47. फिलिप्पी नगरमा पौलुस अन् सीलास

जब शाऊल न पूर्ण रोमी साम्राज्य मा यात्रा करीस त ओन आपलो रोमी नाव “पौलूस” को उपयोग करनु आरंभ कर देईस. एक दिवस पौलूस अन् ओको मित्र सिलास, फिलीपी नगर मा यीशु को बारामा शुभ संदेश अयकाबसाठी गया. वय नगर को भायर नदी को किनारा एक जागा बऱ्या गया, जामा लोक प्रार्थना करबसाठी जमा भया होता. वामा वय लुदिया नाव की एक बाई ला भेट्या जो एक व्यापारी होती. वा परमेश्वर ला प्रेम करत होती अन् ओकी आराधना करत होती.

परमेश्वर न लुदिया ला यीशु को बारामा संदेश बऱ्या विश्वास करबसाठी सक्षम करीस. पौलूस अन् सिलास न ओला अन् ओको परिवार ला बपतिस्मा देईस. ओन पौलूस अन् सिलास ला आपलो घर रयबसाठी आमंत्रित करीस, येकोसाठी वय वामा रुक गया.

पौलूस अन् सिलास लोकमान ला हमेशा वा जागा बऱ्या भेटत होता, जामा यहुदी लोक प्रार्थना करत होता. हर दिवस जब वय वामा जात होता त एक दासी पोरगी जो दृष्टात्मा पासलक नियंत्रित होती उनको पिछा करत होती. यो दृष्टात्मा को माध्यम लक वा लोकमान को भविष्य सांगत होती, येकोसाठी वा भविष्य सांगने वाली को रूप मा आपलो स्वामियो साठी लगीत धन कमायकेन देत होती.

ओको जातो वेळेस या दासी पोरगी चिल्लावत होती, “वय माणूस परम प्रधान परमेश्वर का सेवक हा. वय तुमला उद्धार पाबसाठी रस्ता सांग रयन्या.” वा हर दिवस असीच करत होती जोकोन की पौलूस नाराज भय गयो.

आखिर मा, एक दिवस जब वा दासी पोरगी न चिल्लावनु सुरु करीस, तब पौलूस ओको कुद्या मूडकेन ओको अंदर की दृष्टात्मा ला बलीस, “यीशु को नाव न योको मातलक निकर जा.” ओनच वेळी दृष्टात्मा न ओला सोळ देईस.

वा दासी पोरगी को स्वामी लगीत गुस्सा भय गया. उनला माहित पड गयो की बिना दृष्टात्मा न वा दासी पोरगी लोकमान को भविष्य नई सांगू शकनार. योको मतलब होतो की लोक आब ओको स्वामियो ला पैसा नई देन की वय उनको भविष्य सांगन की उनको संग काय होन.

योकोसाठी वा दासी पोरगी को स्वामी पौलूस अन् सिलास ला रोमी अधिकारी को जवळ लेय गया. उन्होन पौलूस अन् सिलास ला मारिस अन् मंग उनला जेलखाना मा टाक देईस.

उन्होन पौलूस अन् सिलास ला जेलखाना को असे हिस्सा मा ठेईस, जामा सर्वात जास्त सिपाही होता. यामा पर्यंत की उन्होन उनको पाय मा लकडी को मोठो तुकडा मा जोड देईस पण पौलूस अन् सिलास अर्धो रात्री को वेळेस परमेश्वर की स्तुती का गीत गात होता.

अचानक एक भयानक भूकंप भयो. जेलखाना का सर्वा दरवाजा खूळ गया अन् सर्वा कैदीयो की जंजीर खूळकेना पड गई.

तब दरोगा उठ गयो. ओन देखीस की जेलखाना का दरवाजा खूल गया हा. ओन विचार करीस की सर्वा कैदी बाचकेन भाग गया हा. वय डर गया की उनको भाग जाबको योकोन रोमी अधिकारी उनला मार टाकन, योकोसाठी वय खुद ला मार टाकबसाठी तय्यार भय गया होता. पण पौलूस ओला देखकेन चिल्लाईस, “रुक जा. खुद ला नुकसान नको पोहचाऊ. आमी सर्वा यामाच हान.”

वो दरोगा न कापत-कापत पौलूस अन् सिलास को जवळ आयकेनविचारस, “उद्धार पाबसाठी मी काय करू?”पौलूस न जवाब देईस, “प्रभू यीशु बऱ्या विश्वास कर, तब तु अन् तोरा घराना ला उद्धार भेटन.” तब वो दरोगा पौलूस अन् सिलास ला आपलो घर लेयकेन गया अन् उनको घाव ला धोईस. पौलूस न उनका घर का सर्वा लोकमान ला यीशु को बारामा शुभ संदेश सुनाईस.

दरोगा अन् ओको पुरो परिवार न यीशु बऱ्या विश्वास करीस, योकोसाठी पौलूस अन् सिलास न उनला बपतिस्मा देईस. तब दरोगा न पौलूस अन् सिलास ला भोजन कराईस अन् वय एक साथ आनंदित भया.

अगलो दिवस नगर का अगुवा न पौलूस अन् सिलास ला जेलखाना लक स्वतंत्र कर देईस अन् फिलीप्पी लक जाब साठी बलीस. पौलूस अन् सिलास लुदिया अन् काही अजून मित्र ला भेटीस अन् ओको बादमा नगर लक निकर गया. यीशु को बारामा शुभ संदेश फैलत गयो अन् कालीसिया बढत गई.

पौलूस अन् बाकी मसीही अगुवा न लगीत नगर की यात्रा करीस. उन्होन लोकमानला यीशु को बारामा शुभ संदेश सुनाईस, उन्होन कालीसियाओ का विश्वासियो ला उत्साहित करबसाठी अन् शिक्षा देबसाठी कई पत्र पण लिखीस. योकोमातलक काई पत्र बाईबल की पुस्तक बन गई.