13. १३. इस्राएलदैना परमेस्वर क करार

इस्रायलिराउ लाल समुन्द्र पार खयाङ न्हौ परमेस्वर इ हुराउकाना उजाड ठन्क हाइत ओतना सिनै पर्बतहा डोर्‍याआ ।इन हुन्ल पर्बत हुनि जहाँ मोसाइ जोर्छायाङ पोथ्राउ मुयाङ हुनि ।मन्छेराउ इ आफ्नो पालराउ पर्बत क दि तागेसो।

परमेस्वर इ मोसादै इस्रायल क मन्छेराउकाना गारा,"यदि नाराउ इ ङा क आज्ञा मानेम दैना ङा क करार पालन खयाझै, नाराउ ङाक सम्पती , पुजारिराउ क दाठौ राज्य अनि दाठौ पबित्र जाती ओहि ।"

सुमकान न्हौ,मन्छेराउ आफुहा आत्मिकरुपहा तयार ओयाङ न्हौ,परमेस्वर गर्जन,चट्याङ,धुमा अनि चर्को बिगुल ध्वनी दैना सिनै पर्बत क टाकुराहा ग्रोतना ओङा।हुन पर्बतहा थुतिम मोसाकाना च्याल अनुमती ह्रेनी ।

अनि परमेस्वर इ हुराउकाना हुन करार बया अनि गारा,ङा"याहोवे हु,नाराउ क परमेस्वर जाङा इ नाराउकाना मिश्रदेश क दासत्वहाइत बचाआ।नाराउ इ अरु आङ्ल देउताराउ तापुजेम।"

आङ्ल किसिम क मुर्ती राउ ताबनाम या हुराउकाना मापुजेम,आहुखाझै ङा,योहोवे,डाही परमेस्वर हु।ङाक ब्रीङु हुच्चकिल मा-लओम ।शबाथ काले पबित्र थाम माभुलेम हुन चाहिँ ,नाराउ क सब्ल कामराउ ६ कान मचै खैने,तर सात्थ कानचाही नाराउक लागै न्हातिन्याङ दैना ङा काना सम्झेन्याङ कान हु।

आफ्नो जेयु-बयुक आदर खयम ।हत्या मा-खयम ।ब्यभिचार ता-खयम ।चोरी ता-खयम ।झुठ मा-थामम।आफ्नो छिमेकी क मत्काउ ,हुन्क नाम ,अथवा हुन्क आङ्ल कुराक लोभ ता-खयम ।

अनि परमेस्वर इ इन दस आज्ञाराउ नि वटा ढुङ्ग क पाटिहा लेखेया अनि हुन मोसाकाना बया।परमेस्वर इ अरुकनी चोल ब्यबस्था दैना कानुनराउ पालन खयम बया।यदि हुराउइ इन ब्यबस्था पालन खयाझै परमेस्वर इ हुराउकाना आशिष बैन्याङ दैना हुराउक रक्षा खैन्याङ प्रतिज्ञा खया।यदि हुराउइ इन आज्ञा भङ्ग खयाझै परमेस्वर इ हुराउकाना दण्ड बैहौनी।

परमेस्वर इ इस्रायलिराउकाना आफुइ चाहेयाङ साङ्ल पाल बनाम बिस्तृत नमुना कनि बया।हुन्काना भेट ओन्याङ पाल गारेनी अनि हुन्क निठौ कोठाराउ ह्रेइनी ,जाङ दाठौ बरे पर्दाइ छुट्यायाङ ह्रेनी ।प्रधान पुजारी च्याल हुन पर्दा पछाडी क कोठाहा स्वाम दारुनी ,आहुखाझै परमेस्वर हुन्हा नैनी ।

गुनिल्कनी परमेस्वर क आज्ञा भङ्ग खयाझै हुनि दाठौ पशु भेट ओन्याङ पाल क ध्री ओयाङ बेदिहा पित्तना परमेस्वरकाना बलि क रुपहा चढाम ह्रोयनी ।दाठौ पुजारी हुन पशुकाना सातुनी अनि बेदिहा थातना छोरबएनी।बलि चढायाङ पशु क सि हुन मन्छे क पाप खोमिन्याङ ह्रेनी अनि परमेस्वर क नजरहा हुन मन्छे शुद्ध ओन्याङ ह्रेनि।परमेस्वर इ मोसाक गोट्याउ हारुन दैना हुन्क सन्तानकाना आफ्नो पुजारी ओम नियुक्त खया।

सब्ल मन्छेराउकाना परमेस्वर इ बयाङ आज्ञा दाठौ च्याल परमेस्वरकाना पुजेन्याङ दैना उइ क बिशेष मन्छेराउ हुइ गार्त मानेम राजी ओसि।तर हुराउइ बाचा खयाङ आइची समय न्हौ ल हुराउइ प्रीमाप्री पाप खैसो।

चोल कान मचै ,मोसा परमेस्वर दैना कुरा खयमक लागै सिनै पर्बत क टाकुराहा स्वाह्रेयानि।मन्छेराउ हुन फर्केन्याङ कुरेकुरेत गलेसि।हुन्लमारै हुराउ इ हारुन निङ्हा सोनाराउ पित्सो अनि हुराउक लागै दाठौ मुर्ती बनाम स्लासो

हारुन इ बाच्छ क आकारहा सोना क दाठौ मुर्ती बनाआ।मन्छेराउ इ हुन मुर्तिकाना पुजेम दैना बलि चढाम ग्लासि

मोसा दि ग्रोयाङ न्हौ जब हुनि हुन मुर्ति मुआ,हुन इच्च रिसेयाकी पर्मेस्वर इ हुन्काना बयाङ दस आज्ञा क पाटी राउ तम्तना कोइबया।

अनि मोसाइ हुन मुर्तिकाना कुटाट्ना धुली बनाआ,हुन धुलिकाना आइचिदा ती हा जाका अनि मन्छेराउकाना हुन ती तुङम स्लासी ।परमेस्वर इ मन्छेराउहा माहामारी पित्बया अनि हुराउ मध्य चो जना सिसि ।

मोसा फेरि पर्बत ताकी थुतिया अनि हुन मन्छेराउकाना परमेस्वर इ क्षमा खै बयम क लागै प्राथना खया।परमेस्वर इ मोसाक बिन्ती क्लाआ अनि हुराउकाना क्षमा बया। आफुइ कोयाङ पहिला क दस आज्ञा क पाटीराउकाना मोसाइ फेरि ढुङ्ग क दाठौ नवै पाटीहा लेखेतना पुन स्थापित खया।अनि परमेस्वर इ इस्रायलिराउकाना सिनै पर्बतहाइत प्रतिज्ञा खयाङ देशहाइ डोर्‍याआ।