۴۸- عیسی، مسیحایِ موعود دُر

اُنّا که طارِه دنیایِ دیزَدِّ، وارزاد کاملِدِ و گیناه وجود یُوخیدِ. آدام و حوا بیربیرِ چُخ سِیلَّرِدِ و عاشقِ طاری دِلَر. هِچ مَرِض لیگ یا اِلِم یُوخِدِ. بُو اَلَ اُ دنیای دِ که طارِه سِیردِ.

شیطان، از طریق ایلانی که باغ ایچِنَّیدِ، حوایْنَن گَپ چالِّه، چون سِیردِ اُنِه آلّادا. اُنّاسُورا اُ و آدام گیناه اِدِّلَر. به دلیلِ اُلّاری نافرمانلیگ لَرِ، وارِ آداملار اِلِمَ محکوم اُلُّلار.

حتی بخاطرِ آدام و حوا گیناه سِه وحشتناک تر اتفاق دیشدِ. اُلّار طارِنی دشمن لَرِ اُلُّلار. در نتیجَه، اُ زمانّان تا اینِیَن چَه، وار آداملار گیناه اِدمیش لَر. هرکس اُ زمانّان که دنیایا گَلیر طارِنی دشمنِ دِر. طارِه و اینسان اُرتاسُونا صلح آمیز رابطَه یُوخِدِ، آمّا طارِه سِیردِ صلح برقرار اُلا.

طارِه وعدَه وِردِ که بیر نفر حوا نَسلِنَّن شیطانی باشِنِه دِیَر و شیطان اُنی پاشنَه سِنِ والار. بُو معنی وِریردِ که شیطان مسیحِ اِلِّرَر، آمّا طارِه گَنَه اُنِه دیرِّ اِدَر. اُنّا مسیحِ موعود همیشَه چِه شیطانی قدرتِنِ اُرتادان گِتِرَر. چُخ ایلَّردَن سُورا، طارِه آشکار اِدِّ که عیسی اَلَ اُ مسیحایِ موعود دُر.

طارِه نوحَ دِدِ بیر کِشتی دیزَدَ تا خانوادَه سِنِ از توفانی که سِیر یُولّیا نجات وِرَ. بِلَکیدِ که طارِه اُ کَسلَری که اُنا ایمان وارلاریدِ نجات وِردِ. اَلَ بُو صورتَ وارِ اینسان لَر بخاطرِ گیناه لارِ لایقِ اِلِّیگ طارِنی طرفِنَّن دِلَر. آمّا طارِه عیسی یِ یُولّادِ تا هرکس اُنا ایمان گَتِرَ، نجات باقُوشلیّا.

ایز ایلَّرَن چَه، کاهن لَر اینسان لَرِچِه طارِه درگاه سِنَ قُربانلُوق رَد اِدیلَّرِدِ. بُو ایش خَلخَ گِرسَدیردِ که گیناه اِدمیشلَر و لایقِ مجازات طارِنی طرفِنَّن دِلَر. آمّا اُ قربانی لَر باشارمِیرلَرِدِ باعث باقُوشلاندیگِ اینسان لَری گیناه لارِ اُلالّار. عیسی بِیگ کاهن دِر. اُ ایشی گِردِ که کاهن لَر اُنی انجامِنَّن عاجِزِدِلَر. اُ اِزِنِ فدا اِدِّ تا قُربانلُوقی بشری گیناه لَرِچِه فراهم اِدَ. اُ قبول اِدِّ که بخاطرِ وارِ اینسان لَری گیناه لارِ، مجازات اُلا. اَلَ بُو خاطرَ عیسی بِیگ کاهن دِر.

طارِه ابراهیمَ دِمیشِدِ: « بخاطرِ سَن وارِ دنیانی طایفَه لَرِنَ بریکت وِردَم.» عیسی، ابراهیم نَسلِنَّنِدِ. وارِ دنیانی قوم لَرِنِ طارِه ابراهیم وسیلَه سِنَ بریکت وِریر، چون هرکس عیسی یَ ایمان گَتِرَ، گیناه دَن نجات بُولاری. اُنّا که بُو خَلخ عیسی یَ ایمان گَتِریلَّر، طارِه اُلُارِ ابراهیم نَسلِنَّن بیلیر.

