۴۴- بیر گدا کیشِه توسط پترس و یوحنا شفا تُوتیر

بیرگین یوحنا و پترس پرستشگاه طرفنَه گِدیلَّرِدِ. دروازَه قِراقُونّا، بیر فلج کیشیِّه گِردِلَر که گِدای لیگ اِدیردِ.

پترس اُ فلج کیشیَّه باخدِ و دِدِ: « من هِچ پیلی یُوخُوم که سَنَ وِرَم، آمّا اُ که وارُوم، سَنَ وِردَم. عیسی آدُنا، تُور و یُول گِد!»

طارِه اَلَ اُ لحظَه اُ کیشیِّه شفا وِردِ و شروع یُول گِدّیگَ اِدِّ و اُلّاری دِرِبَرِنَّ خوشحال لیگ و طاریِّه پرستش اِدیردِ. خَلخی که پرستشگاهی حیاطُنّای دُولار، تعجب اِدِّلَر.

چُخ جمعیت تِز یِقِلِّلَر تا اُ کیشِه که شفا بُولمُوشِدِ گِرَلَّر. پترس اُ جمعیت دِدِ: «بُو کیشینی شفا تُوتدیگِنَّن تعجب اِدمَی. بیز بُو کیشیِّه بخاطرِ قدرت و اِز دیندار لیگِمِز شفا وِرمَمیشَگ. بَلکَم بُو عیسی قدرتِ دِر که اُنِه شفا وِرمیش، چون بیز اُنا ایمان وارُومُوز.»

«سیز اَلَ اُ آدام لارایز که فرماندار رومی دَن سَدینز تا عیسی یِ اِلِّرَ. سیز اُ که وارکَسَ جان باقُوشلِیردِ اِلِّردینز، آمّا طارِه اُنِه اِلِملَردَن دیرِّ اِدِّ. هَرچَن سیز بیلمِیردینز نَیش گِریرَینز، آمّا انبیاء پیشگویی سِنِ عملی اِدینز که دِمیشلَرِدِ مسیح عذاب چَکَسِه و اِلَسِه. طارِه سَدِ که بِلَکِه اُلا. اُنّا توبَه اِدینز و طارِه طرفنَه بیکِلینز تا اُ گیناه لَرینزِ آرُودا.»

اُنّا پرستشگاهی رهبرلَرِ پترس و یوحنا گَپلَرِنِ اِشِدِّلَر و چُخ عصبانی اُلُّلار. اُنّا اُلّارِ تُوتدُولار و زندانا آدُّولار. آمّا اُلّاری چُخِ که پترسی پیغامِنِ اِشِدِّلَر، ایمان گَتِردِلَر و ایماندارلَری تعداد ۵۰۰۰ نفرَ اِتیشدِ.

صابا گینَّ، یهود رئیس لَرِ، پترس و یوحنا و فلج کیشیِّه بِلِنَ بِیگ کاهن و مذهبِ رهبرلَری حضورُنا گَتِردِلَر. اُلّار پترس و یوحنادَن خبر آلُّلار: « نَه قدرتِنَن بُو فلج کیشیِّه شفا وِردینز؟»

پترس جواب وِردِ: « بُو کیشِه که سیزی روبُروینزَ تُورمُوش عیسی مسیح قدرتِنَ شفا بُولمُوش. سیزعیسی یِ صلیبَ چَکدینز، آمّا طارِه گَنَه اُنِه دیرِّ اِدِّ! سیز اُنِه رَد اِدینز، آمّا آیرِ نجات یُولِه وجود یُوخِه، مگر عیسی نی قدرتِ!»

مذهبِ رهبرلَر پترس و یوحنانی قُورخمازلیگ لَرِنَّن تعجب اِدِّلَر، چون اُلّار بی سواد و معمولی آداملارِ دِلَر. اُنّا یادا گَتِردِلَر که بُو کیشِه لَر عیسی یْنَن دِلَر. اُنّا اُلّارا دِدِلَر: « اگر گَنَه عیسی دربارَه سِنَ خَلخِنَن گَپ چالاینز سیزِ سخت تنبیه اِدَرَگ.» اُلّار بعدِ بُو که پترس و یوحنایِ تهدید اِدِّلَر، آزاد اِدِّلَر.