46. पौलुस मसीही विश्वासी बन जाते

शाऊल नाव को एक व्यक्ती होतो, जेन यीशु बऱ्या विश्वास नई करीस होती. जब वो जवान होतो, तब ओन स्तीफनुस ला मारने वालो लोकमान का कपडा की निगरानी करीस होती. बादमा ओन विश्वासीयो ला सताईस होती. ओन येरुशलेम मा घर-घर जायकेन्या पुरुष अन् बाई दुय ला पकडकेन्या गिरफ्तार करीस अन् जेलखाना मा टाक देईस. तब महायाजक न शाऊल ला दामिश्क नगर मा जाब की अनुमती देईस. ओन वामा का मासीहीयो ला गिरफ्तार करब अन् उनला वापस येरुशलेम लेयकेन्या आब को साठी शाऊल ला बलीस.

आखिर शाऊल न दामिश्क जाब की यात्राला सुरवात करीस. वो नगर मा पहुचबोको थोडा ही पहिले, ओको चारो कुद्या आकाश लक एक उज्वल प्रकाश चमके अन् वो भूमी बऱ्या पड गयो. शाऊल न कोनीला बलतानी आयकीस, “हे शाऊल! हे शाऊल तु मला कायला सतावन्यास?” शाऊल न विचारिस, “हे प्रभू, तू कौन हास?” यीशु न ओला उत्तर देईस, “मी यीशु हाऊन! तु मला सतावन्यास!”

जब शाऊल उठे त वो देख नई सकत होतो. ओका मित्र ओला दामिश्क मा लेयकेन्या गया होता. शाऊल न तीन दिवस पर्यंत काई पण खायो पियो नई होतो.

दामिश्क मा हनन्याह नाव को एक चेला होतो. परमेश्वर न ओला बलीस, “वो घर मा जा जामा शाऊल थांबे हा. आपलो हात ला ओकोबऱ्या ठेव ताकी वो अजून देखाब लागे.” पण हनन्याह न बलीस, “हे प्रभू मीनं आयके हाऊन की येन व्यक्ती न विश्वासीयो ला कशे सताईस हा.” परमेश्वर न ओला उत्तर देईस, “जा! मीनं ओला यहुदीयो मा अन् दुसरो जातीयो का लोकमान मा मोरो नाव की घोषणा करबसाठी चुन्या हून. वो मोरो नाव को साठी लगीत कष्ट सहन.”

आखिर हनन्याह शाऊल को जवळ गयो. आपलो हात ला ओको बऱ्या ठेईस अन् बलीस,”यीशु न जो यामा आब को तोरो मार्ग मा तोरो बऱ्या प्रकट भयो होतो, मला तोरो जवळ पठाईस ताकी तू अजून देखब लागे अन् पवित्र आत्मा तोला भर देन.” तुरंतच शाऊल अजून देखबसाठी सक्षम भय गयो अन् हनन्याह न ओला बपतिस्मा देईस. तब शाऊल न भोजन करीस अन् अजून बलवंत भय गयो.

तब पासलकच शाऊल न दमिश्क मा रयने वाला यहुदीयो मा प्रचार करबला सुरवात कर देईस. ओन बलीस, “यीशु ही परमेश्वर को पुत्र हा.” यहुदी लोक अचंभित होता, कारण शाऊल न त विशवासीयो ला मार टाकबो को प्रयत्न करीस होती. पण आब ओन यीशु बऱ्या विश्वास करीस होती. शाऊल न यहुदीयो को संग वाद-विवाद करीस, ओन देखाईस की यीशु ही मसीह होतो.

लगीत दिवस को बाद, यहुदीयो न शाऊल ला मार टाकब की योजना बनाईस. उन्होन ओला मार टाकबसाठी नगर को फाटक बऱ्या लोकमानला पठाईस. की ओकी निगरानी करन पण शाऊल न वो योजना को बारा मा आयक लेईस अन् ओको मित्र मानन बचायकेन्या निकरबसाठी ओकी सहायता करीस. एक रात्र ला उन्होन ओला टोपली मा बसायकेन्या नगर को दिवाल लक खाल्या उतार देईस. दमिश्क लक बाचकेन्या निकरबोको बाद शाऊल न यीशु को बारा मा प्रचार करनो चालू ठेईस.

शाऊल प्रेरितो ला भेटबसाठी येरुशलेम गयो, पण वय ओको पासल डरत होता. तब बरनबास नाव को एक विश्वासी, शाऊल ला प्रेरितो को जवळ लेयकेन्या गयो. ओन उनला सांगीस की, शाऊल न कसे साहसी होयकेन्या दमिश्क मा प्रचार करीस होती. ओको बाद प्रेरितो न शाऊल ला स्वीकार कर लेईस.

काई विश्वासी जो येरुशलेम को सताव लक भाग गया होता. वय दूर अंताकिया नगर मा चली गया होता अन् यीशु को बारा मा प्रचार करत होता. अंताकिया मा रयने वाला लोक अधिकतर यहुदी नई होता, पण पहिलो वेळा उनको मातलक लगीत सा लोक विश्वासी बन गया. बरनबास अन् शाऊल यो नवीन विशवासीयो ला यीशु को बारा मा अजून जास्त सिखाब साठी वामा गया अन् कलेसिया ला मजबूत करीस. यीशु बऱ्या विश्वास करने वाला पहिलो वेळा अंताकिया माच “मसीही” कहलाईस.

एक दिवस अंताकिया का मासीही लोक उपवास को संग प्रार्थना करत होतो. पवित्र आत्मा न उनला बली, “मोरो साठी बरनबास अन् शाऊल ला वो कामला करबसाठी अलग कर देओ, जेला करबसाठी मीनं उनला येकोसाठी अंताकिया की कलीसिया न बरनबास अन् शाऊल को साठी प्रार्थना करीस की अन् उनको बऱ्या आपलो हात ला ठेईस. तब उन्होन उनको बाकी लगीतसा जागा बऱ्या यीशु को बारा मा शुभ संदेश को प्रचार करबसाठी पठाय देईस. बरनबास अन् शाऊल न अलग-अलग जातियो को लोकमान ला शिक्षा देईस अन् लगीतसा लोकमान न यीशु बऱ्या विश्वास करीस.