طارِه ابراهیمَ دِدِ تا اسحاقِ اُغُلُنِ اُنین چِه قربانی اِدَ. آمّا طارِه بیر قُوزِّ اسحاق یِرِنَ فراهم اِدِّ تا قربانی اُلا. بیزِم وارُمُوز بخاطرِ گیناه لَرِمِز لایقِ اِلِّیگَگ! آمّا طارِه عیسی یِ دنیایا باقُوشلادِ تا بیزِم یِرِمِزَ قربانی اُلا و اِلَه. اَلَ بُو خاطرَ عیسی یِ طارِه قُوزُّسِه اُخِیراگ.

اُنّا که طارِه آخُر که بلایِ مصرَ یُولّادِ، هر خانواده یِ اسرائیلی یَ دِدِ تا بیر قُوزِّ اِلِّرَلَّر. بُو قُوزِّ بی نَقص اُلاسیدِ. اُنّاسُورا اُلّار اُنی قانِنِ اُخارِه و دَرِ اَوی چهار چوبِنی قِراقُونا سَپَلَسیدِلَر. اُنّا که طارِه اُ قانِ گِریردِ، اُلّاری اَولَرِنَّن رَد اُلیردِ و اُ اَوی اَوَلکِه اُغُلُنِ اِلِّرمِیردِ. اُنّا که بُو اتفاق دیشدِ، طارِنی اُنِه پسخ اُخُودِ.

عیسی عیدِ پَسَخی قُوزُّسِه تَکِه دِر. اُ هِچ اشتباهی اِدمَمیشِدِ و هِچ وقت گیناهی اِدمَدِ. اُ اَلَ عیدِ پسخ گین لَرِ اِلِّه. اُنّا که بیرکَس عیسی یَ ایمان گَتِریر، عیسی نی قانِ اُ آدامی گیناه سِنی جریمَه سِنِ وِریر. انگار که طارِه، اُنی مجازات اِدمَزلیگینَن، اُنّان گَچیر.

طارِه بنی اسرائیلِنَن پیمان باقلادِ، چون اُلّار قُومی دِلَر که اُ انتخاب اِدمیشِدِ تا اُنین که اُلالّار. آمّا اینِّ طارِه تازّا پیمان برقرار اِدمیش که وار کسی دَسترَسِنَّ وار. هرکس هَر قوم و طایفَه دَن، اگر بُو پیمانِ قبول اِدَ، طارِنی قُومِنَ قُونشُولیر.

موسی بیر پیامبریدِ که طارِنی کلامِنِ چُخ قدرتِنَن اعلام اِدیردِ. آمّا عیسی وارِ پیامبرلَردَن بِیگ تر دِر. اُ طارُه دُر. اُنّا که هَرنَه اُ انجام وِردِ و دِدِ، طارِنی رفتارِ و گَپلَریدِ. اَلَ بُو دلیلَ دِر که کتاب مقدس عیسی یِ طارِه کلمَه سِه اُخِیر.

طارِه پاشا داوودَ وعدَه وِردِ که بیر نفر اُنی نَسلِنَّن بعنوانِ پاشا تا اَبَدَنچَه طارِنی قُومِنَ حکومت اِدَر. عیسی طارِنی اُغُلِ و مسیحایِ موعود دُر و اُ داوود نَسلِنَّن دِر که باشاریر اَبَدَنچَه پاشالیگِ اِدَ.

داوود، اسرائیل قُومِنی پاشاسیدِ، آمّا عیسی وارِ دنیانی پاشاسِه دِر! اُ گَنَه گَلَر و عدالت و صلحِنَن تا اَبَدَنچَه پاشالیگِ اِدَر.