۷- طارِه یَعقوبَ بَریکَت وِریرْ

اُ ایکِه اُغُل بِیگْ اُلُّ لارْ. عیسو گِینِه سِیرْدِ شِکارَ گِدَ آمّا یعقوب اَودَ تُورانْ کیشیدِ. ربکا یعقوبِ چُخ سِیرْدِ آمّا عیسو اسحاقی عزیزِیدِ.

بیرْ گینْ عیسو که چُخ آجِدِ شِکاردَن بیکِلِّه. عیسو یقوبَ دِدِ:«بی زحمت بیجَه خُوراکینَّن مَنَ وِر»یعقوب جواب وِردِ:» اوّل مَنَ قول وِر که هَرنَه بخاطر اَرشَدلیگیْ سَنَ اِتیشیرْ مَنَ باقُوشلیّای.»بنابر بُو عیسو قول وِردِکه وارِ مَزایایِ اَرشَدْلیگِنِ یعقوبَ باقُوشلیّا. اُنّاسُورا یعقوب بیجَه خُوراکِه عیسویَ وِردِ.

اُنّا که اسحاق سِیرْدِ اِز بَریکَتِنِ عیسویَ وِرَ، ربکا حقّه بازلیگِنَن یعقوبِ عیسو یِرِنَ اسحاق اُناقِنَ یُولا سالِّه. اسحاق قُوجالْمُوشِدِ و داهانْ باشارْمِیرْدِ خوب گِرَ. یعقوب عیسونیْ رَختِنِه گِیدِ و اِز بُویْنِنِه و اَلَّرِنِه گَچِه دَرِسینَن ایرْدِ.

یعقوب آتاسِه یانُونا گَلِه و دِدِ:«مَن عیسو یامْ و گَلمیشَم تا مَنِ بَریکَت وِرَی.»اُنّا اسحاق گَچِنیْ غِلِنِه اَلْ چَکدِ و رَختِه ایسْلادِ، فکر اِدِ که عیسو گَلْمیشْ اُنی یانُونا و اُنِه بَریکَت وِردِ.

عیسو یَعقوبْدَن نیفْرَت واریدِ، چون اُ حق اَرشَدْلیگِنِ و اُنی بَریکَتِنِ اُقُورْلامُوشِدِ. بنابر بُو نَقشَه چَکدِ اُنّا که اسحاق اِلِّه، یعقوبِ اِلِّرَ.

آمّا ربکا بُو جریانِه بیلِّه. اُ و اسحاق، یعقوبِ بیرْ ایراقْ یِرَ ربکانیْ قُومْلارِ یانُونا یُولّادُلارْ.

یعقوب چُخ ایلَّر ربکانیْ قُومْلارِ قِراقُونا زِندگانلیگْ اِدِ. اُ دُورانَّ، اُ تُویْ اِدِ واُن ایکِه و بیرْ قِز اَیَسِه اُلِّه. طارِه یعقوبَ چُخ دارالیگْ باقُوشْلادِ.

ایگِرمِه ایل ایراقْلیگْ اَوِنَّن که کَنعانَّیدِ، یعقوب خانِوادَسینَن، خادِمْلَرِ و وارِ گَلَّسینَن اُرا بیکِلِّه.

با بُو حال یعقوب چُخ هَراس واریدِ، چون فکر اِدیرْدِ که عیسو هَنِه سِیرْ اُنِه اِلِرَ. بنابر بُو چُخ تَرِ گَلَسِنیْ حیوانْلَرِنِه به عنوان سوغات عیسوچِه یُولّادِ. خادِمی که اُ دامْلارِ عیسوچِه آپارْمُوشِدِ، اُنا دِدِ:«بُو دامْلارِ خادِمی یعقوب سَنَ پیشکِش اِدیرْ. اُ بُو تِزْلیگْدَ بُورا اِتیشَر.»

آمّا عیسو سَمِیرْدِ یعقوبَ آسیب وُورا و اُنی گِردیگِنَّن چُخ خوشحال اُلدِ. یعقوب صلح و آرامِشِنَن کنعانَّ زندگانلیگْ اِدیرْدِ. اُنّاسُورا اسحاق اِلِّه و یعقوب و عیسو اُنِه ُورپاقْ اِدِلَر. پیمانی که طارِه اِب اهیمِنَن باقْلامُوشِدِ، اسحاقْدَن سُورا یعقوبَ اِتیشدِ.