۳۲- عیسی بیر دیوَ گرفتار کیشیِّه و مَرِض آروادِ شفا وِریر

بیرگین عیسی و شاگردلَر قایِقِنَن دریاچَنی اُ طرفِنَه جَدَریان یِرِنَ گِدِّلَر. اُنّا که قُورِّ یِرَ اِتیشدِلَر اِز قایق لَرِنَّن یازّیا گَلِّلَر.

بیر کیشِه اُردایدِ که پلید روح لَرَ گرفتارِدِ.

اُ کیشِه اُقاد گیجلیدِ که هِچ کَس تَوانِ اُنی آرام اِدّیگِنِ یُوخیدِ. چُخ موقع لَر اُنِه زنجیرِنَن باقلامُوشلارِدِ، آمّا اُ زنجیرلَرِ ایرتیردِ.

اُ کیشِه اُ مَنطَقَنی گُورلارِ اُرتاسُونا زندگانلیگ اِدیردِ. اُ گِجَه گینِّز داد وُوریردِ. رختی دالُونّا یُوخیدِ و اِزِنِ تیز داشلارِنَن یارا اِدیردِ.

اُنّا که اُ عیسی یانُونا اِتیشدِ، اُنی روبروسِنَّ دیز وُوردِ. عیسی اُ دیوَ فرمان وِردِ:« بُو کیشِدَن یازّیا گَل!»

دیو اوجَه داد وُوردِ و دِدِ:«ای عیسی، طارِه اُغُلِ، مَنَّن نَه سِیرَی؟ خواهش اِدیرَم مَنِ عذاب وِرمَه!» اُنّاسُورا عیسی اُ دیودَن خبر آلِّه:«سَنی آدی نَدِر؟» اُ جواب وِردِ:« مَنِم آدُوم لِژیون دُور، چون بیز چُخَگ.»( لِژیون ارتشِ رومی نِچَه مین سربازِ اُلیردِ.)

دیولَر عیسی دَن خواهش اِدِّلَر:« بیزِ بُو یِردَن یازّیا چاخاردما.» اُردا بیر گَلَّه خوک لَردَن دال ایسِنَ در حالِ یایلیگِ دِلَر. نجس روح لَر عیسی یَ التماس اِدِّلَر و دِدِلَر: « اُنّا بیزِ خوک لَر ایچِنَ یُولّا.» عیسی اجازه وِردِ و دِدِ:«گِدی.»

دیولَر اُ کیشِدَن یازّیا گَلِّلَر، خوک لَر ایچِنَ گِدِّلَر. وارِ اُ خوک لَر که یَخِن به ایکِه مین دِلَر دالی اینِه آشاقِسِنَ دریاچَه یَ دیشدِلَر و باددُولار.

خوک بانلَری که اُ گَلَّی گِزلِیلَرِدِ، بُو اتفاقی گِردیگِنَّن کَن طرفِنَه قَچدِلَر و خَلخِ عیسی نی ایشِنَّن خبر اِدِّلَر. کَنّی خَلخِ گَلِّلَر و اُ دیوَ گرفتار کیشیِّه گِردِلَر که آرام تُوتمُوش، رخت گِیمیش و عاقُل اُتُورمُوش.

خَلخ که چُخ قُورخمُوشلارِدِ، عیسی دَن سَدِلَر که اُردان گِدَ. اُنّا عیسی قایقَ مینِّه. آمّا اُ کیشِه که مُونّان ایلَرِ دیوَ اَسیرِدِ عیسی دَن خواهش اِدِّ تا اُنینّان گِدَ.

آمّا عیسی اُنا دِدِ:« اَوییَه بیکِل و وارکَسَ دِ که طارِه سَنی چِه نَیش گِرمیش و نَتَرکِه اُنی رحمتِ سَنی حالی یَ شامل اُلمُوش.»

بنابر بُو ا‌ُ کیشِه گِدِّ و هر کَسِنَن روبرو اُلیردِ، دِیردِ که عیسی بِلَسِچِه نَیش گِرمیش. هرکَس که اُنی مَتَلِنِ اِشِدیردِ، تعجب اِدیردِ.

عیسی دریاچَنی اُ طرفِنَه بیکِلِّه. اُرا اِتیشدیگدَن سُورا، چُخ گروه اُنی دِیرِنَ یِقِلمیشلَرِدِ، خَلخ شُلوغ لیگِنی اُرتاسُونّا، بیر آروادِ دِ که اُن ایکِه ایل خونریزلیگدَن درد چَکیردِ. اُ وارِ دارالیگِنِ اِزِنی درمانِچِه خرج آدمیشِدِ و دوکتُورلَرَ وِرمیشِدِ، آمّا اُنی حالِ پِستَردَ اُلمُوشِدِ.

اُ اِشِدمیشِدِ که عیسی چُخ مَرِض لَرِ شفا وِرمیش اُنّا اِزینَن دِ:« باور وارُوم که اگر فقط عیسی نی رَختِنَ اَل چَکَم، مَنَّ شفا بُولارام.» اُ آرواد خَلخی اُرتاسُونّان اِزِنِ عیسی پُوشتِنَ اِتیشدِردِ و اُنی رَداسِنَه اَل چَکدِ. به محضِ بُو که عیسی نی رَختِنَ اَل وُوردِ، خونریزی سِه قطع اُلِّه.

اَلَ اُ لحظَه عیسی متوجه اُلِّه که بیر نیرو اُنّان گِدِّ. اُنّا بیکِلِّه و خبر آلِّه:« کیم مَنِم رَختِمَ اَل چَکدِ؟» شاگردلَر جواب وِردِلَر:« چُخ خَلخ هر طرفدَن سَنی طرَفیَّه فشار گَتِریلَّر، نَچِه خبر آلیرای؟« کیم مَنَ اَل وُورمُوش؟»

اُ آرواد با بُو حال که قُورخُدان تیتِرِیدِ، عیسی نی قِچلَرِ جُلُونَ دیز وُوردِ. اُنّاسُورا اُنا دِدِ که نَیش گِرمیش و نَتَرکِه شفا بُولمُوش. عیسی اُنا دِدِ:« سَنِ ایمانی شفا وِردِ! سلامت لیگَ گِد.»