44. पतरस अन् युह्न्ना एक भिखारीला चंगो करते

एक दिवस पतरस अन् यूहन्ना मंदिर मा गया. एक अपंगो व्यक्ती भीख मांगबसाठी फाटक बऱ्या बश्यो होतो.

पतरस न वो लंगडो व्यक्ती कुद्या देखीस अन् बलीस, मोरो जवळ तोला देबसाठी पैसा त नई हा, पण जो मोरो जवळ हा, वो मी तोला देतुन. यीशु को नाव लक उठ अन् चल-फिर!”

तुरंतच परमेश्वर न ओन लंगडो व्यक्ती ला चंगो कर देईस. ओन अतजा-वतजा चलनो अन् कुदनो अन् परमेश्वर की स्तुती करबला सुरवात कर देईस. मंदिर को आंगण मा उपस्थित लोकमान अचंभित होता.

लवकरच लोकमान की एक मोठी भीड वो व्यक्तीला देखबसाठी आयी. जो चंगो भयो होतो, पतरस न उनला बलीस, “यो माणूस ठीक हा, पण येन गोष्ट बऱ्या अचंभित नको होस. आमी न येला आपलो शक्ती न चंगो नई करीस हा, यो येकोसाठी नई, की आम्ही परमेश्वर को आदर करतन. पण, वो यीशु हा जेन यो व्यक्ती ला आपलो शक्ती न चंगो करीस हा, कारण आम्ही यीशु बऱ्या भरोसा करतन.”

"वय तुमीच हा, जिन्होन वो रोमी राज्यपाल ला यीशु ला मारबसाठी बलीस होती. तुमी न ओला मार टाकिस, जो सर्वा ला जीवन देते हा, पण परमेश्वर न ओला मरे पासलक जिवंत करीस. तुमला नई समझे की तुमी काय करत होतो, पण जब तुमी ओन काम ला करत होतो, तो जो भविष्यवक्ताओ न बलीस होती वो पुरो भयो. उन्होन बलीस होती की, मसीह दुख उठावन अन् मर जान. परमेश्वर न येला येनो रित न होब देईस. येकोसाठी आब पश्चाताप करो अन् परमेश्वर को कुद्या फिरो, ताकी वो तुम्हरो पापो ला धोयकेन्या साफ कर देन.”

जब मंदिर का अगुवो न पतरस अन् युह्न्ना ला आयकीस, त वय लगीत घबराया. येकोसाठी उन्होन उनला गिरफ्तार करकेन्या जेलखाना मा टाक देईस. पण जो पतरस न बलीस होती ओकोबऱ्या लागीतसा लोकमान न विश्वास करीस. यीशु बऱ्या विश्वास करनो वालो की संख्या बढकेन्या लगभग 5,000 भय गई.

अगलो दिवस, वय यहुदी अगुवा पतरस अन् युह्न्ना ला महायाजक अन् धार्मिक अगुवो को सामन्या लेयकेन्या आय. वय ओन व्यक्ती ला पण लेयकेन्या आया जो अपंग होतो, उन्होन पतरस अन् युह्न्ना ला विचारिस, “कोणतो अधिकार न तुमी न वो अपंग व्यक्ती ला चंगो करीस?”

पतरस न उत्तर देईस, “यो व्यक्ती जो तुम्हरो सामन्या उभो हा, ओला यीशु मसीह की सामर्थ्य को यकोन चंगो करीस गयो हा. तुमी न यीशु ला क्रूस बऱ्या चढाय देईस, पण परमेश्वर न ओला दुबारा जीवित करीस. तुमी न ओला अस्वीकार कर देईस, पण यीशु को सामर्थ्य को माध्यम को अलावा उद्धार पाब को कोणतो दुसरो मार्ग नई हा.”

वय अगुवा हैरान होता की, पतरस अन् युह्न्ना न लगीत साहसी को रूप न गोष्ट करीस होती. उन्होन देखीस की ये साधारण पुरुष होता, जो कि अनपढ होता. पण अजून उनला याद आयो, की ये पुरुष यीशु को संग रहत होता. येकोसाठी उन्होन उनला बलीस, “आम्ही तुमला लगीत जास्त दंड देन, जर तुमी येन माणूस को बाऱ्या मा लोकमानला अजून कोणतो संदेश देयण्यास अशी लगतशी गोष्ट बलबोको बाद उन्होन पतरस अन् युह्न्ना ला जान देईस.