۵۰- عیسی بیکِلیر

یَخِن به ۲۰۰۰(ایکِه مین) ایلِّر که چُخ اینسان لار دنیادا، خوب خبرِ عیسی یِ مسیح انجیلِنِ اِشِدیلَّر. کلیسا در حالِ رشد اِدّیگِ میش. عیسی وعدَه وِردِ که دنیانی آخُرُنّا بیکِلَر. هَرچَن عیسی هَنِه گَلمَمیش، آمّا اِز وعدَه سِنَ وفا اِدَر.

طارِه بیزدَن سِیر با بُو حالی که منتظرِ مسیح نی بیکِلّیگییَگ، طوری زندگانلیگ اِدَگ که مقدس اُلاگ و اُنا احترام قُویاگ. اُ اَلَ بُو جور بیزدَن سِیر که اُنی پاشالیگِ دربارَه سِنَ آیرِ آداملارِنان دانُوشاگ. اُنّا که هَنِه مسیح یِر ایسِنَّ زندگانلیگ اِدیردِ، بِلَکِه دِدِ: « منِم شاگردلَرِم خوب خبرِ طارِنی پاشالیگِنِ دنیانی وار یِرِنَ موعظَه اِدَلَّر. اُنّا آخُرَ اِتیشَر.»

چُخ قوم لَر وارُ دُولار که هَنِه مسیح دربارَه سِنَ هِشنَه اِشِدمَمیشلَر. قبلِ مسیح نی بیکِلّیگِ آسمانا، اُ دِدِ تا بُو خوب خبرِ وارِ اُ کَسلَرَ که هَنِه اِشِدمَمیشلَر اعلام اِدَلَّر. عیسی دِدِ:« گِدینز و وارِ ملت لَرِ منِم شاگردِم اِدینز، چون ایرَگ لَر عینِ زِراعت یِرِ تَکِه بیچدیگِ چِه أمادَه دِلَر.»

عیسی مُونِه دِدِ که: « خادم اِز اَربابِنَّن اُخارتَر دَیل. اَلَ اُ جور که بُو دنیانی اَرباب لَرِ مَنَّن نفرت وارلاریدِ، سیزِدَ بخاطرِ من شکنجَه اِدَلَّر و اِلِّرَلَّر. بُو دنیادا رنج چَکَرَینز آمّا ایرَگینز قُرص اُلا؛ چون من، شیطانِ که حاکمِ بُو دنیادُور شکست وِرمیشَم. اگر آخُرَنچَه مَنَ وفادار قالاینز، اُنّا طارِه سیزِ نجات وِرَر!»

عیسی اِز شاگردلَرِچِه بیر مَتَل تعریف اِدِّ، تا اُلّارا توضیح وِرَ که بُو دنیانی آخُرُنّا نَه، خَلخی باشُونا گَلَر. اُ دِدِ: « بیر کیشِه اِز زراعت یِرِنَّ خوب بذر اَگدِ. اُنّا که هَنِه خوبِدِ، اُنی دشمنِ گَلِّه و بُقدَ بذرِنی آراسُونّا، ویل اُد تَنَّسِه اَگدِ و اِز یُولُونّا گِدِّ.

اُنّا که بذرلَر جوانَه وُوردُولار، اُ کیشِنی کارگرلَرِ دِدِلَر: « ارباب، سیز بُو یِرَ خوب بذر اَگدینز! نَچِه اُلّاری اُرتاسُونا ویل اُد گَرمیش؟» اُ کیشِه جواب وِردِ: « بُو فقط باشاریر مَنِم دشمن لَرِمی ایشِه اُلا که اُلّارِ اَکَلَّر. منِم دشمن لَرِمی بیرِ بُو ایشِه گِرمیش.»

کارگرلَر اِز ارباب لَرِنی جوابِنَّ دِدِلَر: « آیا اُدلَرِ یازّیا چَکَسیگ؟» ارباب جواب وِردِ:« یُو، اگر بُو ایشِه گِرَینز، بُقدِلَری بیر پاراسِنِدَ اُلّارِنَن یازّیا چَکَرَینز. تا بیچْدیگ موقَع سِه صبر اِدینز و اُنّاسُورا اُدلَرِ یِقی و یانُّوری، آمّا بُقدِلَرِ منِم اَنبارِمَ گَتِری.»

شاگردلَر بُو مَتَلی معنی سِنِ متوجَه اُلمادُولار و مسیح دَن سَدِلَر تا بُو مَتَلِ اُلّارِچِه توضیح وِرَ. عیسی دِدِ: « اُ کیشِه که خوب بذر اَگدِ، گِرسَدیر که مسیح دِر. زراعت یِرِ بُو دنیایِ دِیر و خوب بذر معنی سِه خَلخی دِر که طارِنی پاشالیگِنَّ دِلَر.»

