3. ३. जलप्रलय

चोल समय न्हौ संसार हा चोल मन्छेराउ ओसि ।हुराँउ चो दुष्ट दैना हिन्सात्मक ओत्याल स्वाह्रेसिनी ।इन नो एम्धै चो खराब ओआ कि परमेस्वर इ सारा सन्सार काना दाठौ बरे जल्प्रलय हाइत नास खैन्याङ निधो खया।

तर नोआ इ परमेस्वर हाइत निगाह दारा दुष्ट मन्छेराउ क बिच हा हुन दाठौ धर्मी मन्छे ह्रेनी।परमेस्वर इ नोआ काना आफुइ लेतम् बङ्याङ जलप्रलय क बारेहा गारा।,उइ नोआ काना दाठौ बरे जहाज बनाम स्लाआ।

परमेस्वर इ नोआ काना करिब १४०मिटर लामो २३मिटर चौडाइ र१३.५ मिटर अग्लो जहाज बनाम गारा,नोआ इ हुन जहाज काना सिङ क प्रयोग खैतना ३ तह हा बनाम बृन्याङ ह्रेनि जहा चो कोठाराँउ छत दैना झ्यालराउ ओम ब्रीनी ।हुन जहाज हा नोआ आफ्नो परिवार अनि हरेक किसिम क जमिन हा नैन्याङ जनावर राँउ जलप्रलय क समयहा सुरक्षित ओइ।

नोआ इ परमेस्वर क आज्ञा मानेया, नोआ दै हुन क सुम जना चाउअराँउ इ परमेस्वर इ गार्याङ साङ्ल जहाज बनासो। जहाज एक दम बरे ओयाङ मारै हुन् काना बनाम चोल बर्ष ग्लाह्रेयानी ।नोआ इ मन्छेराँउकाना जलप्रलय क चेतावनी बैत परमेस्वर हाइ फर्केम सचेत खया तर हुराउ इ हुन क कुराहा बिश्वास खैसोमा ।

परमेस्वर इनोआ काना हुन्क परिवार दैना जनावर राँउ कानाचाहेयाङ जच्च जान्याङ कुरा जम्मा खयम स्लाआ।जब सब्ल कुरा तयार ओआ,परमेस्वर इ नोआ काना नो समय ओङ्ह्रे गारा। अनि हुन, हुन्क मत्काउ हुन्क सुम वटा चाउराउ दैना हुराउ क मत्कासी सब्ल्हाउ काना जहाज हा बाङम गारा।(हुराउ सब्ल आठ्ठ जना ह्रेइनी ) ।

परमेस्वर इ भाल्या दै पोथी खैत सब्ल किसिम क पशुपक्षि क दा-दा जोडि नोआ निङ्हा लेता, ता कि जलप्रलय क समय हा हुन सब्ल जहाज हा सुरुक्षित ओइद,उ इ बलि क लागै चाहेन्याङ पशुपक्षी हरेक क सात्थ-सात्थ जोडि भाल्या दै पोथी बनातना लेता ।जब हुराँउ सब्ल जहाज भित्रौ स्वासी तब् परमेस्वर स्वयम् इ जहाज क ढेला बन्द खैबया।

हुन न्हौ ,देउ र्वाम सुरु ओआ। चालीस कान ,चालीस रात मचै लगतार देउ र्वाआ ।पृथ्वी दि हाइत कनि" ति" बेग हा उर्लेतना ओङा।सारा संसार दै अग्लो चुचुराराँउ समेत ती हा बुरेह्रेसिनी ।

सुक्खा जमिन्हा बचेन्याङ सब्ल थोक सि सि ,जहज भित्रौ ओयाङ मन्छे दै पशुपक्षी राउ च्याल बचेसी जहाज "ती "ताकी उत्रेह्रेया, अनि भित्रौ ओयाङ सब्ल्हाउ काना बुरेम हाइत जोगात थाआ।

ती थामेयाङ प्ला महिना मचै जहाज उत्रेह्रेया,अनि हुन बिच हा ति पोककाता ह्रेयानी।दाक्काले दाठौ पहाड क टुप्पाउहा जहाज थामेया,तर पृथ्वी अझ मचै कनि ती हा बुरेह्रेयानी सुम महिना न्हौ,अरु पहाड क ताकि क भागराँउ छिङम ग्लासी ।

अरु चालीस कान न्हौ,नोआ इ दा ठौ कौवा काना ती पोख्रेका कि माल खैतना भाइरौ लेता।कौवा हाइ-हेइ खैतल पोक्याङ दिशा क खोजिहा उरेम ग्लाआ ,तर घोइल कनि दारम ह्रोआमा।

न्हौ नोआइ दा ठौ कौह्र्या काना लेता ।तर हुनिकनी सुक्खा दिशा दाल्लम ह्रोआमा ,हुन्लमारै हुन नोआक हा फर्केत ओङा।हुन क दा हप्ता न्हौ हुनि फेरि हुन कौह्र्या काना भाइरौ लेता,अनि हुनि आफ्नो चुच्चाउहा दा ठौ जैतुन क हागाउ पित्तना ओङा।ती पोक्काता ह्रेयानी ,अनि बिरुवाराँउ फेरि पल्हेकात ह्रेसिनी ।

अर्को दा-हप्ता लाङ्याङ न्हौ नोआ इ सुमचोटा हुन कौह्र्या काना भाइरौ लेता ।इन चोटा चाहिँ हुन इ आराम खैन्याङ ठाउँ दारा, अनि हुन फर्केत ओङामा ।ती पोक्त्कात ह्रेयानि ।

नि महिना न्हौ परमेस्वर इ नोआ काना गारा, ,नाङ दै नाङ क जहान सब्ल पशुपक्षीराउ जहाज हाइत भाइरौ तोङम ह्रोके।नराउइ चोल सन्तानराँउ जन्माने अनि फेरि सब्ल पृथ्वी हा भरेतल स्वानी "।अनि नोआ दै हुन क जाहानराँउ जाहाज हाइत भाइरौ तोङ्सी ।

जहाज हाइत भाइरौ तोङ्याङ न्हौ नोआ इ परमेस्वर क लागै दा ठौ थान बनाआ अनि, हुन थान हा बलि क लागै थाइयाङ आङ्भनी जनावरराउ क बलि चढाआ।परमेस्वर हुन बलि हाइत खुशी ओआ अनि नोआ दै हुन्क परिवार काना आशिष बया।

परमेस्वर इ प्रतिज्ञा खया,"नो फेरि ङा तिङ्ल कनि मन्छे क दुष्टता क लागै इन पृथ्वी काना श्रापित तुलेन्याङ हैमा,अथवा जलप्रलय हाइत सन्सारकाना नस्ट खैन्याङहैमा,हुसलकनी(यद्यपि) मन्छे क मनौ क भाबनाराउ आउचुनारी हाइतनाल दामनिको ओकङ।"

अनि परमेस्वर इ प्रतिज्ञा क चिन्ह स्वरुप पहिला भेङादुरी बनाआ।हरेक चोटा जब आकाश हा भेङादुरि छिङ्कङ ,परमेस्वर इ आफ्नो मन्छेराँउदै खयाङ प्रतिज्ञा सम्झेकु।