42. यीशु स्वर्ग ला लौट जाते

जेन दिवस परमेश्वर न यीशु ला जिवंत करीस हिती, ओका दुय चेला जवळ को गाव मा जात होता. चालत-चालत वय यीशु को संग जो भयो होतो, ओको बारा मा गोष्ट करत होता, पण तरीपण ओला मार टाकिस होती. आब वय बाईमान बलन्या की वो अजून जिवंत भयो हा, वय नई जानत होता की कोणतो गोष्टी बऱ्या विश्वास करबोको हा.

यीशु न उनको जवळ आयकेन्या उनको संग चलबला सुरवात करीस. पण वय ओला ओळख नई सक्या. ओन विचारिस कि वय कोणतो गोष्टी बऱ्या बोलत होता. उन्होन ओला मंगको दिवस मा यीशु को संग भयी सर्वो घटना ला सांगिस. उन्होन विचारिस की वय कोनी परदेशी संग बोलण्या जो नई जानत होतो की येरुशलेम मा काय भयो होतो.

तब यीशु न उनला समझाईस की परमेश्वर को वचन मसिह को बारा मा काय बलत होतो. लगीत पहिले भविष्यवक्ताओ न बलीस होती की लोक मसीह ला पिडीत करन अन् मार टाकन. पण भविष्यवक्ताओ न यो पण बलीस होती की वो तिसरो दिवस जिवंत होयकेन्या उठन.

जब वय वो नगर मा पहुच्या जामा वय दुय जन ठहरबला चाहत होता, तब लक सायंकाळ भय गयी. उन्होन यीशु ला उनको संग ठहरबसाठी आमंत्रित करीस. आखिर वो उनको संग घर मा गयो. आपलो सायंकाळ को भोजन ला खाबसाठी वय बस गया. यीशु न एक रोटी ला लेयकेन्या ओकोसाठी परमेश्वर को धन्यवाद देईस अन् मंग ओला तोडीस. अचानक लक उन्होन जान लेईस की, वो यीशु होतो. पण वोच वेळेस वो उनको डोळालक ओझल भय गयो.

वय दुय जन न एक दुसरो ला बलीस, “वो यीशु होतो. येकोसाठी जब ओन आमला परमेश्वर को वचन ला समझाईस होती, त आम्ही लगीत उत्साहित होतो. तुरतच वय निकरकेन्या वापस येरुशलेम ला गया.” जब वय पहुचा त उन्होन चेला ला सांगीस “यीशु जीवित हा! आम्ही न ओला देख्याहून!”

जब चेला गोष्ट करत होता, यीशु अचानक लक वो कमरा मा उनको संग प्रकट भयो. ओन बलीस, “तुमला शांती मिळो!” चेलो न सोचीस की वो कोणतो भुत होतो. पण यीशु न बलीस, “तुमी कायकोसाठी डरत हाओ? तुमी यो काय नई सोचत हाओ की यो खरं मा मी यीशु हाऊन? मोरो हात ला अन् पायला देखो. भूतो को जवळ अश्यो शरीर नई रहत जश्यो मोरो जवळ हा.” यो दिखाबसाठी की वो कोणते भुत नई होतो, ओन खाबसाठी काई मांगीस. उन्होन ओला मछली को एक टुकडा देईस अन् ओन ओला खाय लेईस.

यीशु न बलीस, “मोरो बारा मा परमेश्वर को वचन जो काई पण बोलत हा, वो घटीत होन. मीनं तुमला सांगे होतो की, येको होनो अवश्य हा.” तब यीशु न उनला परमेश्वर को वचन चांगलोन समझाईस. ओन बलीस, “लगीत पहिले भविष्यवक्ताओ न लिखीस होती की, मीच मसीह ला दुख उठावनो पडन अन् मंग तिसरो दिवस मरे मातलक जिवंत उठनो पडन.”

"वय भविष्यवक्ताओ न यो पण लिखीस होती, की मोरा चेला परमेश्वर की वचन कि घोषणा करन. वय हर एक ला पश्चाताप करबसाठी सांगन. जर वय अश्यो करते त परमेश्वर उनको पाप ला क्षमा करन. मोरा चेला यो संदेश को प्रचार करनो येरुशलेम लक सुरवात करन. तब वय सर्वो जागी सर्वो जातियो मा जान. तुमी लोक मोरी हर एक गोष्ट अन् काम का गवाह हाओ. जोन मीन बल्याहून अन् करीस होती अन् ओन सर्वो को पण जो मोरो संग भयो.”

अगलो चाळीस दिवस वेळ मा यीशु आपलो चेलो बऱ्या लगीत वेळा प्रकट भयो. एक वेळा त वो एकच वेळमा 500 लक जास्त लोकमान बऱ्या प्रकट भयो. ओन आपलो चेलो बऱ्या लगीत तरीको न साबित करीस की वो जीवित होतो अन् ओन उनला परमेश्वर को राज्य को बारा मा शिक्षा देईस.

यीशु न आपलो चेलो ला बलीस, “परमेश्वर न मला स्वर्ग अन् पृथ्वी का हर एक जन बर्या शासन करबोको अधिकार देईस हा. येकोसाठी आब मी तुमला बलन्याहून, जायकेन्या सर्वो जातीयो का लोकमानला चेला बनाओ. अश्यो करबसाठी तुमला उनला पिता, पुत्र अन् पवित्र आत्मा को नाव न बाप्तिस्मा देबोको हा. जो काई मीन तुमला आज्ञा देयाऊन वो सर्वो गोष्ट ला मानबोको हा. याद ठेवो, मी हमेशा तुम्हरो संग रहून.”

यीशु को मरे मातलक जिवंत होयकेन्या उठब को चाळीस दिवस को बाद, ओन आपलो चेलो ला बलीस, “जब पर्यंत येरुशलेम मा ठहरकेन्या रहो. वो तुमरो बऱ्या पवित्र आत्मा पठाबोको येकोन अश्यो करन.” तब यीशु स्वर्ग मा चली गयो. अन् एक बादल न ओला उनकी दृष्टी लक लपाय टाकीस. स्वर्ग मा यीशु सर्वो वस्तू बऱ्या शासन करबसाठी परमेश्वर को दाहिनी बाजूला बस गयो.