकतो वश्यो कब्र की निगरानी करो. यकोसाठी उन्होन वो कब्र को प्रवेशद्वार बऱ्या एक मोहर लगाय लेईस. उन्होन यो निश्चित करबसाठी वामा सैनिक ला पण बसाय देईस, की कोनी पण ओको शरीर ला चोरी नई करन.

यीशु को मरबोको बाद दिवस सब्त को दिवस होतो. कोणी पण सब्त को दिवस मा काम नई कर सकत होतो, येकोसाठी यीशु को कोनतो मित्र कब्र बऱ्या नई आयो होतो. पण सब्त को बाद को दिवस, सकाळी लगीत भोर ला, काई बाईमान यीशु को कब्र बऱ्या जाबसाठी तयार भई. वय ओको शरीर बऱ्या अजून पण मसाला ला लगाबला चाहत होती.

वय बाईमान को पहुचबोको पहिले, कब्र बऱ्या एक मोठो भूकंप आयो. स्वर्ग लक एक स्वर्गदूत न आयकेन्या ओन पत्थर ला लूढकाय देईस. जो कब्र को प्रवेशद्वार ला झांके होतो अन् ओको बऱ्या बस गयो, यो स्वर्गदूत उजेड को सारखो चमकत होतो. कब्र बऱ्या जो सैनिक होता, उन्होन ओला देखीस. वय एवढा डऱ्या होता की, मरे सरीखो जमीन बऱ्या पड गया.

जब वय बाईमान कब्र बऱ्या आई, त वो स्वर्गदूत न उनला बलीस, “नको डरो. यीशु यामा नई हा. वो मरे लक जिवंत भयो हा. जश्यो की ओन बलीस होती की वो जिवंत होयकेन्या उठन. कब्र मा ढूंडो अन् देखो.” वय बाईमान न कब्र को अंदर जामा यीशु को शरीर ठेईस होती, वामा ढूंडीस अन् देखीस की ओको शरीर वामा नई होतो.

तब वो स्वर्गदूत न वय बाईमान ला बलीस, “जायकेन्या वोका चेला ला सांगो, यीशु मरे पासलक जिवंत होयकेन्या उठे हा अन् वो तुम्हरो सामने-सामने गलील मा जान.”

वय बाईमान अचंभित भयी अन् लगीत खुश भयी. वय चेला ला शुभ संदेश सुनाबसाठी धायी.

जब वय बाईमान चेला ला यो शुभ संदेश सांगबसाठी आपलो मार्ग बऱ्या होती, त यीशु उनको बऱ्या प्रकट भयो. वय ओको पास-पास जायकेन्या पड गई. तब यीशु न बलीस, “नको डरो. जायकेन्या मोरो चेला ला गलील जाबसाठी बलो. वय वामा मला देखेन.”