5. प्रतिज्ञा को पुत्र

अब्राम अन् सारै ला कनान पहुचबको दस साल को बाद, आब पर्यंत ओला कोणतीच संतान नई होती. यकोसाठी अब्राम कि बायको सारैन् ओला बलीस, “परमेश्वर आबपर्यंत मला संतान पैदाकरवासाठी सक्षम नई करीस जन्माबसाठी लगीत बुढी भायाउन, देख मोरीदासी हाजिरा यमा हा, ओन भी लगन कर ले कि वो मोरो साठी एक संतान उत्पन्न करन.

आखिर अब्राम न हाजिरा संग लगन करीस, हाजिरा ला एक पुत्र भयो अन् अब्राम न ओको नाव इश्माएल ठेईस. पण सारै हाजिरा पासलक जळत होती, जब इश्माएल तेरा साल को होतो, परमेश्वरन् अजून अब्राम संग गोष्टी करीस.

परमेश्वर न बलीस “मी सर्वशक्तिमान परमेश्वर हून, मी तोरो संग एक वाचा बांधून.” मंग अब्राम न भूमी बऱ्या बासकेना नमस्कार करीस, परमेश्वरन् अब्राम ला यो भी बलीस, “ तू लगीत भी जातियो को पिता होस, मी तोला अन् तोरा वंशाजेला उनकी नीज भूमी होबसाठी कनान देश दून अन् मी सदा को साठी उनको परमेश्वर रहून. तोला आपलो घराना को हर पुरुष का खतना करब लागन.

"तोरी बायको सारै एक पुत्र पैदा करन, ओ प्रतिज्ञा को पुत्र रहन. ओको नाव इसहाक ठेवस. मी ओको संग आपली वाचा बनायकेना ठेऊन अन् अन् वो एक मोठी जाती बनाऊन, पण मोरी वाचा इसहाक को संग रहन.” तब परमेश्वर न् अब्राम का नाव बदलाकर अब्राहम करीस. जेको अर्थ हा, लगितो को पिता. परमेश्वरन् सारै का पण नाव बद्लाकार सारा करीस, जेको अर्थ हा, “मुलमाता.”

वो दिन अब्राहम न आपलो घर का सर्वा माणूस को खतना करीस. लगभग एक साल के बाद, जब अब्राहम १०० साल कि वय का होतो अन् सारा ९० साल का वय कि होती, तब सारा न अब्राहम को पुत्र ला पैदा करीस. जसो परमेश्वर न उनला बलीस होती, वसच उनन ओको नाव इसहाक ठेईस.

जब इसहाक जवान भयो, त परमेश्वरन् यो बलकर अब्राहम को विश्वास कि परीक्षा ली, “आपलो एकलौता पुत्रलाले अन् मोरो साठी बली को रूप मा मार डाल.” मंग अजून अब्राहम न परमेश्वर कि गोष्ट ऐकीस अन् आपलो पुत्र ला बली करबसाठी तयार करीस.

जब अब्राहम ओर एसाहक बली देबोको ठिकाण पास जाता होता तब एसाहक न विचारीत ‘’,ऐ पिता आपलो पास बली साठी लाकडी त हा ,पण बली करबोको मेमनाकमा हा? अब्राहम न उत्तर दिस, “ऐ मोरो पुत्र परमेश्वर बली करबसाठी मेमने को बंदोबस्त करन.”

जब वय बली चढाबो को ठिकाण पहुचा, तब अब्राहम न इसहाकला बांधकेना वेदीबऱ्या लेटाईस. वो आपलो पुत्रला मारबला जातच होतो कि, परमेश्वर न बलीस, “थांब जा. पोऱ्या ला नुकसान नको पहूचाऊ. आब मी जान गयो कि, तू मोरो भय मानत हास, कारण कि तून आपलो एकलौतो पुत्र आ पण मोरो पासलक बचायकेना नई ठेईस.”

पास मा अब्राहम न एक मेंढा ला देखीस, जो झाड मा फसेहोतो. इसहाक को जागी बलीसाठी परमेश्वरन् मेंढा का बंदोबस्त करीस. अब्राहम न ख़ुशी ख़ुशी मेंढा कि बली चढाईस.

तब परमेश्वर न अब्राहम ला बलीस, “कारण तू मोरो साठी सर्वो काही देबला इच्छुक होतो, यात तक कि आपलो एकलौता पुत्र ला भी. यकोसाठी मी तोला आशिष देबकी प्रतिज्ञा करतून. तोरा वंशज आकाश को तारोपेक्षा भी अधिक होन. कारण तू मोरी आज्ञा ला माने हास. येकोसाठी मी तोरो परिवार को येकोन संसार का सर्वा कुळो ला आशिष दून.