ویل اُد آداملاری دِلَر که شیطان که دِلَر، یعنی شَروردِلَر. اُ کیشِنی دشمنِ یعنی اُ آدامی که ویل اُدلَرِ اَگدِ، اَلَ اُ شیطان دُر. بیچدیگ فصلِ دنیانی آخُرُ دُر، و دِروگَرلَر فرشتَه لَر دِلَر.

اُنّا که دنیا آخُرَ اِتیشَه، فرشتَه لَر وارِ خَلخی که شیطان که دِلَر، دنیانی وار یِرِنَّن یِقَلَّر و اُت دریاچَه سِه ایچِنَ آتالّار. یِری که اُلّار وحشتناک رنج و مصیبَتِنَن آقلیّالّار و اِز دیشلَرِنِ بیربیرَ سیرتَلَّر. آمّا عادل لَر که عیسی یِ پیرُولیگ اِدمیشلَر عینِ گین تَکِه اِز آتّالارِنی پاشالیگِنَّ،(طارِه) ایشِلِیَلَّر.

عیسی اَلَ بِلَه دِدِ که قبلِ دنیانی آخُرِ یِرَ بیکِلَر. اُ اَلَ اُ صورتَ که یِرِ ترک اِدِّ بیکِلَر، یعنی بیر بدنِ فیزیکی وارِ اُلار و آسمانَّن بُولُوط لَر ایسِنَّ گَلَر. اُنّا که عیسی بیکِلَه، هر مسیحی که اِلمیش، اِلِم لَردَن تُورار و اُنینَّن آسمانّا ملاقات اِدَر.

اُنّا مسیحی لَری که هَنِه دیرِّ دِلَر، آسمانا صعود اِدَلَّر و باقِّه مسیحی لَرَ قُونشُولُّلار که اِلِمنَن تُورمُوش لار. اُلّاری وارِسِه عیسی یْنَن اُردا اُلالّار و عیسی اِز قُومینَن زندگانلیگ اِدَر. اُلّار صُلحِنَن جاودانَه بیربیرِنَن زندگانلیگ اِدَلَّر.

عیسی وعدَه وِردِ که هرکس اُنا ایمان وارِ، بیر تاج باقُوشلیّار. اُلّار طارینَن بِلِنَه وار زادَ حکومت اِدَلَّر و کامل آرامش ایچِنَّ اُلالّار.

آمّا طارِه اُ کَسلَری که عیسی یَ ایمان گَتِرمَدِلَر، داوری اِدَر. اُ اُلّارِ جهنَّمَ آتار. اُرا بیر یِری دِر که اُلّار تا اَبَدَنچَه آقلیّالّار و اِز دیشلَرِنِ بیربیر ایسِنَ فشار وِرَلَّر و رنج چَکَلَّر. اُتی که هِچ وقت کُر اُلماز اُلّارِ یانُّورار و قُوردلَر اُلّاری یِدیگِنَّن تُورمازلار.

اُنّا که عیسی بیکِلَه، شیطان و حکومتِنِ کامل نابود اِدَر. شیطان تا اَبَدَنچَه وارِ اُلّارِنان که بجایِ اطاعت طارُدان، اُنّان پیرُولیگ اِدیلَّرِدِ اُردا یانالّار.

بخاطرِ آدام و حوا نافرمانلیگ لَرِ و گَتِردیگِ گیناه بُو دنیایا، طارِه دنیایِ لعنت اِدِّ و تصمیم تُوتدِ اُنِه نابود اِدَ. آمّا بیرگین طارِه تازّا آسمان و یِر دیزَدَر که کامل اُلار.

عیسی و اُنی قومِ تازّا یِردَ زندگانلیگ اِدَلَّر، و اُ تا اَبَدَنچَه هَرنَه یَ که وجود وارِ سلطنت اِدَر. اُ هر یاشِ خَلخی گِزِنَّن آرُودار. داهان هِچ غمی اُلماز و هِچ کس رنج چَگمَز. اُلّار هِچ وقت آقلاماز لار، داهان هِچ کس مَرِض اُلماز و اِلمَز. و هِچ پِس زادی اُردا اُلماز و عیسی اِز پاشالیگِنَّ صلح و عدالتِنَن حکومت اِدَر. اُنًان سُورا اُ اِز قُومی نَن تا اَبَدَنچَه اُلار.